قوماش 110
نووسینی: #ئوسامە جەمیل#
بەڕێکەتینەوە و جێبەکەی قریاقۆسی بەو توولە ڕێیەی دا خشی، کە ڕێی هات و نەهاتێ بوو، باشبوو خوا ڕەحمی کردو لەوێ دەربازبووین، گۆتی: چارێگەکمان مایەو دەگەینە ئەو دوو زەلامەی بە هەسپەوە چاوەڕێت دەکەن، ئەمن تەسلیمی وانت دەکەم و دەگەڕێمەوە، ئەتووش ئاگات لەخۆبی و ئیشاڵلا بە سەلامەتی دەگەی! گۆتم: زۆر مەمنون و دەستەکانت خۆشبی، ئەوڕۆ ئەتووم باش ئەزیەت دا، گۆتی: هەرگێش مەدێ، مهیم ئەوەیە ئیشی توو پێکبێ، بەس مام ڕەسور لەمن توڕە نەبی، ئەویدی هەمووی فشەیە، تاقەتی پرتەو بۆرەی ویم نیە! گۆتم: مام ڕەسور پیاوەکی گەلە چاکە، پیاوی ڕۆژی تەنگانەیە، گۆتی: ڕاست دەکەی، بیست و پێنج سارە جیرانین هەتا ئێستا بایی سەری دەرزی درمان لێکدی نەهێشایە!
هەر چارێگەکی پێچوو، قریاقۆس بە دەستە چەپ لە ڕێیەکەی لایداو چووە ناو داروبارەکی چڕ، بڕەکی ڕۆیی و ڕایگرت، جامی جێبی پێوەداو گۆتی: یاڵلا با بە پێیان بڕۆین، ئیدی لە جێبەکەی هاتینە خوارێ و دەستم دا جانتایەکەیی و بەملم وەکرد و کەتمە دوو قریاقۆسی، دەوری شەش حەفت دەقەکی ڕۆیشتین کابرایەک لەوسەری هاواری کرد: ڕاوەستن نەبزوون! قریاقۆس گۆتی: خۆمانین! کابرا گۆتی: خۆتان کێنە؟ قریاقۆس گۆتی: خۆمانین، سەفینە شێتێ خۆشناوان! کابرا گۆتی: دە وەرن وەرن، یاخوا بەخێربێن! هەندەی نەبرد دوو سێ زەلام پەیدابوون، سەلاممان کرد و چاک و چۆنیان لەگەر کردین، قریاقۆس گۆتی: کاکە ئەوجە ئەمن دەڕۆم، ئەو جاحێرەی تەسلیمینگۆ دەکەم و بیبەنە جێی مەبەست، گۆتیان: مەڕۆ، پارە نانەکمان لەگەر بخۆ، گۆتی: مەمنون دەڕۆم، نەکوو کەمین و شتیان لەڕێیێ دانابی، با زوو بگەڕێمەوە هەتا تووشی کێشە نەبم، دۆقەم لەگەر کردو زۆر مەمنونی بووم و خواحافیزیم لێکرد و ڕۆیی، ئەو ڕۆیشت و ئەمن لەگەرەوان مامەوە، گۆتیان: پێدەچی برسی بی، دانیشە پارووە نانەکی دەخۆین و بەو هەسپانە دەڕۆین! گۆتم: کووتان پێباشە وادەکەین!
نانمان خواردو پەرداغە چایەکم لەسەر کرد، گۆتیان: دەوجە بابڕۆین، ئەتوو بەمە برێ، قەت سواری هەسپی بووی؟ گۆتم: ناوەڵلا، گۆتیان: مەعنای سوار نی؟ گۆتم: نەخێر! گۆتیان: مادام وەیە دەبی هێواش بڕۆین، ئەتوو لەوچیایەی لە هەسپی بەرببیەوە هەپڕون بە هەپڕون دەبی! ئەوان وەکی ئەو قسەیان کرد زەندەقم چوو، گۆتم: دیارە ڕێیەکە زۆر سەختە؟ گۆتیان: تەماشا ئەو توولە ڕێیە باریکەی بکە لە قەدی چیای، دەبی بەوێ هەرگەڕێین و ئاودیوو بین، دوعاش بکە، جاش و عەسکەر یان کۆپتەر و تەیارەمان لێ پەیدا نەبی، گۆتم: دیارە زۆر خەتەرە؟ ئێکیان گۆتی: پێشی سواری هەسپی بی شهادەکی بەهەق بینە! گۆتم: بابە یەکجار ئەوهاش زەندەقم مەبەن! گۆتیان: وەڵلا لۆیێ پێت دەرێین، وەبی دوایێ گلەیی نەکەی!
گۆتم: خوا کەریمە، ئیشاڵلا بە سەلامەتی دەگەین، گۆتیان: دە مادام وەیە سواری ئەو هەسپەی بە! جانتام لە ملم گیر کرد و چووم سواری هەسپەکەی بووم، ئێکیان جرەوی هەسپەکەی لێ وەرگرتم و ڕایکێشا، ئەوانیدیش سواری هەسپیبوون، گۆتمە کابرای: جرەوەکەی بدە من و ئەتووش سواری هەسپەکەت بە، گۆتی: جارێ، با ئەتوو بڕەک لێڕابێی ئەوجە، گۆتم: باشە، کووت پێباشە با ئەوهابی، بەناو داروبارە درێژو چڕەکان شۆڕبووینەوە و ماوەکی باش ڕۆیشتین، باشبوو ڕێیەکە سەلامەت بوو، دنیاش کش و مات بوو، ئێکیان گۆتیە من: هەر دەنگی تەیارەی یان کۆپتەری هات، خۆت لە هەسپی فڕێدە و دوور کەوەو خۆت بە عاردی دادە، ئێرە هەمووی مەحزور ئیداریەو قەدەغەیە نە بنیادەم نە ڕەشەوراغی پێدابێ، ڕۆژی دوو جار سێ جار کۆپتەر بەو ناوەی دادێ، گۆتم: ئیشاڵلا ئەوڕۆ بەختمان هەیە و نایێن! گۆتی: خوا بە زارت دابڕۆنی، بەس ئەتوو پێمبرێ خێرە دەتەوێ ئاودیوو بی، کێشەت چیە؟ گۆتم: دەمەوێ بچمە دەرێ و بخینم، حەز دەکەم شهادەکی گەورە بینمەوە، گۆتی: کێشەت لەگەر کەس نیە؟ گۆتم: نەخێر، ئەمن پیاوەکی سەلامەتم و هەتا ئێستا هێلانەی پەڕەسێلکەکیشم تێک نەدایە! کابرا هەر دەیوویست بیباتەوە سەر باری سیاسی و ئەمنیش هەر لەخۆمەوە خۆم لەو مەسەلەی دوور دێخستەوە!
وەختەکی گێمان لە گڕەگڕی کۆپتەری بوو، گۆتیان: خۆ هەردەن و لەو هەسپانە دوورکەونەوە، بەتووندی خۆم فڕێدا و بەینەکی باش دوورکەتمەوە، ئەوجە خۆم بەعاردی وەناو لەناو چڕە داران خۆم مات کرد، کۆپتەر بەینەکی باش گەڕاو دوایێ هێدی هێدی دەنگەکەی دوور کەتەوەو نەما، ئێکەک گۆتی: هەستنەوە بابڕۆین، کۆپتەرەکە ڕۆیی، هەستاینەوەو سواری هەسپی بووینەوە، کابرای جرەوی هەسپی منی گرتبوو، گۆتی: تەواو، ئەتوو لێڕاهاتی، بەخۆت جرەوی هەسپەکەی بگرە، ئیدی چوو سواری هەسپەکەی خۆی بوو، ئەمن لەبەینی وان دەڕۆیشتم، دەستی ڕاستەم لە زینی هەسپەکەی گیر کردبوو، چونکە یەکەم جارم بوو سواری هەسپی بم، نەدەوێرام بەتەواوی دەست لە زینی بەردەم و بەس جرەوەکەی بگرم، بەینەکی باش ڕۆیشتین و گەیشتینە ئەو توولە ڕێیە سەختە باریکەی بە چیای هەردەگەڕا، ئەوەی لە پێشەوە بوو، گۆتیە من: دەوجە وریای خۆت بە، لێرەوە ناخۆشی دەست پێدەکا، کە بەسەکەتین، نەکەی ئاوڕ بدەیەوە پشتەوە، یان تەماشای خوارەوەی خۆت بکەی، نەکوو بترسێیی و سەرت بسوڕێ، ئاگاشت لێبی هەسپەکە هەست نەکا ئەتوو دەترسێی، ئەگەر هەست پێبکا، لەوانەیە فڕێت بداو لە چیای هەردێرێی! ئەمن لەگەر ئەو قسانە بە تەواوی هەناوم پساو ترس سەرتاپای لەشی داپۆشیم، دەموویست بەسەرخۆم نەینم و خۆم وا پیشان دەم ناترسێم، لۆیێ گۆتم: سوار هەتا نەگلێ نابێ بەسوار! ئێکیان گۆتی: ئەوەت لە مەتکەبێ خیندیە؟ گۆتم: بەرێ! گۆتی: کاکۆکە، ئەوەی دێتە پێشت گلان نیە، هەردێرانە، هەردێران یەعنی تەفروتونا بوون، یاڵلا با بڕۆین! ئیدی ناوی خوامان هینا و بەڕێکەتین!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!