فەرمانگەی پەیوەندییەکانی دەرەوەی ئیدارەی خۆبەڕێوبەریی باکوور و ڕۆژهەڵاتی سوریا بە پێی بەڵگەنامەیەکی فەرمی 42 ژن و 104 منداڵی لە بنەماڵەی چەتەکانی داعش ڕادەستی تاجیکستان دەکاتەوە.
شاندێکی دەوڵەتی تاجیکستان بە نوێنەرایەتی زەبیدوڵڵا زابیدۆڤ باڵیۆزی ئەو وڵاتە، سەردانی فەرمانگەی پەیوەندییەکانی دەرەوە لە ئیدارەی خۆبەڕێوبەریی باکوور و ڕۆژهەڵاتی سووریای کرد، شاندەکە لە لایەن فەنار کەعیت جێگری سەرۆکی بەشی پەیوەندییەکانی دەرەوە لە ئیدارەی خۆبەڕێوبەریی و خالید ئیبراهیم ئەندامی دەستەی کارگێڕیی بەشەکە پێشوازییان لێکرا.
دوای گفتوگۆکان بەڵگەنامەی فەرمی بۆ ڕادەستکردنەوەی 42 ژن و 104 منداڵی چەتەکانی داعش، کە خاوەنی ڕەگەزنامەی تاجیکن و نیشتەجێن لە کەمپەکانی ڕۆژ و هۆڵ، لە نێوان هەردوولا واژۆ کرا.
دوای واژۆکردنی بەڵگەنامەکە، کۆنگرەیەکی ڕۆژنامەوانی سازکرا، لە سەرەتاوە جێگری سەرۆکی بەشی پەیوەندییەکانی دەرەوەی باکوور و ڕۆژهەڵاتی سوریا، سوپاسی هەوڵەکانی تاجیکستانی کرد بۆ پەیوەندیکردن بە ئیدارەی خۆبەڕێوبەرییەوە و لێکتێگەیشتن لەسەر ڕادەستکردنی ژن و منداڵی داعش.
سەبارەت بە ناوەڕۆکی کۆبوونەوەکە، فەنار کەعیت لە درێژەی قسەکانیدا وتی: لە میانی کۆبوونەوەکەدا دۆخی سووریا بە گشتی و مەترسییەکانی بەردەم باکوور و ڕۆژهەڵاتی سوریا تاوتوێ کراون.
لە بەرامبەردا، باڵیۆزی تاجیکستان دووپاتیکردەوە؛ بەردەوام دەبن لە کارکردن بۆ گەڕاندنەوەی ژنان و منداڵانی داعش کە هەڵگری ڕەگەزنامەی وڵاتەکەیانن و لە کۆتاییشدا باڵیۆزی تاجیکستان سوپاسی ئیدارەی خۆبەڕێوبەریی کرد بۆ هاوکاریکردنیان لە دۆسیەی گەڕاندنەوەی بنەماڵەی چەتەکانی داعش، وتیشی: لە ماوەیەکی دیاریکراودا ڕێوشوێنەکان بۆ گەڕاندنەوە و جێبەجێکردنی ئەم بەڵگەنامەیە دەگرینەبەر.[1]
This item has been written in (کوردیی ناوەڕاست) language, click on icon
![](https://www.kurdipedia.org/images/flags/ku.png)
to open the item in the original language!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
This item has been viewed 1,220 times
Write your comment about this item!