دلۆڤان هالۆ/ زاخۆ
شاعرێ مەزن یێ کورد (فەقیێ تەیران)، د کۆپلا (27)ێ دا ژ شعرا خوە یا ب ناڤێ (ئیرۆ ژ دەست حوسنا حەبیب) دبێژیت:
خوزی من سەد سەر هەبانا
سەد هزار دەڤ پێڤەبانا
ئه و هەموو ل مەدحێ تەبانا
هێژ ب وان نوقصانم ئەز
(فەقیێ تەیران) ئەڤ کۆپلە شعرە ب شێوەیەکێ جوان و ڕەهوان، و ب زمانەکێ سادە و سڤک نڤیسیە، کو دەمێ خواندەڤان ڤێ کۆپلە شعرێ دخوونیت، چێژەکا تایبەت ژێ وەردگریت، و هەر ئێکسەر و ب ساناهی ژ بەر دکەت و دمینیتە د بیردانکا وی دا، چەند دوبارە ژی بخوونیت، هەمان چێژا خواندنا جار ئێکێ ژێ دبینیت.
هەکە (فەقیێ تەیران) ب ئێک سەر و ب ئێک دەڤ، کۆپلە شعرەکا ب ڤی شێوەیی ئاست بلند نڤیسیبیت، و تێدا ب جوانترین شێوە پەسنا خودێ کربیت، لێ هەکە وی ب زانین و تێگەهشتنا مێشکێ سەد سەران، و ب ڕەوانبێژیا سەد هزار دەڤان.
ئەرێ دا کۆپلە شعرەکا چاوا نڤیسیت؟!، و دا ب چ شێوە تێدا پەسنا خودێ کەت؟!، و هەکە پەسنا (فەقیێ تەیران) بۆ خودێ هەتا ڤی ئاستی یا بلند و مەزن بوو، ئەرێ حەز ژێکرنا وی بۆ خودێ ل چ ئاست بوو؟!.
سەرەڕایی حنێرا (فەقیێ تەیران) د ڤێ کۆپلە شعرێ دا، دانپێدانێ ب وێ چەندێ دکەت، کو هەکە وی سەد سەر هەبان و سەد هزار دەڤ پێڤە بان، و هەمی د خزمەتا پەسنا خودێ دا بان، ژ دەرهەق پەسنا خودێ نە دەردکەڤت، و دا هەر کێماسی ل دەڤ هەبن، و نە د شیا وەکو پێدڤی پەسنا خودێ بکەت.
ژێدەرێ کۆپلە شعرێ:
سەعید دێرەشی، دیوانا (فەقیێ تەیران)، ژ وەشانێن دەزگەهێ سپیرێز، چاپخانا وەزارەتا پەروەردێ، هەولێر، 2005، لاپەڕە 87.[1]
Kurdipedia is not responsible for the content of this item. We recorded it for archival purposes.
This item has been written in (کرمانجی) language, click on icon
to open the item in the original language!
ئەڤ بابەت ب زمانا (کرمانجی) هاتیە نڤیساندن، کلیک ل ئایکۆنا
بکە ژ بو ڤەکرنا ڤی بابەتی ب ڤی زمانا کو پی هاتیە نڤیساندن!
This item has been viewed 883 times
Write your comment about this item!