داستانۊ شېخی سەنعانی
بەشۍ دەهەمە
دمای تەسلیم بیەی شېخی سەنعانی بە عەشقو تەرسای گاۋرۍ، دمای ڕازی بیەیش بە شەرتەکاش، ئیتر موریدەکېش حاڵشا کەوت حەلوەلاو پەناشا بەردە وەردەمو شېخی پەی چڵاکنارەیش چا عەشقە شېتەیە هەکە گیرۊڎەش بیەن و گېڵنایۆش پەی سەروو ڕای ڕاسۍ.
بەڵام شېخی سەنعان پەیتواچو گردیشان مڎۊوەو ماچۊ: من تازە جە دین و خوڎاو ڕەسولی ۋیەردەناو ڕووم جە بتیەن. واتشان پەنە ۋیرۍ جەحەڼەمی کەرۆ، واتش من ئایېرێ جە دەروونمەنە خېزیان جەحەڼەمێن پەی وېش.
موریدان تەمام ئامان بە فریاد
واتشان: ئەی شېخ ساحیب کەرامات
خوڎا خەیرت دۊ، ئینە جە فیکرەن
هۊرېزە، بشین، یە واڎەی زیکرەن
وات بە موریدان: پاسە بییەن کار
هۊرگەردم نییەن، نە پای قەسری یار
ئەر دولبەر کۊرەن، منیچ هەم کۊرم
وەس بدەن ئازار، هەم جەفاو جەورم
یەکێ وات: ئەی شېخ هەر ڕیسوا مەبی
پەی دییەن، دولبەر بە تەرسا مەبی
وات: دینی تەرسا کەردەنم قبووڵ
ویەردم جە دین خوڎا و هەم ڕەسوول
یەکێ وات، ئەی شېخ، مەر نمەزانی
ئیمان مەورەشیی، زیننار مەسانی
وات: ئەو ڕۊ جە دین، ئیمان ویەردم
دڵ بە غەمزەو ناز دولبەر، سوپەردم
یەکێ وات: ئەی شېخ دوزەخ نە ڕاتەن
هۊرېزە بشین، وادەی سەڵاتەن
واتش: جە ئاهم، ئاهېر مەخېزۊ
شەرارەی دوزەخ، جە من مەبېزۊ
یەکێ وات: ئەی شېخ خوڎات شی جە ویر
ماییل بیت وە دین، ئەو تەرسای بۍ پیر
واتش: خوڎای من، دییەن دولبەرەن
ئیمانم جە لای ماهی ئەنوەرەن
یەکێ وات: یەکسەر خودات شی جە یاد
نییەنی نە فیکر وېرد و تەسبیحات
وات: تەسبیحاتم، ئەو ڕۊ شی نە مشت
یاوام وە قاپی کلېسا و کەنیشت
ئەو ڕۊ بەر کەردم، هەوای تەسبیحات
جە کەعبەی شەریف ئامام بەی وەڵات
یەکێ وات ئەی شېخ کەراماتت کۊن
خوفی ڕای سیرات، مەکافاتت کۊن
وات: جە مەکافات من نەداروون باک
بېزارم جە دین پادشای لەولاک
یەکێ وات: واڎەی ئەڵڵا و ئەکبەرەن
واتش: ئەکبەرم، دییەن دولبەرەن
یەکێ وات: عیلمت یەکسەر شی جە یاڎ
واتش: نە ڕای دۊس، هەرچی بادا باد
یەکێ وات: ئەی شېخ واڎەی نمازەن
یە، واڎەی سوجدەی، ئەو بۍ نیازەن
واتش: من سوجدەم وە بت ئاوەردەن
تەرکی تەمامی مەقسوودم کەردەن
یەکێ وات: ئەی شېخ یە وادەی زیکرەن
بکەر ئیستیغفار ئینە چە فیکرەن
وات: کوورەی زیکرم چەنگ و ڕوبابەن
ئیستیغفاری من، شیشەی شەرابەن
موریدان زانان حاڵش پەشېوەن
واتەن: بە تاقیی یە کاری دېوەن
یەکسەر ڕوو کەردن بە کەعبەی موراد
واتشان؛ ئەی شېخ بنیشە وە شاد.[1]