داستانۊ شېخی سەنعانی
بەشۊ شاڼزەهەمۍ

موریدەکۍ شېخی سەنعانی بۍ ئومېڎۍ بیۍ، نەتاواشا قەناعەت بە شېخی کەران پەی وازئاردەی جە ئایینو بت پەرەسی و گېڵنایۆش پەی سەرو ڕای ڕاسۍ. ئیتر موریدەکۍ هەریۊشا لاو وېشۆ بڕیارشدا بلۊ پەی شارێ دووری پەی لاو پیا خاسێ، بە نیەتو نزاکەردەی پەی شېخی و هیدایەت دایش جە لاو خوڎای گۆرەیۆ.[1]

موریدان واتەن، نمەبۊ، ئەو ڕام
تەن کەردەن، ئامانج، تیر و تانەی عام
واتەن سەعیمان، گردین بیی بەتاڵ
مەر زاتی بۍ میسل، دانای لا یەزاڵ
باوەرۊش، وە سەر، ڕاگەی ڕاهی ڕاس
هۊڕگېڵۊ جە دین تەرسای هەقق نەناس
شامڵ بۊ، پەرېش لوتفی سوبحانی
بەربشۊ جە دام، ڕاگەی شەیتانی
وەرنە ڕاگەی چەفت، گېرتەنش نە وەر
نییەن هۊڕگېڵایش، جە دینی دولبەر
چوون ئاما بە هۊش، بانگش نەوەر دا
خاکی ڕووی زەمین، کەردش بە سەردا
یەکێ وات: بە لوتف پادشای سوبحان
مەشوون بە خدمەت، ئاغای خوراسان
یەکێ وات بە زات دەهەندەی داوەر
ڕاگەی شاری ڕوم، مەگېروو نە وەر
یەکێ وات: جە دەست تانەی مەناومین
منیچ تا مەشوون، بە شاری غەزنەین
یەکێ وات: یاران، ئەمجار بە تاقی
مەشوون بە ڕاگەی شیروان شماقی
یەکێ وات: جە دەست تانەی کەشیشان
مدارام نییەن، تا وە کرماشان
یەکێ وات: مەشوون، تا وە شاری فارس
مەوینوون وە چەم، یاوەرانی خاس
یەکێ وات: مەشوون تا بە ئەسفەهان
پەنا مەبەروون، بە زاتی سوبحان
یەکێ وات: مەشوون تا شاری بەغداد
چېگە مەنیشوو، هەرچی بادا، باد
یەکێ وات: یاران ئەمجار بە زەروور
مەبۊ من بشوون، تا بە نەیشاپوور
یەکێ وات: جە دەس شېخی موشەوەش
مەشۊ، تا بە شار چین و هەم حەبەش
یەکێ وات: مەشوو، تا بە سەبزەوار
جە تاو و تانەی ئەی قەومی کوففار
ئەلقیسە یاران هەر یەک بە شارێ
هەر یەک ڕوو کەردەن، بە سەر دیارێ.[1]