پیری کەردەوە، پیری کەردەوە
پیری دەریچەی زەحمەت کەردەوە
شەمع شادیبەخش، دڵ جە پەردەوە
بە تەئشیر تۆف، جەورت بەردەوە
فام جە فەرقم بەرد، ئاسار فەزیلەت
نەغزم نەحس کەرد، وە ئەسڵ وەسڵت
شەهباڵ شادیم جە ڕیشە کەندی
ئەسباب هەستیم جە دەستم سەندی
بە سەرووی غارەت، خێڵخانەی شەوقم
شێونای بیسات بەزمئارای زەوقم
دیدەی جەهانبین، جیسم ئەعزەمم
ئەڵماسی ئیشفاق، بینایی چەمم
دوو فەرسەنگ وەحشی مەد، بشی هووەیدا
موندەلی شەخم، مەکەرد پێدا
تۆ کێشای تێشان پەردەی تار و تەم
کێو چون خاشەنی، شی نمیۆم وە چەم
خوردە بێنی عەقڵ، زیادەی هۆشم
خەوواس دەروون، تیز گۆشی گۆشم
شنۆی ڕێزەی ڕاز، نەرمی نیهانی
مەیاوا وە گۆش نێک مەیدانی
فەسڵی سەدای زوڵم تۆم یاوا بە گۆش
گۆشم کەرد ئەترۆش، هۆشم فەرامۆش
ئیسە ناڵەی هۆر، ڕێژانی ڕەحمەت
مەسمووعم نییەن، مەکەرۆ زەحمەت
سی و دوو گەوهەر، مرواری پاکم
لولوئی لەززەتبەخش، خورد و خۆراکم
یەکێ جە عوسرەت نەمەندەن لێشان
جە تەرسی ئێشان، وە گازم کێشان
دنیای ڕۆشن لێم کەردی بە زندان
یاگە و نەدانم، بییەن وە دندان
زانووم زەبوون کەفت، دوور کەردم وە سەر
بار لاشەی تەن، سپەردم وە سەر
قامەت بی وە قەوس، شکەستەی بێفەڕ
...........................................!
خاترم غەڵتان، خەلیدەی خارەن
یە گشت جەور تۆن، وە دووشم بارەن
کافر مەر نەدیت، عەهد جەوانیم؟
خەزێنەی خاتر گەنج نیهانیم
خرووج توغیان جۆشەن جەوانیم
جە بەحر دەروون، گەوهەرئەفشانیم
هۆشم، تەدبیرم، کەماڵم، فامم
نەدیمی مەجلیس، ئاهی ئەعزامم
نازک خەیاڵیم، تێغی زوانم
ئیخڵاس خوتوور، حاتەمی خوانم
ئەرکان و ئەدەب، ئاداب تەورم
دەرک باڵای دەرک، مەدەرکان بەورم
حیلمیی حاڵم، سافی سیفەتم
جە لای ئەهل فام، قەدر و قیمەتم
تەوانای تاقەت، فەوق کارانم
شەوق شکاران، هەردەجارانم
سەییاد سەحەر، کاو و کەشانم
عوسەیری خاتر لای مەهوەشانم
یە گشت زوڵم تۆن، وە دۆشم بەردەن
هەنێ های تف کەر، ستەم لێم کەردەن
نازداران وە لەفز، شەهد فەواکە
پێم، وە شەوق دڵ، مەواتان: کاکە
ئیستە جە دوو لەت چارەی شووم تۆ
کاکە تەخەڵڵۆس بییەن وە خاڵۆ
من سوپام شکەست، مەنسووری جە کۆن
تا کەی ئەسبئەنداز، مەکەریم جە شۆن؟
جەور تۆ سەرتیپ، تەوانام کەندەن
پارەی ئیستخوان، وە خاڵی مەندەن
ئەویچ نێش جەور، تۆ پەنەش یاوان
مەلەرزان چون تووڵ، نەتاف ئاوان
نە ئازار سنحەت، مەکەرۆت زەلیل
نە وە باد سەرد، مەشی وە تەهلیل
نمەبی عیلاج وە مەعرەکەی جەنگ
نە بە عەقڵ و هۆش، تەدبیر و فەرهەنگ
نە قۆشەنت هەن، نە زۆر شمشیر
سەوای نەکەرۆ دام، تەلبیس تەزویر
بێ تەعب و تەسریع، ڕەزم هەنگامە
دەور مەدەر چون دوور، چەنی دێوجامە
خەلایق حەیران، ڕەنگ دێوجامەن
عاقیبەت پاشان، مەحبووسی دامەن
داخم ئەو داخەن، عەدووی پێواری
من جە تۆ دیار، تۆ لێم نادیاری
ئەر ماما سنحەت، وە دەستم جاری
پەی جەمع مەخلووق، مەکەردم کاری
چون خەتاکاران ڕەجمت مەکەردم
پەی ڕاحەتی وێم، خەڵاس مەردم
جە ئێد مەتەرسۆن، ماوای سەرای سەنگ
ڕەفیق بای چەنیم، پەی تەزویر و ڕەنگ
ڕاگەی ڕەفیقت، نمەیۆ جە بەست
مەر مەردەن یەخەم بەر کەرۆ جە دەست
تۆ دامیار ییت، من بەند دامم
هەرتا زندە بیت، نامی جە نامم
من هەر زەلیل زەدەی زام تۆم
خەریک پابەست، حەڵقەی دام تۆم
ئیحیای کولل نەفەس، جە شاه و دەروێش
هەرکەس نێش تەلم، تۆش دیتی بە وێش
ئیختیار وێش، بە وێش نەمەندەن
عەقڵ و هۆش یەکسەر جە دەستش سەندەن
غولوو سەر کەردەن، جە بیاوانان
مەنشوور نامەی جەورت مەوانان
نەهەنگان مەجەر، شێران جە هامۆن
ئینتیهاش زەلیل، حەڵقەی دام تۆن
هەزاران عوسرەت نیگاهشانەن
هەزار چون شەفیع، غوڵامشانەن
$وەڵامی خانا بۆ میرزا شەفیع$
میرزام جە پیری، میرزام جە پیری
پەی چێش سکاڵات بەرزەن جە پیری
نیسبەت زوڵمەت دای، بە نام پیری
ئەعلا مەقامەن، مەقام پیری
هەرچەند کە پایەی پیری زەحمەتەن
ئەمانەتبەخشی مایەی ڕەحمەتەن
بە قەوڵ بەدان، هەرزەی زەمانە
خاترت خەمەن، لێت مەدان تانە
وەی تەورە ئەدووی جە زوڵم پیری
میرزام تۆ زانا و ساحێب تەدبیری
ساحێب فام و فەزڵ، دانا و هوشیاری
بە عەقڵ و ئەدەب، جە عام دیاری
بشۆ وەفام دا، دەورەی پێشینان
تاریخ و کردار، ئەو نازک بینان
باوەر بە نەزەر ئادەم تا خاتەم
جە فەزڵ پیری خاتر بکەر جەم
ئەر پیری عەیبەن زات زولجەلال
ئادەم و حەوا بێ حوزن و مەلال
ویاران دەوران زیندەگی فاخر
هەزار ساڵ تەمام، ئەوەڵ تا ئاخر
هەم حەزرەتی نووح هەزار ساڵ تەمام
نەبوەتش کەردەن، بە سەد ئیهتمام
ئیبراهیم خەلیل، جەی دنیای فانی
وە پیری بەرشی ، تۆ وێت مەزانی
وەڕیش سفید ئیفتیخار کەردەن
لەقەب شێخولئەنبیا بەردەن
ئیسحاق و یەعقووب، هەر دوو تەمام پیر
دوو بابۆ و فەرزەند، شێخان کەبیر
تا چەن پێغەمبەر وە پیری مەردەن
تەشریف وە بەهەشت هەشتۆمین بەردەن
مەجلیس شاهان بێ پیر نمەبۆ
پێشڕەفت ئوموور، تەدبیر نمەبۆ
سالیکان ڕای خوواپەرەستی
ڕاهنمای سیڕات ڕاستی و دروستی
کەردەن ئیختیار لەقەب پیری
تۆ پەی چێش جە دەس پیری زویری
کاوەی ئاهنگەر پیر ساحێب فەڕ
وە تەدبیر ئاوەرد ، فەرەیدوون فەڕ
زاڵ سام یەڵ تەدبیر شاهان
کەیانی بەو پەی حوشمەت پەناهان
خسووس پەی ڕۆستەم شای نامئاوەران
نە جەنگ هەفت خوان ڕای مازیندەران
هەم پەرێ نەبەرد ، شای ئەسفەندیار
غاڵب بی بە قەوڵ ، ئەو مەرد هۆشیار
جە تووران پیران ، پیر خیرەدمەند
بە تەدبیر سوپای ئێران جە بن کەند
ئاسەف دەوران پیر ساحێب دین
وە تەدبیر ئەو پەیدا بی نگین
ئەوسا سولەیمان بێ خۆف و ئەندێش
سەخری جینیش کوشت، نیشت نە تەخت وێش
عەدڵ نەوشیروان ، جە عام مەشهوورەن
هەرچەن کافر بی ، گوناش مەغفوورەن
سەبەبش تەدبیر ئەبووزەڕ جە میر
مەشهوورەن نە عام ، چون ماه مونیر
پیری ڕاهنوما ڕاگەی دینتەن
پیری ئابڕووی سەرزەمینتەن
پیری ڕای بەدی قبووڵ نەکەردەن
ڕاهنمایی حەقق تا وە ڕۆی مەردەن
پیری هەر بە لوتف خاسەی ئیلاهین
نەک بە زۆر و زەڕ خاترخواهین
کەوا بوو ئەو پیر ، حەقیقەت پیر بۆ
واتەش وێنەی نەقش نە دڵ جاگیر بۆ
بەو شەرتە پیری عاقیبەت خەیر بۆ
ڕووی قەلبش وە لای سلووکی سەیر بۆ
تۆ وێت جە پیری ئەفزەڵ و ئەدەب
بە دەست ئاوەردی شەخسێ موئەددەب
جەوانی چێشەن ؟ تۆ وێت مەزانی
مەگێرۆ نەوەر ڕاگەی نادانی
ڕەند و عاشقی مەستی و مەغرووری
دەردی مەعسییەت ، جە خوا دووری
جە ڕای ئاخیرەت مەست و بێ خەبەر
ڕای ئاشووب و شەڕ گرتەنش نەوەر
شەفیع شیفتە، برای هامفەردم
گۆش دەر وە موفاد خاتیمەی دەردم
حەیفەن پەی تۆ چون ، زی فەزڵ فەزڵان
حەزین بۆ جە دەس بەعزێ بەدئەسڵان
خانا چون تۆ پیر ، تۆ پیر چون خانا
هەر دوو خاک پای پیران دانا
#خانای قوبادی# [1]