ڕاوی جە ڕاوی سەندەن ڕیوایەت
جە زەننوون میسر نەقڵەن حیکایەت
ئەو قوتب ئەییام سالیک ئیرشاد
مەدفوونەن زاتش نە شەهر بەغداد
جە سەدر مەحفەل جە خانەقای وێش
مەشغووڵ بی بە زیکر موعیزەی پڕ نێش
دڵ نە تەجەللای عەرش ڕەحمانی
جە مەقام عیشق کەرد ڕەوزەخوانی
فەرماش: چون کەردم ئیرادەی حیجاز
پەرێ حەرەمەین قەسدم کەرد ئاغاز
ئەسباب تەریق چون بی موهەییا
پەی تەواف بەیت ڕاهی بیم نە ڕا
دمای عەرەفە نە شەهر مینا
هەم زەبیح و هەم ڕەجم ئیبلیس بی ئەدا
جە «بيت الحرام» تەواف بی تەکمیل
دیم نە حوجرەی باب یەک خەستەی زەلیل
سەیر کەردم جە بەین ئەو شەخس بیمار
کەشف ئەحواڵش وەنەم بی ئیجبار
مەگەس نە دەورەی دیدەش بییەن کوو
چەنی هەر نەفەس مەوانۆ: «يا هوو»
نیشتم جە بالین ئەو مەرد بیمار
مەگەسان نە دەور دیدەش کەردم تار
عەینەین شەهلا ناکا کەرد گوشاد
وات: یا هوو جە دەست کێ کەروون فەریاد
فاعیل زەننوونەن یا جە موحەڕڕیک
نە چێش بی مەگەس جە من بین تەریک
واتم: زاهیرەن من بیم بە فاعیل
بەڵکی بە سەواب یەزدان بام نائیل
ئەو واتش: حەزرەت ئەییووب نەبی
چون بی بە عیللەی «صواب مستولی»
ئەییام مەدید مەجرووح بیمار
نە زەخمش هەر کرم مەڕێزا بە وار
جە ناڕەزای حەق مەکەردش ئەندێش
«محفوظاً» ئەو کرم مەنیا بە جای وێش
مەواتش ئەی کرم جە باب یەزدان
جە گۆشت و خوونم ڕزق بە ئەو عەتان
ئەگەر جە زەخم بڕێزۆ بە خاک
بێ چارە نە تاب جووع مەبۆ هیلاک
ئاب دیدەی من پەرێ مەگەسان
ڕەززاق عالەم کەردەنش عەیان
قەبووڵم نییەن ئەی مەرد مەغفوور
هەنی مەگەسان جە من کەری دوور
پەرسام: نامت چێش؟ ئەسڵت تۆ جە کوون؟
فەرماش: ئەسڵ و ئیسم، ڕەسم من جە «هوو» ن
ئەر ئەسڵ و ئیسم مەپرسی جە «هوو» ؟
مەر ئەوسا ئەخبار مەعلووم بۆ جە توو
واتم: من هێمان نەیاوام بەو جا
تەڵەب کەم ئەخبار جە زات «الله»
فەرماش: لەب خوشک من بە حاجەت ئار
جە زات مەعبوود مەشنەوی ئەخبار
دەست جە بان دەست چون کەردم قیام
ڕاست کەردم بە حەق زەنجیرەی ئیفهام
عەرز کەردم نیاز بە «رب العزة»
خوشکیی لەبانش کەردم بە حاجەت
عەرز کەردم یا ڕەبب هەر تۆی ئاگادار
بەیان کەر هەم ئەسڵ هەم ئیسم بیمار
ناگا یەک هاتیف بەدڵ کەرد نیگا
بەخشا لەزائیز بە جەمع ئەعزا
ئەمرش کەرد: زەننوون! ئاگا بەر نە کار
سادق عیشقەن ئەو مەرد بیمار
ئیسم و ڕەسمشان نەیجا مەسبووقەن
سیڕڕ عاشقان جە لای مەعشووقەن
نەودما بیمار فەرما هەی زەننوون!
باوەر جام ئاب بێ سەبر و سکوون
هەفت ساڵەن تەمام نەفس نە شیتابەن
هەر ئان و زەمان ئارەزووش ئابەن
جە بیم مەعشووق دانای یەگانە
کەردەنم مەنعش جە ئاب و دانە
ئیستە چون وەعدەی وەسڵم نەزدیکەن
باز نە ئارەزووی ئاب نە تەحریکەن
سا من پەرێ ئاب گێڵام بە شیتاب
ئاوەردم پەرێش یەک تاس پڕ ئاب
سەیر کەردم بیمار جە دار دونیا
کەردەنش ڕیحلەت پەی موڵک عوقبا
نە غوسڵ و تەکفین پەرێ ئیمدادی
لوام تا شەخسێ کەردم ئیمدادی
ئامام پەی مەییت بارداریم نە جا
دیم غائیبەن نەعش ئەو «ولی الله»
هەرچەند جە خەڵقان کەردم ئیستیفسار
هیچ کەس جەو مەییت نەبی خەبەردار
ناگاﮪ یەک هاتیف غەیبی کەرد خیتاب
فەرماش پەی مەییت مەکەر ئیزتیراب
شەهید عیشقەن ئەو مەرد عاشق
شەهیدان بە غەسڵ و کەفەن چ لایق
پەی مەرد عاشق هیچ مەکەر تەلاش
کۆﮪ مەعشووقەن مەقام مەئواش
ما هەم جە سایەی ئەو شەخس مەدفوون
دوو دەفعە شاد بیم بە سەوت بێچوون
«دەروێش» یەقینەن سەفینەی حەقیق
نییەن مافەوقش جەی بەحر عەمیق
#فەقێ قادری هەمەوەند# [1]