سەتتاری سڕپۊش
بەشۍ یەرەمە
میرزا ماچۊ: یا حەی، پەی باجەتو ئا گرد پیرا کە لوانۍ ئاستانەشا، کەردېم ڕجاکار پەی وېم، بەخشەم. میرزا پاکی و خوڎاپەرەسی پیرە خاسەکا باسکەرۊن، کە شەو و ڕۊ خەریکو ئیتاعەتی و زیکرو خوڎاپەرەسینۍ، ماچۊ: بەشکووم بەخشیم بە تۊزەو خاکو پاشان، چونکم ئاڎۍ بۍ قەولی فەرمانو تۊشان نەکەردەن.
بە حەق حەزرەت شای حیسامەدین
پیر بۍ نەزیر قیبلەگای یەقین
(تاج‌العارفین) جەمین جام نوور
مەخموور بادەی شەراب ئەنتەهوور
ئاغەی شا عەلی قوتب دەهر دوون
ڕەفیقش نېیەن جە ڕوبع مەسکوون
لازمەن نامش بکەرو تەفویز
(قەدەسەاللە‌هی سڕەتوالعزیز)
یاحەی باجەتی ئەی گشت پیرانە
ئەی گشت عەزیزان خۊش زەمیرانە
جە ڕوی ئەی دنیا تا قەدەم بەردەن
هیچکام بیۍقەوڵی ئەمرت نەکەردەن
بەحر فەیزی وېت عەتا کەرد پېشان
شاڎ بین وە شاهی مەرتەبەی وېشان
منیچ بۍ کەسم با وجوود عاسیم
ئەرسەد کە هەرگیز نېیەن خەلاسیم
بەڵام دیڎە و ڕۊح هەر ها جە لاشان
بۊ بەخشەم وە تۊز خاشاک پاشان
ساچوون بۍ ڕەحمی جە لای تۊ دوورەن
شوکر یا ڕەحیم نامت غەفوورەن
من عەبدی کەم فام دېوانەی سەرچڵ
تۊ خواجەی قەدیم پادشای عادڵ
من ئیقرارم هەن وە بەدکاری وېم
وەبۍ ئەمری تۊ و بەڎ ئەتواری وېم
تۊ گونا ئامورز ڕەندان مەی نۊش
کەریم کارساز ستار سڕپۊش
من بۍحەیا و شەرم، شووم سەنگی بار
تۊ ساحیب فەرەج، کەرەم بۍشمار
هەرچن جە تاوان بارخانەم بېشۊن
ئومېڎم بە لوتف عەفوی عەتای تۊن
فدات بام (قادر) قودرەت بۍ سامان
(قادر) بېکەسەن بدەرەش ئامان.[1]