یاسێ بنەڕەتیەکۍ چاپەمەنی
بەشۍ: دوەمە
9- پارێزنای شکۆ و ئاوڕوو تاکی
ڕایاونەر مشۊ پابەنڎوو یاساو ڕایاونای و ھەرپاسە یاساو مافوو لەکەدار نەکەردەی شکۆ و ئاوڕوو تاکیبۊ و جە نویسایەکاشەنە نە بە واتێ و نە بە وێنە ئی مافیە لەکەدار نەکەرۊ و ئەوپەڕوو ھەوڵیش بڎۆ کە پارێزنۊش.
10- ئایین، جەھان وینی، داب و نەریت
ڕایاونەر مشۊ جە ھەرمانەی ڕایاونەریشەنە وېش جە زامڎارکەردەی و سووکایەتی (تحقیر) باوەڕی ئایینی، جەھان وینی شەخسی و داب و نەرێتی کۊمەڵایەتی تاکی وکۊمەڵی پارێزنۆ.
11- ڕاپۆرتی هەستیار و پارێزنای گەنج و زاڕۆی
ڕایاونەر مشۊ جە وەڵاوکەردەی ناوەرپەرسانەو ڕاپۆرتێ هەستیارێ، پیسەو نیشاندای زەبر و زۊری و کوشت و بڕی، دوورەپەرېزی کەرۊ و ڕېز جە یاساو زاڕۆپارێزی گېرۆ و ئی یاسایە بی ئی لاو ئۆ لا بەرۆ ڕاوە.
12- جیاوازی وستەی (تبعیض)
دەمودەسگای ڕایاونەر بەهیچ شێوازێو پەیش نېیەن جیاوازی وزۆ بەینوو مرۊڤەکا بە بونەو جیاوازی ڕەگەزی (نېر و ما) و یان جیاوازی ئایینی، نەتەوەیی، پاگەی کۊمەڵایەتی، سەقەت و ساقی جەسەیی و ڕەوانی.
13- بێتاوانی وەڵ جە بڕیاری دادوەری
هیچ لایەنێو مافوو ئانەیشە نېیەن کەسېوە وەڵ جە بڕیاریوو دادگای بە تاوانبار بڎۆ قەڵەم و چی بارەوە ھەواڵێو پەشتراسنەکریا وەڵاو کەرۊوە. گرد دەسگایە ڕایاونەرە مشۊ پابەنڎوو ئی یاسایە بۊ.
14- ڕاپۆرتی پزشکی
پەی وەڵاو کەردەیەو ھەواڵی پزشکی (چارەسەری و دەواو دەرمان) مشۊ وێپاریزی جە وەڵاو کەردەیەو ئا ھەواڵا کریۆ کە واڎە و بەڵېنی وەڵوەخت، ناڕاس و ناتەمام بە خەڵکی مڎا. ھەر ھەواڵێو پزشکی ناتەمام کە گنۆ وەڵێ کۆتایی پەیجۊری پزشکی، بۊ بە ھۆکاروو ھێوایەو بۍ بنەمای و یان تۆقنای خەڵکانێو کە پەیوازشا بە چارەسەری ھەن.
15- قازانجوازی (سودجویی)
هەر قازانجوازیەو، پېسەو ڕشفەت گېرتەی کەبۊ بایسوو بڕیارفاڕای ڕایاونەری بە قازانجوو ڕشفەتدەری، چەنی یاسا بنەڕەتیەکاو ڕایاونای یۆی نمەگېرۆوە و وەربەسەن. هەرکەس بە تەماعەو ڕشفەتگېرتەی وېش جە وەڵاوکەردەی ڕاسیەکا پارێزنۆ، وېش جە بێلایەن بېیەی و ئازاڎی بڕیاردای ڕایاونەری لادان و شایانوو هەرمانکەردەی چی دەسگاینە نېیەن.
16- ئاشکرا کەردەی لادای جە یاساکاو ڕایاونەری
هەر ڕایاونەرێو کە جە یاسا بنەڕەتیەکاو چاپەمەنی (پرێسە کۆدێکس) ی لا بڎۆ، گنۆ وەروو ڕەخنەو شۆراو چاپەمەنی. ئا ڕایاونەرە مشۊ ئی ڕەخنەیە کە گنۆ سەرش، بە نام ونیشان و ھۆکارشەو پەی وانەر، گۊشگېر یان وینەرەکایش بە نامۍ پرێسەکۆدێکسیەو ئاشکرا کەرۊ.
نویستەی و ھۊرئەوەگېڵنای: موختار کەریمی.[1]