فەرز کەرمۍ هۆرامی زوانەکۍ بە هۆرەترېشقە هۆرتەقێنۍ
ئارۊ ئېمە پسەو خەڵکوو هۆرامانی، باس جە ۋېیەردەی کۆن و پەڕ پیتیما نمەکەرمۍ، ئارۊ ئېمە داعیەو ئانەی نېیەنمێ کە فەرهەنگما دەوڵەمەنا، ئارۊ ئېمە داعیەو ئانەی نېیەنمێ کە ئینسانی هۆرامی ژیروو زرنگا، پسەو کابرایێ خەڵکوو دەگاو (ئەسپەڕیزی) ئەفراسیاو ئەغگەر وات، فەرز کەرمۍ خەڵکوو هۆرامانی بە هۆرەترێشقە هۆرتەقینێ، ئی هۆرتەقایە ئەر سرۆشتی بۊ، ئەر خوڎای هۆرامیش درۆس کەردەبۊ، حەقوو ئانەیش هەن بە زوانو ئەذاییش قسێ کەرۊ، ڕاو ڕاوینوو وېش بە ئازادانە هۊرچنۆ، بە زوانی هۆرامی کۆو جەمە فەرهەنگی وکۊمەڵایەتیەکانە وېش برمانۆ، وېش بەر وزۆ، وېش چەنی حەزوو ئارەزو ئا چېوە کە وەشش مسیۆ وێ بەر وزۆ، بە زوانو وېش دەرس بوانۆ و تاکو وەختوو مەرگی تەنانەت جە ئاخرەتیچەنە مشیۊم بە هۆرامیانە پرسوو وڵامش چۆ کەرا، ئی چېوا کە من واتێم حەقی سروشتی یەک دانە بنیاذمینێ، وەختێ ئېمە پسەو ئینسانی چەنی دنیایی (حیوانی) وېما جیا مزانمۍ ، مەبەستما زوانا، پەس متاومۍ ئینەی واچمێ کە جیاوازی ئینسانی و دنیایی فەقەت جە زوانینە بەر وزیۆ و بڕێ چېوێ تەر کە پسەو خسڵەتو جسموو ئینسانی و حەیوانی کە جیا جە یۆینێ، گەرەکما چېگەنە ئی پرسێ ئۆ وېم کەروو کە ئایا ئەر من پسەو جوانێ هۆرامی وەرم گېرا، نازا بە زوانو فەرهەنگوو وېم وەشیەکاو ژیوای وېم بەر وزوو، ئایا لتمە مذۆ ئۆ وڵکۆتەی من، ئانە کە هەر ئینسانێ کە بە زوانی ئەذاییش بوانۆ و بنویسۆ خاستەر پیشرەفت کەرۊ چېوێن کە حاشاش چەنە نمەکریۆ، فرەو جە دەروون شناسەکا و کۊمەڵشناسەکا، ئی چېوشا بە شێوێ ئاکادەمیک و سەردەمیانە سابت کەردەن، ئینە کە زوان کاریگەری فرەش سەرو گردو بوارەکاو ژیوایوە هەن ئاشکاروو ڕۊشنا و پەنەواز بە باسوو من نیا، چېگەنە ئینە گرنگا کە من پسەو دانێ هەورامانی کە زوانو فەرهەنگێ وێپام هەن چی مشیۊم دلێ زوانو فەرهەنگەکاو تەرینە شۆریەوە (استحالە) ، ئینە کە ئېمە خەڵکوو هۆرامانی جە ئێرانەنە زوانما دلێ فارسینە نقمبۊنە چېوێ ڕۊشنا، ئانەیچ کە ئېمە جە هەرېموو کوردستانینە زوانەکەما خەریکا دلێ سۆرانینە نقمبۊنە، ئاذیچ پەڕ وازحا. باشە ئەی ئېمە باس جە ئینسانی ناتقیما کەردەن مەبەستما چېش بێ، باشە وەختێ تۊ نمازا بە زوانت قسێ کەری و بە زۊرە ملێ زوانێ لایذەت پۊرە سەپنا، ئایا ئینە نیشانۆ چېشینە، ئایا ئینسانێ هۆرامی پەیش هەن چی هەلوو مەرجەنە واچۆ من زوانو فەرهەنگم هەن، بە دڵنیایوە نە، چوون زوانێ کە نەبەریشەنە کتیبېیانە، نەبەریشەنە فێرگە، جە زانشتگانە قسێش پەنە نەکەری، نەکەریش بابەتوو پەیجۊرکاری جە زانشتەکاو دونیاو مدرنوو ئارۊینە، کەی مشیۊم نامېش بنیەی زوان، زوانی هۆرامی ئارۊ، پسەو مەردېوە کە گۆڕەفشار دریابۆ پاسەش پنە ئامان، هەڵبەت ئینە جە سایەو دەوڵەتوو ئێرانی و حکوومەتوو هەرېموو کوردەسانی و جە گردی گرنگتەر ئا هۆرامیە کەزازا کە کۆتێنێ شۆنۆ ئی دوە دەسەڵاتەیە، فرەو خەڵکی ماچا تاریخ یا ۋېیەردە قەزاوەت کەرۊ، بەڵۍ من پسەو جوانێ هۆرامی جە ڕاوینوو وېمۆ ئارۊ ئینەی قەزاوەت کەروو، کە ئا هۆرامیا کە پەی ناسیۆناڵیزمی کوردی ودەسەڵاتوو ئێرانی هەرمانەشا کەردێنە، من کەزازشا چروو، دلێ تارېخو هۆرامانینە بە خیانەت هەرمانە نامېشا پۆ گۆڕستانوو مەردەکانە منوېسو، تاکو زاڕۆڵەکاو هۆرامانی، فرەتەر بشناساشاو پیمانەشا کەرا، وەختێ ماچا ئینە نویسەرو هۆرامانین، بەڵام وەختێ ملی کتېبەکاش تەماشا کەری بە زوانی سۆرانی و فارسی، ئەوەتاویاو زوانو فەرهەنگوو هۆرامانیش لاونانۆ، خەریکا ئینسان ترەکۆوە، ئاخۆر واچە برای بۍ عەقڵ، نویسەرو هۆرمانی ئانەنە کە بە زوانی هۆرامی بنویسۆ نەک جەنابت، بە زوانو بێگانا قسێ ماچی ئەو هۆرامانی، ماچا فڵانە کەس هۆرامی زوانا هەن دلێ حزبو فڵانینە تاکو ئیسە هەزار کەسێش کوشتێنێ، دەی واچە ئەحمەق مەر تۊ ڕەفێقوو خاڵخاڵینی یا هێتلێری و سەدامی، هۆرامی چکۆو کوشتوو کوشتار چکۆ، ئارۊ زوانی هۆرامی بڕێ نائینسانا بەردەن هەذوو سۆسۆڵاو لەرزای، کە بېیەن بە دوشمەنوو گرد کەسی، حەر یاگێ وینی هۆرامیێشا کەردەن بە سەرپل، بەڵام وەختێ وینی ئنۆ کەزازێ حەقش نیا، پسەو هۆردەسی وەشەویسیما فەرماو زوانو فەرهەنگوو هۆرامی زوانو شەڕوو کوشتوو کوشتاروو سەرەبڕیەو، مرافعەو جەهاد دای نېیا زوانو هۆرامانی زوانو وەشەویسی ئینسانەکان، ئا ئینسانا کە مەدەنیەتی وزا وەڵ جە هەر چیوێ، زوان هۆرامی زوانو ئاشتی برایەتی و زوانو پشتیوانا جە هەژاران، نەک زاڵماو ۋن مجاو ڕۊزگری،
نویسەر: ژیار سڵامەتیان.[1]
This item has been written in (هەورامی - Kurdish Hawrami) language, click on icon
![](https://www.kurdipedia.org/images/flags/ku.png)
to open the item in the original language!
ئی بابەتۍ بە زۋانی (هەورامی - Kurdish Hawrami) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
![](https://www.kurdipedia.org/images/flags/ku.png)
ی کلیک کەرە!
This item has been viewed 221 times
Write your comment about this item!