پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: شاڼزەهەمە
نویستەی: #ئیبراهیم میکە عەلی#
عەبدوڵڵا شەیدای بنوېسو کتیٛبو (تاریخو سانەکا هۆرامانی) هەکە سەردەمو ڕوٙسەم سانینە ژیوان، دریٛژەو نویستەی مدرامانەکاشەنە نویستەنش: ساڵەو (1321) کوٙچینە بە مەرامو سەردای قەوم و خویٛشی لوایمیٛ پەی دەرەویانی و شەویٛ دەگاو دەرەوکییٛ خزمەتو برزوم بەگینە (خوا چەنەش ڕازی بوٙ) مەنیمیٛوە و ئا شەویٛما وەش بەردە سەر.
سەرسەحب کەوتیمیٛوە ڕا و سەرو هانەو شلیٛرانیۆ نماو سەحبیما کەردە، نماو سەحبی مەنیٛبیٛ لوایمیٛ هەوارو پیر ڕوٙسەمی و یاوایمیٛ خزمەتو ڕوٙسەم سانی، هەڵای مازڵۊخە و سەرو تەوەن نماو سەرو هەساراوەکیٛش هورنەگیٛرتەبیٛ، وەختێ منش وینانیٛ هورئیٛستۆ و بە ویٛچەمنایۆ و ویٛبەکەم زانایۆ چڼ هەنگامێوە ئاما پیٛوای منۆ، برای ئازیز مەڵڵا ئەحمەدی قازیچ چاگە بیٛ.
دریٛژەو ویرەوەریەکەیشەنە قازی عەبدوڵا شەیدا فرەتەرش نویستەن و حاڵو وەزعەو هۆرامانیش وەشتەر ڕوٙشنە کەردیٛنۆ و نویستەنش: دمای خیٛرئامای و هەواڵ پەرسای و وەشی و تشی پی تەشکە دەسما کەرد قسیٛ و من واتم: جەنابو سانی شوٙکر و سوپاسو خوای، پەی جەنابیت جە گردکەسی فرەتەر پەنەوازا، ۋەرو ئانەیە بیٛجگە کەشەکا هۆرامانی هەکە جە قەڵاو ئەستەنجەری بەرزتەریٛ و جە ئاسمانیچ دڵنیا تەریٛنیٛ، قەوم و کەسوکارەکیٛچت چەمڎاریکەریٛ و پاسەوانیٛتەنیٛ، پەی نمونەی لاو ڕاسیت کوڕەکیٛ عەزیز خانی و ماموەکیٛشانیٛ و پیٛسەو شیٛر و پاڵنگا گرد ئامادیٛ جەنگینیٛ، پاسەوانیٛ و هامکارەکیٛ ویٛچت گېیان بەختکەریٛنیٛ، لاو چەپیچت عەباس قولی سانا هەکە پیٛسەو شیٛری ئازای شەو و ڕوٙ پاریٛزگاریت وەنە کەروٙنە و هیچ موچە و جیرێوەیچشا مەڎەی پەنە، ماڎام پاسە بوٙ توٙ جە گردکەسی فرەتەر ئەشوٙ شوٙکرو ستایشو خوڎای بکەری.
پەیواچو قسەکامەنە ڕوٙسەم سان واتش: بەڵۍ قسەکیٛت ڕاسیٛ و بە یاگیٛنیٛ، وەلێم ئی ئاساییش و ئارامیە تاکو ماوێوە تەرا، چوونکوم دەسەڵاتداریٛ کوردەسانی و شارو سنەی پېوەڼیشا چەنی ئیٛمە پیٛسەنە پېوەڼی وەرگی و مەییٛ، هەرچڼە ماوێوەن ئینامیٛ وەزعێ ئارامەنە، وەلێم تەرسەو ڕەفتارەکا دەسەڵاتدارا شاری و زوڵمیشانە دڵما ئارام نیا).
بە وردبېیەیۆ ئەو ئی ویرەوەریەو ماموٙسا شەیدای هەکە هۆرماگیٛڵنان سەرو زوانی هۆرامی، چڼ دیمێوە سیاسییٛ و فەرهەنگییٛ و کوٙمەڵایەتییٛ و ئایینییٛ ئا سەردەمیما پەی ڕوٙشنیٛ مەباوەو چاگۆ متاومیٛ فرەو دیمە شاریاوەکا تەرو ژیوای ئا سەردەمیە بوانمیٛوە.[1]
Kurdipedia is not responsible for the content of this item. We recorded it for archival purposes.
This item has been written in (هەورامی) language, click on icon
to open the item in the original language!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
This item has been viewed 275 times
Write your comment about this item!