کورد دلۍ چەرخەکا تاریخینە
بەشۍ: دوەسەڎ و شەسس و یەکەمە
نویستەی: #هاوڕێ باخەوان#
ساڵەو (1915ز.):
* مانگەو (06) ئی ساڵېنە، داگیرکەری تورک قەرارو کۊچپەنەکەردەی ئەرمەنییەکاش پەی دلۍ ئەنادۊڵی دا.
* مانگەو (08)ئی ساڵۍ، داگیرکەری تورک ئاسووریەکۍ ناوچەو سەرنیشتو هەکاریش کۊچپەنەکەردۍ.
* مانگەو (11) ئی ساڵېنە، تەڵعەت پاڎشا وەزیرو کاروبارو دلۍ تورکیای، شېخ عەبدولقادرش کیاستۆ پەی سەرنیشتو کوردەسانی، تاکو چاگە سەرهۊردێوە دژو ڕووسەکا هۊرگیسنۊ، هەرچن شېخ بە سەرزاری سازیا، بەڵام چېرەنە پېوەڼییش بە ڕووسەکاوە کەرد و دڵنیێش کەردێ کە هیچ چېوێ دژو ئاڎییشا نمەکەرۊن.
* ساڵەو (1916ز.): چن تۊمارێ پېوەس پی ساڵېوە ئینێ وەردەسەنە:
* هامنو ئی ساڵۍ، فرەو ناوچەکانو سەرنیشتو کوردەسانی کۆتۍ چېرو دەسا هېزەکانو ڕووسی.
* ئەچی ساڵېنە، ڕېککۆتنامێ میانو فەرەنسا و بەریتانیای بەسیا، بەپاو ئانەی سووریا و لوبنان و کیلیکیا و بەشو پانیشتو وەرنیشتو ئەنادۆڵی و ویلایەتو موسڵی، دریێ بە فەڕەنسای، دماتەر ویلایەتو موسڵی دریا بە بەریتانیای.
* پەی یەکەم جاری تەیارێ ئەڵمانی ئاما سەرو ئاسمانو سلێمانی و دلۍ دۊڵەو (دۆزەخ مینە)ینە کۆتەرەو سایېقەکەش مەرد.
* ئەچی ساڵېنە، پەی یەکەمین جاری ماشین ئاما دلۍ سلێمانی.
* ئەچی ساڵېنە، سەردارو تەریقەتو قادری، شېخ بابای غەوسئاباد بە دەسو تورکەکا دریان قەنارە، نامبریا شاعېریچ بېیەن.
* ئەچی ساڵېنە، قازی فەتاح برا گولانەو باباو قازی محەمەڎی ، چەنی یۊ جە کوڕەکاش شەهیڎۍ بیېنۍ، وەختو پارېزگاری کەردەی جە شارو مەهابادی دژو هېرشو ڕووس و تورکی.[1]