1. ئامادەکردنی پڕۆژەی بەرنامەی حکومەتی داهاتو:
1-1: لیژنەیەک لەلیستە براوەکانی پەرلەمانی کوردستان پێکبهێنرێت بۆ ئامادەکردنی بەرنامەی حکومەتی داهاتو لەماوەی دوو هەفتەدا.
1-2: ئەم بنەما گشتیانەی خوارەوە لەبەرنامەکەدا بچەسپێنرێن و میکانیزمی گونجاو بۆ جێبەجێکردنیان ئامادەبکرێت:
1-2-1: سەروەریی یاساو بێلایەنکردنی دادگاکان و دەستوەرنەدان لەکاروبارەکانیان.
1-2-2: بێلایەن و بەپیشەیی کردنی هێزە چەکدارەکان بەهێزەکانی پێشمەرگە و ئاسایش و هەواڵگری و ئاسایشی ناوخۆو قەدەغەکردنی کاری حیزبی لەناو ئەم هێزانەدا.
1-2-3: هێنانەکایەی دادی کۆمەڵایەتی لەدابەشکردنی داهات و سامان و موچە و ئاوڕدانەوە لەچینە هەژارەکانی کۆمەڵگەو، هەموارکردنی سیستمی موچە لەقازانجی ئەوانەی موچەیان کەمە.
1-2-4: داڕشتنی سیاسەتێکی ئابوریی ڕون، لەسەر بنەمای پلانێکی ستراتیژیی تۆکمەو، بوژاندنەوەی ژێرخانی ئابوریی هەرێم لەروی ڕێگاوبان، پەرەپێدان و هاوچەرخکردنی گوندەکان، بوژاندنەوەی کەرتی کشتوکاڵ، بەهێزکردنی کەرتی پیشەسازی، بەدامەزراوەیی کردن و ڕوناکاندنی کەرتی سامانی سروشتی، لەگەڵ ڕەچاوکردنی هاوسەنگی لەنێوان کەرتە ئابوریە جیاجیاکاندا.
1-2-5: باش بەکارهێنانی سامانی گشتی‌و، بەیاسایی کردنی بودجەی حیزبەکان.
1-2-6: دژوەستانەوە و بنبڕکردنی گەندەڵی سیاسی و دارایی و ئیداری لەرێی چالاککردنی دیوانی چاودێریی دارایی و دەستەی دەستپاکی و دواکاری گشتی، سەرەڕای ڕۆڵی ڕەقابی پەرلەمان و دروستکردنی پشکنەرایەتی وەزارەتەکان و کرانەوەی زانیاری بەڕوی میدیادا.
1-2-7: چەسپاندیی پرەنسیپی هاوبەشی ڕاستەقینە لەوەرگرتنی بڕیارە سیاسی و ئابوری و سەربازی و کارگێڕییەکانی تایبەت بەپەیوەندیی نێوان هەرێم و بەغدا، داهاتوی هەرێم، ئەو پرسانەی ڕەهەندی دەستوریان هەیەو، گەڕاندنەوەی پڕۆژەی دەستوری هەرێم بۆ پەرلەمانی کوردستان بەمەبەستی هێنانەکایەی سازان لەسەری.
1-2-8: ئەولەویەتدان بەگەڕاندنەوەی ناوچە جێناکۆکەکان بۆ سەر هەرێمی کوردستان لەپەیوەندی لەگەڵ حکومەتی فیدڕاڵ‌و، گەیاندنی خزمەتگوزاری بۆ ئەم ناوچانە.
2. ئەنجامدانی کۆبونەوەی پێنج قۆڵی لەنێوان لایەنە براوەکان لەتەلاری پەرلەمان، بەمەبەستی ڕێککەوتن لەسەر هەڵبژاردنی دەستەی سەرۆکایەتیی پەرلەمان و پێکهێنانی حکومەتی داهاتو لەماوەی دوو هەفتەدا لەبەر ڕۆشنایی ئەم بنەمایانەی خوارەوە:
2-1: ڕێزگرتن لەدەنگی هاوڵاتیان لەهەڵبژاردنەکانی 21-09-2013 و کردنی بەبنەمای سپاردنی بەرپرسیارێتیەکان بەلایەنە براوەکان.
2-2: پەیڕەوکردنی بنەمای خاڵ لەدابەشکردنی دەستەی سەرۆکایەتی پەرلەمان و سەرۆکایەتی هەرێم و سەرۆکایەتی حکومەت، وەزارەت و دەستە سەربەخۆکان‌و، ئەنجومەن و دەزگای ئاسایش، نوێنەرایەتیەکانی دەرەوە، ئەو فەرمانگە و دامەزراوانەی بەرپرسەکانیان پلەی وەزیریان هەیە.
2-3: بنیاتنانی حکومەتی کارا بەپشتبەستن بەکادری لێهاتوو شارەزا لەبەڕێوەبردنی حکومەت و کارکردن بۆ بچوککردنەوە و تەرشیقکردنی وەزارەت و دامودەزگاکانی لەسەر بنەمای چوستی نەک قەبەیی، دور لەبیرۆکراسی و هەڵاوسانی کارگێڕیی.
2-4: بەپیشەیی کردنی دەزگای ئیداریی هەرێم و سپاردنی کاری شیاو بەکەسی شیاو لەڕێی دروستکردنی ئەنجومەنی ڕاژە.
2-5: چەسپاندنی سیستمی لامەرکەزیی تەواو لەئیدارە خۆجێییەکان و پێدانی سەربەخۆیی و دەسەڵاتی دارایی و کارگێڕی زیاتر بەئەنجومەنی پارێزگاکان‌و، شۆڕکردنەوەی دەسەڵاتی کارگێڕی و دارایی زیاتر بۆ قەزاو ناحییەکان و کۆتایی هێنانی یەکجاری بەجوت ئیدارەیی حیزبی.
2-6: پێدانی ڕۆڵ و شوێنی شیاو بەپێکهاتەکانی تری هەرێم لەحکومەت و دامەزراوەکانی تر.
3. هەنگاوەکانی هەڵبژاردنی دەستەی سەرۆکایەتیی پەرلەمان و پێکهێنانی حکومەت:
3-1: پاش تەواوبونی کاری ئەو لیژنانەی کە لەتەوەرەکانی 1 و 2 ئاماژەیان پێدرا، لەماوەی 48 کاتژمێردا بەرێککەوتنی لیستە براوەکان و بانگێشتی سەرۆکی کاتی، پەرلەمانی کوردستان کۆئەبێتەوە بۆ تەواوکردنی دانیشتنی یەکەمی خۆی و هەڵبژاردنی دەستەی سەرۆکایەتی پەرلەمان بەپێی مادەی (13 تا 15)ی پەیڕەوی ناوخۆی پەرلەمان‌و، ناونانی پاڵێوراو بۆ سەرۆکی حکومەت بەپێی بڕگەی (3) لەمادەی (56) لەیاسای هەڵبژاردنی پەرلەمانی کوردستانی هەموارکراو لەهەمان دانیشتندا.
3-2: سەرۆکی هەرێم لەماوەی 48 کاتژمێر لەدوای تەواوبونی پڕۆسەی ناونانی سەرۆکی حکومەت، بەپێی بڕگەی دوانزەیەم لەمادەی (10) لەیاسای سەرۆکایەتی هەرێمی هەموارکراو سەرۆکی حکومەت و جێگرەکەی ڕائەسپێرێت بۆ ئەوەی لەماوەی دوو هەفتەدا حکومەت پێکبهێنن بۆ ئەوەی بچنە بەردەم پەرلەمان بەمەبەستی وەرگرتنی متمانە و پەسەندکردنی بەرنامەکەی.
4. لیستی گۆڕان لەئاستانەی بانگەشەی هەڵبژاردنەکانی نیسانی 2014 داوائەکەن کە:
4-1: سەرجەم هێزو لایەنە سیاسیەکان و کاندیدەکانیان، بەئازادی و هێمن بانگەشەی هەڵبژاردن ئەنجامبدەن و خۆبپارێزن لەبێزارکردن و ئازاردانی هاوڵاتیانی کوردستان.
4-2: بێلایەنکردنی دامودەزگاکانی حکومەت و هێزە چەکدارەکان لەپڕۆسەی بانگەشەی هەڵبژاردندا.
4-3: حکومەت بڕیارێک دەربکات کە تیایدا:
4-3-1: پیسکردنی ژینگەی هەرێمی کوردستان لەکاتی بانگەشەی هەڵبژاردنی قەدەغەبکات و سزای دارایی بۆ دابنێت.
4-3-2: دیاردەی قێزەونی سزای سیاسی قەدەغەبکات و هەر کەسێک ئەنجامیدا، سزابدرێت و لەپۆستەکەی دوربخرێتەوە.
4-3-3: هەر کەسێک بەهۆکاری سیاسی سزا درابو، موچەکەی بۆ بگەڕێنرێتەوە تا ئەگەڕێنرێتەوە سەر کارەکەی و سەرجەم ماف و ئیمتیازەکانی لەو ماوەیەدا بۆ ئەگەڕێنرێتەوە.
4-3-4: بەکارهێنانی چەک لەکاتی هەڵمەتەکانی بانگەشەی هەڵبژاردن قەدەغەبکرێت و سەرپێچیکار سزابدرێت.
4-3-5: لیژنەی ئەمنی لەشارەکان بەسەرۆکایەتی یەکە کارگێڕییەکان و بەشداریی بەرپرسانی هێزەکانی ئاسایشی ناوخۆ پێکبهێنرێت بۆ پاراستنی سەروماڵی هاوڵاتیان و بانگەشەکاران و ڕێ لەهەر هێزێکی چەکداری تر بگیرێت کە دەستێوەردان لەکارەکانیان بکات.
فراکسیۆنی گۆڕان لەپەرلەمانی کوردستان
30-03-2014