بە ناوی بنەماڵەی شەهیدی فەرماندەی لیوا سەڵاح دیلمانی، زۆر سوپاسی پەرۆشی و هاوخەمی هەموو ئەو کەس و لایەنانە دەکەین، کە لەساتی کۆستی لە دەستدانی ئازیزانمان هاوخەم و بەشداربوون.
بۆیە بە پێویستی دەزانین سوپاسی هەڤاڵان، کۆسرەت ڕەسول عەلی و دکتۆر بەرهەم ئەحمەد ساڵح جێگرانی سکرتێری گشتی یەکێتیی نیشتیمانی کوردستان، بەرپرسی دەستەی کارگێڕی مەکتەبی سیاسی، هەڤاڵانی مەکتەبی سیاسی، هەڤاڵانی ئەنجومەنی سەرکردایەتی، هەڤاڵانی ئەنجومەنی ناوەندی و تەواوی مەڵبەند و ئۆرگانەکانی یەکێتی نیشتمانی کوردستان و فەرماندە سەربازیەکانی سەر بەوەزارەتی پێشمەرگە و وەزارەتی ناوەخۆ و خەڵکی تێکۆشەری کوردستان و کەسوکاری سەربەرزی شەهیدان و پێشمەرگە قارەمانەکان بکەین کە لە هێنانەوە و مەراسیمی پڕشکۆی بەخاک سپاردنی شەهیدانمان ڕاستەوخۆ بەشداربوون.
سوپاسی سکرتاریەتی هەڤاڵ مام جەلال دەکەین بە بۆنەی ڕاگەیاندنی پرسەنامە، وە سوپاسی بەڕێز قوباد تاڵەبانی جێگری سەرۆکی حکومەتی هەرێمی کوردستان، بەرپرسی ئاژانسی پاراستن و زانیاری و هێزەکانی دژە تیرۆر، بەرێزان پارێزگاری کەرکووک، پارێزگاری سلێمانی، سەرۆکی ئەنجومەنی پارێزگای کەرکووک، ئەندامانی پەرلەمانی عیراق و کوردستان، نوێنەرانی حزبی و حکومی و لایەنە سیاسیەکان و مامۆستایانی ئایینی بەڕێز و زانکۆی ڕاپەڕین، ئیدارەی ڕاپەڕین، بە تایبەت برایانی ئاسایش و پۆلیسەکانی ناوخۆ، کەسایەتی و جەماوەری شاروشارۆچکەکانی کوردستان بە گشتی و، باڵەکایەتی پشدەر و بیتوێن و سۆران و ڕواندز بە تایبەتی دەکەین، وە سوپاس و پێزانینمان هەیە، بۆ ڕێکخراوەکانی کۆمەڵگەی مەدەنی و فەرماندە و پێشمەرگە قارەمانەکان و هاوڕێ و هاوسەنگەرانی شەهید و سەرجەم چین و توێژەکانی کوردستان کە ڕاستەوخۆ بەشداری پرسەی شەهید لیوا سەلاح دیلمانی بوون.
دەستی ماندووبوونی کارمەندانی سەرجەم کەناڵەکانی ڕاگەیاندن و هاوڵاتیانی تۆڕە کۆمەڵایەتیەکانیش دەگوشین، کە گرنگی بەرچاویان بە تەواوی مەراسیمەکەداو لەگەڵمان ماندوو بوون.
ئەم گرینگدانە بووەمایەی کەم کردنەوەی خەمەکانمان و سەرفرازیمان ئەم ئەم پەرۆشیە دەری خست کە لیوا سەڵاح هی هەموو کورد بووە، بۆیە سەربەرزین کە باوکمان لە سەنگەری پارێزگاریکردن لەخاکی پیرۆزی کوردستان شەهید بوو، بۆیە شانازی بە خۆیی و مێژووی پڕ سەروەری و خەبات و تێکۆشانی نەپساوەی دەکەین و بەڵێن دەدەین، لەسەر ڕێبازی باوکمان کە ڕێبازی مامی گەورەمان جەنابی سەرۆک مام جەلالە و کوردایەتیە، بەردەوامبین و بە نەفەسی سەلاح دیلمانی پێشمەرگەی بەئەمەک و دڵسۆز بین، بۆ نیشتمان و درێژە بە ڕێبازی پیرۆزی باوکمان بدەین کە پاراستنی خاکی پیرۆزی کوردستانە، بیرتان دەخەینەوە، کە باوکی ئێمە پێشتر ووتبووی، ئێوە بنون و ئێمە بە ئاگایان، ئێمەش پێتان دەڵێین، بە هەمان باوەڕ بە ئاگاییەوە بەردەوام دەبین لە خەبات و تێکۆشان و سەنگەری بەرگری کردن چۆڵ ناکەین و چۆک بۆ دوژمن دانانێن و چۆک بەدومن دادەنێین.
بنەماڵەی شەهیدی فەرماندە لیوا سەلاح دیلمانی و هاورێکانی
14-05-2015
Cet article a été écrit en (کوردیی ناوەڕاست) langue, cliquez sur l'icône
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 11,978
Donnez votre avis sur ce produit!