Azadiya Welat rojnameyeke kurdî a rojane ye ku li #Amed#ê derdikevê. Azadiya Welat li Tirkiyeyê û Bakurê Kurdistanê tê belavkirin û rojane derdora 14 hezar heb tên firotin û bi vê yekê Azadiya Welat rojnameya kurdî ya ku herî zêde tê xwendin e. Ku rojnameya di 28'ê tebaxê de 2016 hate qedexe kirin.
Piştî ku mîsyona Heftenameya Welatê Me bi dawî bû rojnama kurdî bi navê Azadiya Welat di sala 1996'ê de di bin gerînendetiya Mehmet Gemsiz û Berpirsiya karên nivîsaran a Dizgûn Denîz de dest bi weşanê kir. Piştî ku Dizgun Denîz derket derveyî welat, Salihê Kevirbirî bû berpirsê Karên Nivîsaran. Kevirbirî, ji ber vê peywira xwe gelek caran bi dadgeh û binçaviyan re rûbirû ma û kete girtîgehê. Xwediyê Rojnama Azadiya Welat, di destpêkê de Celalettîn Yoyler bû. Piştî sala 2003'ê Azadiya Welat navenda xwe anî Amedê û Gerînendetiya rojnameyê Tayîp Temel girte ser xwe û ew bi rêve bir. Heta tebaxa 2006'a heftane derket, ji 15'ê tebaxê 2006'a şûnve rojane derdikeve.
Rojnameya Azadiya Welat li ser kevneşopiya heftenameya Welat ku ji aliyê Apê Mûsa, Feqî Huseyîn Sagniç, Zübeyir Aydar û gelek rewşenbîrên din ve hatibû avakirin dest bi weşanê kir. Piştî ku Welat ji aliyê dewletê ve di sala 1994’a de hate girtin, heftenameya Welatê Me bi qasî salekê weşan kir û ew jî hate girtin. Ji sala 1996’a heta 2003’a Azadiya Welat li ser heman kevneşopiyê weşana xwe domand.
Piştre biryar da ku bê welat û navenda xwe anî Amedê. Bi tevahî heta tebaxa 2006’an 554 hejmar bi awayekî heftane derketin. Azadiya Welat li hemû Kurdistanê rojnameya herî domdirêj e ya ku heta neha derketiye. Di nava 12 salan de ji sedî zêdetir doz lê hatin vekirin. Gelek dozên ku hatine vekirin ji ber wêneyan hatin vekirin.
Ji ber ku Tirkiye nedixwest behsa kurdî bê kirin, di îdianameyan de Azadiya Welat wekî rojnameyeke bi zimanekî neyê fêmkirin weşanê dike bi nav dikir.
Azadiya Welat di 15’ê Tebaxa 2006’an de bi pêşengiya Tayip Temel û gelek kedkarên din gaveke din a yekemîn avêt û dest bi weşana xwe ya rojane kir. Lê ceza û doz bi dawî nebûn. Êdî dihate gotin ku bi kurdî propagandaya PKK’ê dike û lewre jî di nava 3 mehan de nêzî 20 dozan lê hate vekirin. Li Midûrê Karê Nivîsan Hamdullah Yilmaz ji du dozan bi tevahî çar sal û sê meh cezayê girtîgehê hate birîn. Ji dosyayekê sê sal û ji ya din jî 15 meh ceza ji aliyê 4’emîn Dadgeha Cezayê Giran a Amedê ve hate dayîn û ew niha li benda erêkirina Dadgeha Bilind a Tirkiyeyê ye.
Ev dozên dawî dawî piştî ku Serokfermandarê Artêşa Tirk Yaşar Büyükanit çapemeniya kurd wekî hedef nîşan da pêk hatin. Ev rewş diyar dike ka hiqûqa Tirkiyeyê di çi rewşê de ye. Midurê Karê Nivîsan Hamdullah Yilmaz daxuyaniyek da û got ku ew êdî naçe dadgehê parastinê nake. Piştî Yilmaz, Vedat Kurşun bû xwedî û midûrê karê nivîsan ê rojnameyê. Piştî Kurşun, Emîne Demir berpirsyariya hiqûqî girt ser xwe û bû Xwedî û Midûra Nivisan a Azadiya Welat.
Azadiya Welat di 28'ê tebaxê de 2016 hate qedexstine