بەناوی خودای بەخشندە و میهرەبان
بەبۆنەی ڕۆژی شانزەی ئاب، حەفتاویەکەمین ساڵیادی دامەزراندنی پارتی دیموکراتی کوردستان، گەرمترین پیرۆزبایی خۆم ئاراستەی کادیر، ئەندام و لایەنگرانی پارتی دەکەم، پیرۆزبایی لە خانەوادەی سەربەرزی شەهیدان، پێشمەرگە قارەمانەکان و هەموو چین وتوێژ و پێکهاتەکانی کوردستان دەکەم.
پارتی هەر لە سەرەتای دامەزراندنییەوە هەتا ئێستا ئامرازێک بووە بۆ بەدیهاتنی ئامانجە دیموکراتی، نیشتمانی و نەتەوەییەکانی گەلی کوردستان و لە هەمانکاتیشدا هاوشان لەگەڵ هێزە تێکۆشەر و نیشتمانپەروەرەکانی تری کوردستان ئامرازی بەرگریکردن بووە لە ماف و پێناسەی گەلی کوردستان لە هەموو قۆناغەکاندا.
پارتی لە دروشم و لە کرداردا، پێشەنگ و هەڵگری بەرپرسیارێتیی بووە لە قۆناغە گرنگەکانی خەباتی گەلی کوردستان و ئێستایش لە قۆناغی بنیاتنان و شەڕی تیرۆر و هەنگاونان بەرەو سەربەخۆیی بە شانازییەوە خاوەنی هەمان ئەرک و ڕۆڵە و لەم ڕێگەیەدا قوربانیی بێهەژماری داوە.
لەو بۆنەیەدا بە پێویستی دەزانم سوپاسی خۆڕاگری وکۆڵنەدانی جەماوەری پارتی و هەموو خەڵکی کوردستان بکەم، ئەو خۆڕاگرییە مکوڕترمان دەکات لە هەنگاونان بەرەو ئاییندە و کارکردن بۆ مسۆگەرکردنی مافە ڕەواکانی گەلەکەمان. ئەوەیش دووپات دەکەمەوە باشترین وەفا و وەڵام بۆ خوێنی شەهیدان و قوربانیدانی گەل سەربەخۆیی کوردستانە. سەربەخۆیی کوردستان و ئاشتی و پێکەوەژیان ئامانجی پارتی دیموکراتی کوردستانە و لەو ڕێگەیەدا ئامادەی هەموو قوربانیدانێکە و بۆ گەییشتن بەو ئامانجانە پارتی بڕوای بە یەکڕیزی و تەبایی نێوخۆیی کوردستان هەیە.
داوا لە ئەندام و لایەنگرانی پارتی دەکەم کە بە هەموو توانایەکیان هاوشان لەگەڵ هەموو خەڵکی کوردستان پاڵپشتی پڕۆسەی سەربەخۆیی و ڕیفراندۆم بن، چونکە جگە لە سەربەخۆیی، گەلی کوردستان هیچ ڕێگەیەکی تری لەبەردەم نییە، ئەوەیش لەپێناو دووبارە نەبوونەوەی کارەساتەکان و بەرقەراربوونی ئاشتی و بووژانەوە.[1][2]
مسعود بارزانی
15-08-2017
Cet article a été écrit en (کوردیی ناوەڕاست) langue, cliquez sur l'icône
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 6,064
Donnez votre avis sur ce produit!