نووسینی: #محەمەد هەریری#
ساڵ: 2017
پێشەکی
ئەو بابەتانە لە شێوەی لێکۆڵینەوە بۆ گۆڤار و ڕۆژنامە و ماڵپەڕەکان نووسراون، لەنێوان ‏ساڵانی 2005 تا 2017. دەبوایە دەمێک با چاپ کرابایە لە دوو بەرگی کتێبێک، بەڵام لەبەر ‏هەل ومەرجی گشتی گۆڕەپانی فەرهەنگی کوردی، و هەلومەرجی تایبەتی خۆم، ‏نەمتوانیوە ئەو کارە زوو ئەنجام بدەم.‏
خۆزگە لە کوردستان خانەی چاپ وبڵاوکراوەکان لیژنەیەکی پسپۆری وریایان دەبوو، ‏ئاگاداری هەلومەرجی فەرهەنگی و بیروڕا و ئاڕاستەکانی خوێنەرانیش دەبوون، بۆ ئەوەی ‏بزانن چ کتێبێک پێویستی بە چاپ کردنە وکامەشیان گوناهە کاغەزی تێدا بەخەسار بدرێت! ‏بەڵکو ئەرک و خەمی چاپکردنی ئەو کتێبانەیان لە کۆڵ من و هەر نووسەرێکی جیدی ‏دەکردەوە، نەک بیرکەیتەوە و بنووسیت و کاتت هەمووی ببەخشیت لەسەر حیسابی خۆت ‏وماڵ و خێزانت، ئینجا خەمی ئەوەشت بێت چۆن چاپی بکەیت؟!‏
بەڕای من ترسناکی بیری سەلەفیەت لە پێش گەندەڵی و مەترسیە سیاسیەکاندایە، چونکە ‏ئەو کاریگەرە تێکدەرەی سەلەفیەت لە بیرو بۆچوون و میزاج و ڕەوشت و کلتوری ‏نەتەوەکەمان جێی دەهێڵێت، زۆر مەترسیدارترە لە کاریگەری نێگەتیڤی هەر حزبێک ‏ودەسەڵاتێکی سیاسی.‏
من هەرزوو دەرکم بەوە کرد، بۆیە بە شانازیەوە دەڵێم لە کوردستانی عێڕاقدا، یەکەم ‏کەسانێک بووم کە لەناو هەناوی ئیسلامی سیاسییەوە، بیری ترسناکی سەلەفیەتم دایە بەر ‏نەشتەری ڕەخنە. ئەوەش کاردانەوەیەکی زۆری هێنا بەدوای خۆی لە هەڵچوون وجوێن ‏وهەڕەشە و سکاڵا لە دژ تۆمارکردن و تا کۆتایی...‏
ئەو کاتە زۆر هەستم بە تەنیایی دەکرد، بەڵام ئێستا کە دەبینم دەیان و سەدانی وەک من، ‏هاتوونەتە مەیدان بۆ بەرگرتن بەو بیرە مەترسیدارە، دەزانم کە ڕەنجمان بە خەسار ‏نەچووە!‏
هەر میللەتێک نوخبەیەک پەیدا نەبێت بۆ هوشیارکردنەوەی خەڵک، بە مەترسیەکانی بیرە ‏مەترسیدارەکانی لە شێوەی سەلەفیەت، پاش ماوەیەک کۆمەڵگا بەوپەڕی نێگەتیڤیەوە خۆی ‏ڕادەستی ئەهریمەنی ئەو بیرانە دەکات، شەقامی وڵات تەسلیم بە غەوغاییەکی دەبەنگی ‏دینیی سەلەفی دڕندە دەبێت! بەتایبەتی ئەگەر دەسەڵاتێکی بێ خەمی سەرقاڵ بە گەندەڵیت ‏هەبێت! ئینجا جیابیرەکان لەسەر شەقامەکان وەک فەرخەندەی کابول و مەلالە ومەشعەل ‏خانی پاکستان، وەک دڕندە هێرشیان دەکرێتە سەر بە دار وبلۆک و چەقۆ و شمشێر! ‏
کۆمەڵگای پاکستانی وئەفغانی و سۆماڵی و سوری چەند نموونەیەکی باشن لەو بوارە. ‏هیوادارم بە خوێندنەوەی ئەو کتێبە قووڵتر وچاکتر لە بیری مەترسیداری سەلەفیەت ‏تێبگەن، و دەوروبەریشتان ڕووناک کەنەوە بە هەر بیرۆکەیەکی باشی ناو کتێبەکە.‏
ئەو وتار و لێکۆڵینەوانە بەشێکن لەو نووسینانەی بەندە لەسەر ئەو دیاردەیە گرنگ و ‏ترسناکەی سەلەفیەت، کە بە هەوڵ و کۆششی تاقە کەسی نوسەر کۆکراوەتەوە و ڕیزبەندی ‏بابەتەکان کراوە لە دوو توێی ئەو کتێبە..‏
ئەو بەرهەمانە لە ئەنجامی تێکەڵبوونی کرداری لەگەڵ ئەدەبیات و جوڵانەوە ئیسلامیەکان ‏هاتۆتە ئارا. یانی سەرەڕای ئەزموونی کرداری، ئەزموونێکی زۆری تیۆری و خوێندنەوە ‏و بەدواداچوون بۆ وتار وکرداری سەلەفیەت و ئیسلامی سیاسی لە پشت بیروڕاکاندایە.‏
ئەو وتارانە لە ڕێگای ڕۆژنامە وسایتەکان پەیامی خۆیان گەیاندوە، لە کات و ڕۆژی جیا ‏جیا نووسراون، و لە قۆناغی فیکری جیاواز نووسراون، بۆیە سەرەڕای یەکێتی ‏ناوەرۆکی، لەوانەیە جاروبار دوو ڕای تاڕادەیەک جیاواز لەسەر بابەتێک ببینرێت، بەڵام ‏مێژووی وتارەکان ئاماژە بۆ قۆناغە فیکریەکان دەکەن، چونکە مرۆڤ نابێت کائینێکی ‏نەگۆڕ بێت! هیوادارم توانیبێتم خزمەتێکم کردبێت بەو بوارە، تەنها ئامانجم خۆشبەختی ‏وپێشکەوتنی میللەتەکەمە وهیچی تر...‏
چاپخانە: شڤان- سلێمانی