دواڕۆژ، پشتیوان جەمال
بەڕێوەبەری ڕێکخراوی کۆمەڵی مەدەنی ڕایدەگەیەنێت: لە 10 ساڵی ڕابردوودا 300 کەس لەبازرگانیکردن و بەکارهێنانی ماددەی هۆشبەر لەکوردستان زیادی کردووە، بۆیە ئەوان دەستیان بەهەڵمەتێک بۆ نەهێشتن و کەمکردنەوەی ئەو ماددەیە دەستیپێکردووە.
ئەمڕۆ ڕێکخراوی NLP بۆ ڕاهێنان و ڕاوێژکاری بەهاوکاری ئەوقافی #سلێمانی#، سیمینارێکی بۆ ژمارەیەکی زۆر لەمامۆستایانی ئاینی لە هۆڵی هۆتێل مەم و زین لەشاری سلێمانی ڕێکخست تا هانیان بدات، لەوتاری ڕۆژی هەینیدا هاووڵاتیان لەمەترسییەکانی بازرگانی و بەکارهێنەری ماددەی هۆشبەر هۆشیار بکەنەوە، ئەو ڕێکخراوە بەنیازە دوای شاری سلێمانی، هەمان سیمینار، لەناوچەکانی #شارەزوور# و #گەرمیان# و ڕاپەڕینیش ساز بکات.
ئاسایش: لەدوو ساڵدا ئامارەکان کەمیکردووە
عەمید جەلال ئەمین، بەڕێوەبەری بەشی ماددە هۆشبەرەکان لەئاسایشی سلێمانی بەدواڕۆژی ڕاگەیاند: ساڵی ڕابردوو 248 کەس بەتۆمەتی بازرگانی و بەکارهێنانی ماددەی هۆشبەر دەستگیرکراون کە گەنجی خوار 18 ساڵ و ئافرەتیشیان تێدایە، بەڵام لەساڵی 2017دا 310 کەس دەستگیرکرابوون، هەرچەندە هەموو داتایەکیش 100% نییە، چونکە ڕەنگە خەڵکیش هەبێت دەستگیر نەکرابێت.
ناوبراو بەپێی ئەزموونی کارکردنی لەو بوارە، پێیوایە: سازکردنی سیمینار و وۆرکشۆپ بۆ نەهێشتن و کەمکردنەوەی ئەو ماددەیە زۆر گرنگە و وتی: بەتەنها دەستگیرکردنی بازرگان و بەکارهێنەران، ئەو ماددەیە کەمناکاتەوە ئەگەر هۆشیارکردنەوەی لەگەڵ نەبێت، بەڵکو هۆشیارکردنەوە لەپێش هەموو شتێکەوەیە، خەڵک هەبووە 7 جار ئازادکراوە و دەستگیرکراوەتەوە، لەبەرئەوەی هۆشیاری نەبووە.
لە 10 ساڵدا 300 بازرگان و بەکارهێنەر زیادیکردووە
هاوکار ڕەفیق، بەڕێوەبەری لقی سلێمانی ڕێکخراوی NLP بۆ ڕاهێنان و ڕاوێژکاری بۆ دواڕۆژی ڕوونکردەوە: ڕاستە ئاماری ساڵی ڕابردوو لە ساڵی 2017 کەمترە، بەڵام لەساڵی 2008دا 97 تا 100 کەس بەو تۆمەتە دەستگیرکراون، بەڵام لەساڵی 2018دا تەنها لەسنوری پارێزگای سلێمانی 248 کەسە و لەهەموو کوردستان 415 کەس دەستگیرکراون، بۆیە لەو 10 ساڵەدا نزیکەی 300 کەس زیادیکردووە، کەواتە بازرگانیکردن و بەکارهێنەری ئەو ماددەیە لەفراوانبووندایە.
زۆرجار بەرپرسانی ماددەی هۆشبەر زۆریی بەکارهێنانی ئەو ماددەیە بۆ کۆماری ئیسلامی ئێران دەگێڕنەوە کە هاوسنووری هەرێمی کوردستانە، هاوکار دەڵێت: ئێران کاریگەری زۆری لەسەر کوردستان هەیە، لێرەوە حەب دەنێردرین بۆ ئێران و لەگەڵ ماددەی دیکە تێکەڵ دەکرێن و شیشەیان لێ دروست دەکرێت.
بەبۆچوونی ناوبراو بۆ نەهێشتن و کەمکردنەوەی بەکارهێنانی ئەو ماددەیە، پێویستە سنوورەکان توند بکرێنەوە، چونکە زۆربوونی بەکارهێنانی دەبێتە زیادبوونی کێشە خێزانییەکان و وتی: مامۆستایانی ئاینی کاریگەرییان زۆرە لەسەر خەڵک، بۆ نموونە باوک دەتوانێت کاریگەری لەسەر کوڕەکەی هەبێت، هاوڕێ دەتوانێت کاریگەری لەسەر هاوڕێی دیکەی هەبێت.
ئامارەکان چی دەڵێن؟
بەپێی ئامارەکانی بەڕێوەبەرایەتی نەهێشتنی ماددەی هۆشبەری ئاسایشی سلێمانی کە دراوەتە ئەو ڕێکخراوە، لەساڵی 2017دا 10 ئافرەت بەتۆمەتی بازرگانی و بەکارهێنانی ماددەی هۆشبەر دەستگیرکراون، بەڵام لەساڵی ڕابردوودا بۆ 14 ئافرەت بەرز بۆتەوە، هەروەها ساڵی ڕابردوو بڕی 415 کیلۆگرام ماددەی هۆشبەر گیراوە لەگەڵ 17 هەزار و 281 شیت حەبی هۆشبەری جۆراوجۆر.
مامۆستای ئاینی کاریگەری هەیە، بەمەرج
هەروەها مەلا عەتا #پێنجوێن#ی، جێگری سەرۆکی لقی سلێمان یەکێتی زانایانی ئاینی ئیسلامی کوردستان بەدواڕۆژی ڕاگەیاند: بازرگانی و بەکارهێنانی ماددەی هۆشبەر هیچی لەکیمیاباران بەرامبەر میللەت کەمتر نییە، مامۆستایانیش کاریگەرییان لەسەر خەڵک هەیە، بەڵام بەمەرجێک، وۆرکشۆپی دیکە بۆ ئەو پرسە بکرێت و میدیاکان هاوکاری مامۆستایان بن.
مەلا یاسین حەکیم کە بەشداربوویەکی وۆرکشۆپەکە بوو بۆ دواڕۆژی ڕوونکردەوە: ئەوانەی لەسەرشانیانە پەیام بەخەڵک بگەیەنن کە بەکارهێنانی ئەو ماددەیە خراپە و خێزان هەڵدەوەشێنێت، پاشان ئەرکی بەرپرسانی ئەمنییە ئەو حاڵەتە کەمبکەنەوە و نەیهێڵن.
هەڵمەتی هۆشیاری گرنگە
#مەریوان# حەسەن، توێژەری کۆمەڵایەتی لە لێدوانێکدا بۆ دواڕۆژ ڕایگەیاند: بەپێی ئامارەکان بەکارهێنانی ماددەی هۆشبەر زۆر بووە و هەڵمەتەکانی هۆشیاریش لەئاست پێویست نین، بۆیە زۆر گرنگە هەڵمەتی هۆشیاری زیاتر بکرێت.
ئەنجامدانی ئەو سیمینارە لەکاتێکدایە، لەماوەی ڕابردوودا دەزگای دواڕۆژ دۆسیەیەکی فراوانی سەبارەت بەکاریگەرییە خراپەکانی ئەو ماددەیە کردەوە و تیایدا چاوپێکەوتنی سازکرد لەگەڵ بارزگان و بەکارهێنەرانی ئەو ماددەیە لەنێو زیندان و بەرپرسانی ئەمنی و پزیشکانی دەروونی.[1]
#27-01-2019#