ئازیزانم سڵاوتان لێ بێ.
ساڵانێکی دوور و درێژە هەندێک لایەن، بەشێوەیەکی ڕێکوپێک، لە ڕێگەی چەند سایتێکەوە، نووسینی هیچوپووچ بە ناوی من دەنووسن و شیعرم بۆ دەهۆننەوە، تا کار گەیشتە ئەوەی هەواڵێ کۆچی دواییشم ڕابگەینن!
من دەمێکە ئاگاداری ئەو گومانلێکراوانەم، کە دەیانەوێ بەو شتە لاوەکیانە سەرقاڵم بکەن، یان کار بکەنە سەر مۆراڵم و لەدۆزی ڕەوای نەتەوەیەکی بەشخوراو و نیشتمانێکی دەستبەسەر دامببڕن. ئەوان بەو هەواڵانە دەیانەوێ #شنگال# و تۆفان و پێترۆدۆلار و میری دزان و ماچ و قوون و کورسی و #کەرکووک# و دوبەی و تەسبێح و براکوژی و چی و چی لە یادی خۆشەویستانم بسڕنەوە.
ئەوەی لەدایک بێ دەشمرێ. مردن دادپەروەرترین دادوەرە و شەرم لە کەس ناکا، بەڵام، سوپاس بۆ خوا، تەندروستیم لەوپەڕی باشیدایە و هیچ نەخۆشییەکیشم نییە.
تا ئێستا، بۆ بەدرۆخستنەوەی هەواڵی مردن!، قسەم بۆ هیچ میدیا و میدیاکارێک نەکردووە، کەسیشم ڕانەسپاردووە بەناوی من قسە بکا و لایک و کۆمێنت کۆکاتەوە. نە سکرتێرم هەیە، نە وتەبێژ و کاربەڕێخەر!
منەتباری ئەو خۆشەویستانەم لە هەواڵیان پرسیوم، زۆر سوپاسیان دەکەم، هیوادارم تاسەر ڕوو لەوان و پشت لە دەسەڵات بم. ئەوانەی بەو فشه هەواڵە لاوەکیانە گەلێکی پاروودزراوی بندەستی چەتە و مافیا سەرقاڵ دەکەن و خاکفرۆشی و فەرهوودکاری و تاڵانسالاریش پەردەپۆش دەکەن لە ڕووڕەشی بەولاوە هیچی تریان پێ نابڕێ.
تا ئێستا، هیچ ئەکاونتێکم لە تۆڕە کۆمەڵایەتییەکاندا نییە، بەڵام، هەر بۆ داخستنی چەند سایتێکی گێرەشێوێن، لەم ڕۆژانە ماڵۆچکەیەکی_خۆم لە فەیسبووک دادەنێم، بۆ ئەوەی چیدی کەس نەتوانێت بە زڕبەرهەم و فشەهەواڵی لاوەکی خۆشەویستان و ئەدەبدۆستان بە لاڕێدا ببا.
پەشێوی خۆتان...
هێلسنکی
#24-08-2019#
Cet article a été écrit en (کوردیی ناوەڕاست) langue, cliquez sur l'icône
![](https://www.kurdipedia.org/images/flags/ku.png)
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 2,927
Donnez votre avis sur ce produit!