دەقی ڕاگەیەنراوی کەجەکە:
بۆ ڕای گشتی گەلی کوردستان
لە سێهەمین ساڵیادی کۆچی دوایی سەرکردە و پێشەنگی هێژای گەلی کورد خوالێخۆشبوو مام جەلال تاڵەبانیدا سەرەخۆشی خۆمان ئاراستەی هەموو گەلی کوردستان، هاوسەرۆکایەتی و سەرجەم کادێر و ئەندامانی یەکێتی نیشتمانی کوردستان و بەتایبەت بنەماڵەی بەڕێز مام جەلال دەکەین و هیوادارین کە یاد و بیرەوەری ئەم سەرکردە مێژووییەی گەلی کوردستان ببێتە هۆی هەرچی پتەوترکردنی گیانی یەکێتی نەتەوەیی و گەیشتنی گەلی کورد بە ماف و ئازادییەکانی.
خوالێخشبوو مام جەلال تاڵەبانی وەکو کەسایەتییەکی پێشەنگ و سەرکەردەیەکی گەورەی سیاسی مۆرکی خۆی لە پێشکەوتنەکانی هەموو کوردستان و بەتایبەت باشووری کوردستان لە سەدەی بیستەم و بیست و یەکەمدا داوە. هەر لە سەرەتای دەرکەوتنییەوە لە بەرامبەر هێڵی بەکرێگیراو و چەقبەستووی سیاسەتی کلاسیکی کوردی دا نوێنەرایەتی هێڵی خۆڕاگری، داهێنان، نوێبوونەوە، گۆڕانکاری و سیاسەتی ئاشتییانە و دیموکراتییانەی کردووە. هەربۆیە هەموو هەنگاوەکانی ئەو لە قۆناخە جیاجیاکانی ژیانی سیاسی و کۆمەڵایەتیدا کاریگەرییان لە سەر پێشکەوتنەکانی هەموو کوردستان بە گشتی و باشووری کوردستان بە تایبەتی کردووە.
مام جەلال نەک تەنیا لە باشووری کوردستان، بەڵکۆ لە بەشەکانی دی کوردستانیش خاوەن ڕۆڵ و کاریگەری بووە لە سەر ئاراستەی پێشکەوتنە سیاسی و کۆمەڵایەتییەکان و بە گویرەی دەرفەت و توانا هاوکاری خەباتی ڕزگاریخوازی هەموو بەشەکانی دی کوردستانی کردەوە، هەر لە ڕۆژهەڵاتەوەی بگرە هەتا باکوور و ڕۆژئاوا. هەر لە سەرەتای دەرکەوەتنی پ. ک. ک ەوە مام جەلال بە گرنگییەوە و بە چاوێکی ستراتیژی سەیری خەباتی باکووری کوردستانی کردووە و بە گوتنە مێژوویەکەی خۆی کە باکوور میسری کوردستانە ئاسۆی چارەسەری کێشەی کوردی لە سەرکەوتنی خەباتی ئازادیخوازانە لە باکووری کوردستاندا بینیوەتەوە. هەربۆیە هەر لە سەرەتاوە، لە گەڵ خوالێخۆشبوو مامۆستا ئیبراهیم ئەحمەد، پەیوەندییەکی مێژوویی و دۆستانەی لە گەڵ ڕێبەر ئاپۆ و پ ک ک داناوە و هەوڵیداوە ئەم پەیوەندییە بکاتە هەوێنی یەکێتی نەتەوەیی گەلی کوردستان. هەربۆیە لە هەر هەوڵێکی ئاشتیخوازانە بۆ چارەسەری کێشەی کورد لە باکووری کوردستان ڕۆڵی دیار و بەرچاوی بینیوە. ئێمە هیج کاتێک ئەوە لە بیر ناکەین کە خوالێخۆشبوو مام جەلال بەرلەوەی باری تەندروستی تێک بچێت، خەریکی ڕێکخستنکردنی هەڵمەتێکی نێونەتەوەیی بوو بۆ ئازاد کردنی ڕێبەر ئاپۆ. بە داخەوە مام جەلال لە قۆناخێکدا کە گەلی کورد زۆرترین پێویستی بە لێهاتوویی و هێزی چارەسەری ئەو بوو کۆچی دوایی کرد، ئەگینا ئێستا هەم باشووری کوردستان و هەم بەشەکانی دی کوردستانیش لە ئاستێکی زور جیاوازدا دەبوون و ئەو دەیتوانی پێشی لە زۆر بڕیاری هەڵە و کارەسات بگرێت. ئێستاش لەو بڕوایەداین کە خاوەن دەرکەوتن و خوێندنەوەیەکی باش بۆ ڕێبازی تێکۆشانی مام جەلال دەتوانێت ڕێگا لە بەردەم زۆر پێشکەوتن بکاتەوە و ڕێگری لە زۆر کارەسات و نەهامەتیش بگرێت.
لە کۆتاییدا بەو هیوایەی کە بیرەوەری و یادی مام جەلال ببێتە هۆی هەرچی پتەوترکردنی گیانی یەکێتی نەتەوەیی گەلی کوردستان، جارێکیتر پرسە و سەرەخۆشی خۆمان پێشکەش دەکەین.[1]
Cet article a été écrit en (کوردیی ناوەڕاست) langue, cliquez sur l'icône
![](https://www.kurdipedia.org/images/flags/ku.png)
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 2,602
Donnez votre avis sur ce produit!