فیشەکی گڕدار ئاڕاستەی سەر دڵی جوامێری سەرتیپ دەکرێت
شەهید جوامێر، سەرتیپی 23ی سورداش بوو. بە قارەمانێتی و دڵسۆزیی خۆی لە سەرەتای پێشمەرگەبوونیەوە فەرماندەی مەفرەزە و جێگری فەرماندەی کەرت و دواترین پلەی شەرەفی ئەندامێتی کە پێی سپێردرا، سەرتیپی 23ی سورداش بوو. لەگەڵ ئەوەشدا کە خۆی پێشمەرگە بوو، خاوەنی دوو برای شەهید بوو. مرۆڤێک بوو لە ئاستی هەموو کەسێکدا بچووکیی خۆی دەنواند و بەرامبەرەکەی لە خۆی بە گەورەتر دەزانی.
بەڵام لەو جۆرە سەرکردە و فەرماندانە هەمیشە نەیارانیان لەنێو شۆڕشدا بۆ دروست دەبوو، چونکە کەسانی وەک جوامێری سەرتیپی خاوەن خەباتی بێوچانی پاک و بێگەرد، شەرمیان لە خۆجوداکردنەوە دەکرد لەگەڵ پێشمەرگەدا. جوامێری سەرتیپ لەسەر دڵسۆزی و بۆچوونی جیاواز، لە فەرماندەیی و کار و چالاکییەکانیدا سڕیان کردبوو. ئەگەرچی جوامێر فەرماندەی من نەبوو، بەڵکوو لەو زەمەنەدا سیستمی عورفی لەبریی سیستم و پەیوەندیی ناوخۆی ڕێکخراوی پرۆلیتاریی کۆمەڵەی ڕەنجدەرانەکەی لەمەڕ ئێمە بوو، دەبوو هەر چی بچووکترین هەڵەی لێ بوەشێتەوە، بە فیشەکی گڕدار سنگی بسووتێنرێت و لەناو ببرێت. بۆ مێژوو دەیگێڕمەوە، لە گوندی گاپیڵۆنی بەری دۆڵێ کەپرێکی بە نایلۆن دروست کرابوو، پێیان دەوت چایخانەکەی گاپیڵۆن، جوامێری سەرتیپ سەری سفر کردبوو، کلێتەیەکی سەوزی لەسەر دەکرد و تەنها دەمانچەیەکی میکارۆفی بە دوو یەدەکەوە لەنێو قەدیدا بەستبوو، بەڕێکەوت شەهید بەهە کوێر لە سنووری شارباژێڕەوە هاتبووە بەری سنووری ئێمە و چاوم پێ کەوت، وتی زۆر ماندووم و با بچین بۆ کەبابخانەکەی پیر ئەلیاس. چەمێک بوو لەنێوان ڕێگای سەرەکیی کارێزەی کۆن و بە ڕۆژهەڵاتدا گوندی باڵخ و خوار گوندی گاپیڵۆن بوو، دوای پشوودان و هەندێک گاڵتەوگەپ کە بەهە کوێر دەیکرد، نە من و نە جوامێری سەرتیپ حەزمان پێ نەدەکرد. دوای پشوودان، بەهە کوێر وتی: بەزەحمەت قاپێ عەرەقی ڕەشیان بۆ هێناوم، بچین بیخوێنەوە. هەر چەندە خواردنەوە (کحول) قەدەغە بوو لەنێو هێزی پێشمەرگەدا، بەڵام هەندێک جار لە کاتی پشوودا و لە شوێنی تایبەتدا ئارامییەک بە جەستەی ماندووبوو دەدرا. لە ڕاستیدا ئەوە کارێکی ناشایستە بوو، بەڵام جوامێری سەرتیپ بۆ دڵنەشکاندنی بەهە کوێر؛ ئامادەیی خۆی دەربڕی و وتی: بەهادین، لە ئێستەدا هەندێک لەم ماستاوچییانە ڕاپۆرتیان لەسەر نووسیوم و چەک کراوم و سڕ کراوم بۆ داهاتوویەکی نادیار، ئەگەر دەزانیت کێشەی زیاترم بۆ دروست دەکەیت، ئەوا من دەڕۆم و خۆت بۆ خۆت سەرپشک بە چی دەکەیت. بەهادین سوێندی بە گۆڕی شەهیدان خوارد بەوەی هیچ هەڵەیەک لە کاتی مەستیدا نەکات. بۆ من یەکەم جارم بوو لەو جۆرە دانیشتنانەدا بەشدار بم، بەتایبەت کە پێشمەرگە بووم و ترسی دوژمن و ئەرکی گەلێکی زوڵملێکراومان لە ئەستۆدا بوو. وەک باسم کرد جوامێری سەرتیپ سڕ کرابوو و بەهە کوێریش تفەنگێکی مزەڵی سیخۆی بە حەوت مەخزەنەوە پێ بوو، وەک ئەوە وا بوو کەسێک لە ئێستادا خاوەنی چەند ڤێللا و خانوویەکی لەسەر یەکی چەند نهۆمی بێت، بەلای ئێمەی تاک بە تاکی نێو هێزی پێشمەرگە وا بوو. بەهادین شووشەیەک عەرەقی لە گیرفانی دەرهێنا و پێشمان نەزانیبوو لە چایخانەکەی پیر ئەلیاس سێ پیاڵەی لەگەڵ خۆیدا هێنابوو، من زۆر حەپەسام و پرسیارم کرد: ئەوە چۆن بیری ئەوەت هەبوو ئەم پیاڵانە لەگەڵ خۆتدا بهێنێ؟ بەهە کوێر وتی: پرسم بە خاوەن چایخانەکە کرد و مۆڵەتی پێ دام بیهێنم. پاش کاتژمێرێک جوامێری سەرتیپ باسی لە جۆری خەباتی هاوڕێکانی بۆ دەکردین و باسی لە شۆڕش و جوامێریی خاڵە شەهابی دامەزرێنەری کۆمەڵە و هاوڕێکانی بۆ کردین و دواتر هەندێک گللەیی و ناڕەزایی سەبارەت بە خەڵکی خۆبەرەپێشەوە و ماستاوچی و خەڵکی دووڕووی بۆ کردین کە بوونەتە هۆی ئەوەی کێشەیان بۆ دروست کردووە، زۆریش خەمبار بوو بەوەی هەندێک لە هاوڕێکانی مامەڵەی خراپ و ڕەفتاری ناشرینیان نواندووە. ئەو دانیشتنەی من لەگەڵ جوامێری سەرتیپ و بەهە کوێردا، ئارەزوو و ئومێدەکانیان کوشتم و بێزم لە پێشمەرگایەتی و بوونی هەندێک کەس دەکردەوە. جوامێری سەرتیپ فەرماندەیەکی سەربازیی قسەخۆش و بەئارام بوو، لە شەڕی قەیوان ماوەت کە شەڕێکی درێژخایەنی پتر لە سێ مانگ بوو، هەر لە ماوەتەوە دەستی پێ کرد تاکوو گوندی قەیوان، بەو جۆرە ناوی شەڕەکان بە شەڕی قەیوان ماوت باس دەکرێت و شەڕی برزو و قووتەی حەسەن بەگ وەک فەرماندەیەکی سەربازیی سەرکەوتوو ڕۆڵی کاریگەری هەبوو.
#شەهاب کەریم#
#مێژوویەک لە لوولەی تفەنگەوە؛ ڕۆژگارە سەختەکانی شاخ 1979-1991# [1]
Cet article a été écrit en (کوردیی ناوەڕاست) langue, cliquez sur l'icône
![](https://www.kurdipedia.org/images/flags/ku.png)
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 1,195
Donnez votre avis sur ce produit!