نامۍ: شېخ عەلی
نازنام: حیسامەدین
نامۍ تاتەی: شېخ محەمەد بەهائەدین
نامۍ ئەڎێ: تەیېبۍ
ساڵەو ئامای دنیای: 1861ز
یاگۍ ئامای دنیا: #تەوېڵۍ_هۆرامان#
ساڵەو کوچی دمایی: 1939ز
یاگۍ کوچی دمایی: #باخەکون_هۆرامان#
$ژیواینامە$
دیارتەرین کوڕو شېخ محەمەد بەهائەدینیەن، بە زارۊڵەیی لوانەنه وەروو وانای و سەرەتا قورئانی پیروز، دماتەر کتېبەکان و(نەحو، سەرف، شەریعەت)ش تەمامنێنۍ. ئینسانێ خاوەن کەسایەتی و داراو ئەقڵێ گەورەی. دەسێ باڵاش جە نویستەی و ئینشانە بیەن. دمای کوچی دمایی تاتەیش دلۍ دڵ و تەمامو موریدەکاشەنە یاگۍ وېش کەردېنەشۆ. فرە قسەزان و زوان ڕەوان بیەن. شېخ عەلی حیسامەدین دەسێ باڵاش جە ئاوەڎانکەردەیۆنە بیەن، فرەو یاگەکان و هۆرامانینە باخو باخاتش نیانەرەو ئاوەو ئاوەڎانیش ۋستەن.
سەرەتاو جەنگی جەهانی یەکەمی زددوو داگیرکاری ڕووسەکا شوڕشش کەردەن. ساڵەو(1925ز) شا فەیسەڵی یەکەم سەردانیش کەردەن. چڼەها زانێ سەروو دەسیشەنە یاوێنۍ پەنە، پېسە(شېخ محەمەد خاڵ، مەڵڵا ساڵحی گەورە، مەڵڵا ئەسعەدی ڕەواندوزی، سەید ئەحمەد کەرکووکی، شېخ عەبدولعەزیزو میسری، شېخ حەبیبوڵڵا ڕوحانی، مەڵڵا تەها شەقڵاوەیی).
میرزا ئۆلقاڎری پاوەیی جە تاریفۍ شېخی حیسامەدینینە ماچۊ:
حەکیمی حازق ئاگای دەرد دڵ
ئاغەی باش بلوک تەوېڵۍ مەنزڵ
جادار جاگیر شای بەهائەدین
سەرحەڵقەی پیران قوتب ڕووی زەمین
ئالوودەی ئەتباع ئەهل ڕۊحانی
(تایب الحکمە)ی غەوس گەیلانی
چېش واچوون یا شېخ کۊی گەوهەر وە کۊ
وەسف من جە کۊ و، شەئنی تۊ جە کۊ؟
سەر موسەنیفان وە خەیاڵ بازی
فیردەوسی و حافیز سەعدی شیرازی
مەلای تەفتازان ئەنوەری و جامی
موتنەبی و ئیستەخر شېخ نیزامی
ئەحبابان یەکسەر بوانان جە نۊ
دیسان شا نامەی وەسف شان تۊ
وەرنە من کەم هۊش کوردی کەم هونەر
بۍ سەواد، بۍ خەت، بۍ فام، بۍ جەوهەر
دایېم هەر خەیاڵ نادانی وېمەن
جە کۊ تەوانای وەسف تۊ پېمەن
دایەی دەهری دوون چەند حەملش کەردەن
زاتێ وېنەی تۊ هەرگیز ناوەردەن
مەدەد یا (عەلی) شای تەکیەداران
دین داران دینت وە چەم مەژماران
تۈ پیر و ئوستاد کیمیای سەرمەشق
زەڕاب زەڕگەر، زەڕاب خانەی عەشق
من پووڵی مەفرەق ناڕەوای شاران
ڕووکەش وە دەرمان دەوای عەتتاران
دەخیل هیممەتێ پەی دڵ وەشی دڵ
(قادر) فیدات بۊ یا پیری کامڵ.[1][2][3]