ئەمشەو دیسان شەپۆلێک هات
لە کتێبی: #قەڵای ڕاز#
بەرهەمی: #ژیلا حسێنی# (1964-1996)
ئەمشەو دیسان شەپۆلێک هات
بۆنی باوەشی تۆی ئەدا
ئەستێرەکان هەتا بەیان
نەبینران و چرپەیان نەهات
ئەمشەو من و تەنیایی و تۆ
سێ هاوڕێ بووین
بەرانبەر بە خەو ڕاوەستاین
ئەمشەو ئاسمان هەتا بەیان
ژان ئەیگرت و
کۆشی حەوشە و سەرشانی هەموو دارەکان
پڕ بوو لە پەپوولەی سپی
تۆش دایەنەی کراسەکەت پڕ کردبوو
پێئەکەنیت
ئای کە چەندە پێکەنینی تۆ شیرینە
پێکەنینت بڵێسەی شادمانییە
پەپوولەکان بەدەور سەرتا سەما ئەکەن
کە تۆ نەبی
کە زایەڵەی پێکەنینی تۆ نەمێنێ
هەموو خامۆش و بێدەنگن
کە تۆ ببی و پێبکەنی
من و هەموو پەپوولەکان
دائەبارین
بەدەور سەرتا سەما ئەکەین
قۆڵ لە قۆڵی گەردەلوولا باڵا ئەکەین
دار گۆرانیی ڕاوەستان و
گوڵ جوانیمان بۆ ئەخوێنێ
پێکەنینت
دڵداریی سەرشێتانەمان
پێ فێر ئەکا.
#سنە# - #1995-12-29#
[1]
Cet article a été écrit en (کوردیی ناوەڕاست) langue, cliquez sur l'icône
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 622
Donnez votre avis sur ce produit!