نۋیستەی: ئاکۆ مارانی
11و ئەپڕیلو 2017
مانیفێست-کەرڎەو کەم-کەرڎەو ئەرکی و فرە-کەرڎەو بوارەکا بەرھەمئاۋرڎەی و ئابۇری
- تەڵانسازی تازە بە نزمکەرڎەی کەلەکا و زېیاڎکەرڎەو تەڵانەکا ...تد.
- ھەردەمیی-کەرڎەی کەلەکا بە بەکاربەرڎەی تۊڕۍ تەلینی و خاکی و قسڵی و تەۋەنی ...تد.
- کشتکاری تەڕەکاڵی دلۍ باخەکانە بە پاشەکۆتکەرڎەو ئاۋۊ ۋارانی و زېیاڎەو ئاۋۊ نۆباۋی ...تد.
- کشتکاری دێمی، چە قەڎپاڵو کەشەکاۋە، بە کېیارسازی ...تد.
- کەڵکھۊرگېرتەی چە مېۋداری ھامچەرخی| کۊڵەکەدای درەختو مېۋۍ ...تد.
- درۊسکەرڎەی پەینی سرۇشتیۍ چە گەڵای و پۊش و پەڵاشو باخەکا، بە پۊژنایشا چېرو خاکو تەڵانەکانە یان مېۋەکانە و بەکاربەرڎەیش ساڵۍ ئایەڼېنە ...
- نېیای درەختە بەردارەکا پېسەو [ۋەنی و زەیتۇنی و سنجەی و ۋامۍ و نەرەی و تاییلۍ و درەختڵا براڵۊۋی و سماقۍ...تد] و درەختە بېبەرەکا پېسەو [سنۊبەری، کەکەۋۍ، مۊردی و ...تد] قەڎپاڵو کەشاۋە و چە سەختایی پەشتۊ باخەکانە، ھەم پەی بەرھەمئاۋرڎەو بەرەکەیشا و ھەم پەی مسۆگەر-کەرڎەی چۊی و تەختەی و ھەم پەی ڕەنگین-کەرڎەی کەشە ڕۇتەنەکا ھۆرامانی و ھەم پەی پاکۆکەرڎەی ھەۋای و ھەم پەی پارېزنای خاکو کەشەکا و ھەم پەی ۋەرگېرتەی چە لافاۋی و ھەرەسۍ و .... تد.
- کەڵکھۊرگېرتەی چە نېیای و کشتکەرڎەو نوەی و پاقلەی و ... ساڵېۋ نا ساڵېۋ یاگۊ کېیارە دێمی و ئاۋییەکانە، پەی زېیاڎکەرڎەو ڕادەو بەپیتی خاکی، کە زەمینەکا بە پیتۍ کەرا.
- پەرەدای بە بەرھەمئاۋرڎەو ھۆریشمۍ بە وێکەرڎەو کرمۍ ھۆریشمینۍ، کە ئاۋ و ھەۋاو ھۆرامانی پەی بەرھەمئاۋرڎەی و وێکەرڎەی و مەنەی کرمەکۍ چە وڵاتا تەری خاستەر و سازگارتەر ھەن، ھەم کرمەکۍ پەی ساڵۍ ئایەڼی مەنۊۋە و ھەم گراکېش.
- پەرەدای بە کەرتو گەشتوگوزاری بە پەشتبینای بە ئابۇری ئیکۆلۆجیی و بەکاربەرڎەیش پەی بەرژەوەڼی گرڎینەو خەڵکی و ھەم پېسەو سەرچەمەو دەرامەتی و زېیاڎکەرڎەو ھەرمانۍ پەی خەڵکی و درۊسکەرڎەی بازاری و بازرگانی ...تد.
- بەکاربەرڎەو کەرتو گەشتوگوزاری پېسەو بەشېۋو کەرتو تەندرۊسیی و دەرمانی و ئارامگای دەرۇنی و ڕەۋانی، کە ناوچەو ھۆرامانی پەی ئا مەبەسەیە، بە ڕېکۋستەی و گەشتۍ کۊمەڵیۍ و کەشەۋانی گونجېیاتەرین یاگېنە و مېتاۋۊ سەرچەمېۋی بەھېز بۊ پەی سەربەوۍ-کەرڎەی ئابۇری ھۆرامانی و ھامکاتیچ پارېزنای ژیۋارو ناوچەکەی.
بەدڵنېیاییۆ ھۆرامان ھەم کانزێ فرېش ھەنۍ و ھەم بەپیتا. بەڵام چنی ئانەیچە من ھومېڎڎار ھەنا، کە ھەرگیز چە ناوچەو ھۆرامانی نۆتە نەئېزیۊۋە و خەرجو بەرئاۋرڎەو کانزاکا چە ۋرەتیشا فرەتەر بۊ، تاکو بەھیچ جۊرېۋ ئا ناوچە پیشەسازی کیمایی و پیترۆکیمیش چنە نەبۊ و نەبۊ بە شەخەڵگاو کارخانا و خەڵکەکەش گیرۊڎەو نەوەشییە درېژ ماۋەکا نەبۊ، بە نمۇنە شېرپەنجە کە ۋەڵۍ گرڎ چېۋېۋینە یۊ چە مەڵامەتەکاش، دۇکەڵ و شەخەڵو پېشەسازیی پیترۆکیمیای ھەن.
پەی ئانەیە، کە چانەیە زېیاتەر ناوچەو ھۆرامانی بەتایبەت ھۆرامانو بەشۊ ئێراقی نەبۊ بە ۋېرانەو نەزانی دەسەڵاتدارا ھۆرامانی و بېسەرەوبەرەیی نەزمو بازاری و داگیرکاری سیستەمە جەھانییەکەی، پەنەۋاز ھەن ناوچەو ھۆرامانی پېسەو ناوچېۋی پارېزیای چېرو سەرپەرشتی کۊمەڵەو (IUCN) و (یونیسکۆ)ینە تۊمارکریۊ و ئاگاڎاری و سەرپەرشتی کریۊ و سامانە سرۇشتیی و ئاژەڵەکېش پارېزیا.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]