داستانۊ حەیدەری و سنۊبەرۍ
بەشۍ سی و حۆتەمە
دمای ئانەی کە حەیدەر بەگ سەڎ تومەنۍ مزگانیشدا بە پیرەژەنەکۍ(دایە)، گفتوگۊ میانیشان هەر بەردەوامەن.
ئەو شەو ڕاحەت بی، تا بە سووب سەحەر
تا خورشید، نە بورج مەشرق، کېشا سەر
دایە هۊرېزا، بە عەونی باریی
واتش: سا مەشوون، پەی حیلەکاریی
حەیدەر وات: مەشیی وەلای سنۊبەر
ببەر چەنی وېت، شەدەی جەواهر
واچە: یە مەتای ئېران زەمینەن
لایېق وە باڵای ئەو ماه جە مینەن
بەڵکم ئەو نازار پەی وېش، بستانۊ
ئەرجووم هەر ئېدەن، کەسێ نەزانۊ
دایە، شەدەش سەند ڕوو نییا، بە ڕا
بەردش بە دەوان، پەی قەسری ئەو، ما
یاوا، وە پابۊس زېبای سنۊبەر
سڵامێ دا پېش، مدرا وەرانوەر
فەرما، بە دایە، خورشیدی تابان
پەی چېش دېر ئامای، ئارۊ بە لامان
مزانی وەی تەور، غەمگینی زارم
گرفتاری دەس، هیجرانی یارم
مەبۊ جەی دەمدا، کەریم خەمخاریی
چمان دیارەن، جە من بېزاریی
دایە وات: سەرگەرد دەوری دیڎەت بام
سەرگەردی خاڵان، نەو ڕەسیدەت بام
دایە وە سەرگەرد زوڵفی موشکینت
حەیرانی شوعلەی، جامی جە مینت
گیانی من بەرشۊ، پەرێ غەمخواریت
تاکە نەوینوون، بە ئاهو زاریت
کۊربا چەمانم، نە وینووت بە چەم
بەی تەور، گرفتار نە زوڵماتی خەم.[1]