#میرزای لوڕستانی#
جوابدا ئەمیر کەی شاﮪ سەرمەد
نمەتاو واچۇ مەسۊچۊ جەسەد
ئەر بارۇ نامش ئارۊ بە زوبان
بېشک مەسۊزۊ ڕېزەی ئېستوخوان
چۇنکە بەی دەستۇر حاجەت مەکەی لېم
قەڵەم دەواتێ باوەران پەرېم
ئاوەردن کاغەز قەڵەم و دەوات
تەحریرکەرد دەردەم شەرح واقېعات
داش وە دەست شاﮪ وانا سەرانسەر
ئاهېر وست نە جەرگ پادشا و لەشکەر
پادشا چۇن حاڵ دەرۇنش زانا
ڕۇ کەرد وە قاپی قەیۊمی دانا
دۊعا کەرد یا ڕەب ئی سەودای باتڵ
باندەک وەقتێ بەرداریش نە دڵ
باز وات ئەی فەرزەند نۇر چەمانم
نادرەی دەوران نە ڕۇی جەهانم
بە قەوڵی مەردۇد شەیتانولڕەجیم
دڵ و دەرۇنت پەڕکەردەن جە بیم
لەعنەت بکەر لېش مەکەر ئەی خەیاڵ
خەیاڵ فاسېد جە دڵ کەر بەتاڵ
یە فېکر خامەن ئارەزۇت کەردەن
سەرئەنجام نېیەن تا وە ڕۊی مەردەن
تەخت و تاج وېت بەرمەدەر جە دەست
وە چنگ دوشمەن نە خاک مەبی پەست
نە ئەرباب تۊن ئی هەرزەکاری
ئی سەودای بېسۇد ڕای نادېیاری
ئەر ڕاست مەواچی عېشقت ها نە سەر
کەیلەن جە گوڵزار پەی تۊ دەشت و دەر
نە هەر شەبۊستان شاهی مەوازی
پەرېت باوەرۇن یەکێ دڵوازی
هەر جە خاک ڕۇم، عەرەب تا عەجەم
پەردەنشینان بوزورگانی جەم
مەیلت وە هەر کەس جاگیر مەبۊ جا
وە ماڵی دونیا وە زۊری سوپا
وە ئەندەک زەمان باوەرۇن پەرېت
ساکن بەر ئەنبار، تۊ نە جاگەی وېت
ئەمیر چۇن ئەژنی سوخەنان تەمام
زاریش بوڵەند کەرد نە ڕۇی خاس و عام
واتش ئەی پدەر تاجی سەروەران
با خەبەر جە سڕ دەورانی جەهان
دڵ پەی دڵبەرێ ئارام مەگېرۊ
بە وەسڵ غەیرێ کەی کام مەگېرۊ
ئەگەر سەد هەزار مەحبۇب باوەران
نە ڕەوزەی ئېرەم مەشاتەش کەران
غەیر جە خاتۇ زین زوڵفان چۇن زەنجیر
مەیل نېیەن وە دوخت پادشا و وەزیر
خامۊش بەر هەنی جەی حەرف و کەلام
ئېدەعام ئېدەن باقی وەسەلام
پادشا زانا هیچ نەدارۊ چار
فارغ بی جە قەوڵ ڕازان وە گوفتار
زویر وە مەلاڵ غەمگین و دڵرېش
لوا وە ئوتاق ساکن بی پەی وېش
ئەوشۆ وە سەر بەرد و سەد نەدامەت
ئەسەر داوەنەش هەزار قېیامەت
سوب سەحەر بە وەقت شۊڵەی شەوق نۇر
یاران تەڵەب کەرد دیسان بە زەرۇر
ئاما وە گوفتار ڕۇ کەرد نە سوپا
دەرمانش چېشەن بکەران دەوا
عېلاجێ کەران پەی ڕەزای خودا
بەر بشۊش نە دڵ ئی شۊر و غەوغا
ئامان وە سوخەن بوزورگانی کار
ئەر بە قەوڵمان تۊ مەکەری کار؟
تەدبیرش ئېدەن ئېد مەیۊ وە کار
وەرنە غەیرە زین هیچ نەدارۊ چار
چەند جە ئەمیران خاسەی شەهریار
تەعیین کەر چەنی دە هەزار سوار
ڕاهی بۊ ڕەوان ئەو وە بېقەرار
پەنج قۊناغ بشان چەنیش بۍ مەدار
نە هەر مەنزڵێ دۇ هەزار سوار
بگېڵانەوە مەخفی نەو دېیار
تا پەنجەم قۊناغ وېش مەمانۊ وېش
وېش هەم مەگېڵۊ زویر و دڵرېش
نادېم مەمانۊ جە کەردەی ئی کار
دەست بەرمەدارۊ جەی کار و بازار
[1]