باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و یەرەمە
دمای جواب دایۆ جوبرەئیلی پەی پەرساو یەرە کەسەکەی، جوبرەئیل فەرماش بە پېخامئاوەری کە مەشۊم وەزمېرەو چېگەنە پیادۍ بیمۍ، ئا یاگۍ مەدینەی منەوەرەی تەییبە بۍ.
غەرەز چن مەساف ڕاگە تەیی کەردەن
تا تەشریفی خەیر وە جایێ بەردەن
جوبرەئیل عەرز کەرد یا خەیرولبەشەر
جەی مەکانی خاس لاڎێ پیادەبەر
ئینە مەدینەی ئاخرجای وېتەن
تەییبەی شەریف هیجرەتگای وېتەن
حەزرەت چوون شنەفت پا ئاوەردەوە
دوو ڕېکعەت نماز ئەدا کەردەوە
تەشریفش دیسان سواربیی وە زین
تەی کەردەن ڕاهان سارا و سەرزەمین
یاوان وە جایێ شەریف و دڵگیر
سەنگس سورمەبۍ، گیاش چوون عەبیر
جوبرەئیل جە نۊ ئاما وە گوفتار
عەرز کەرد نە خزمەت شای بوراق سوار
وات: یە کۊی توورەن خوڎا عەلیمەن
یاگەی موناجات مووسای کەلیمەن
ئەو کۊ مەشهوورەن بە بەیتولحیکەم
ئەوەن جای مەولوود عیسا بنی مریەم
حەزرەت پیادەبۍ جە بوراق دەرسات
جە دەرگای بېچوون کەردش مواجات
ڕەسمی عیبادەت هەم بەجا ئاوەرد
تەشریف هەم وە زین پەشتی بوراق بەرد
زەمین منەتبار زەمان هەم وەشحاڵ
بوراق وە پەڕتاو جوبرەئیل وە باڵ
جەلوتفی بېچوون فەردی فەریادڕەس
یاوان بە قاپی بەیتولموقەددەس
بەیتولموقەددەس زیارەت کەردش
سوجدەی زاتی پاک بېزەواڵ بەردش
لاز هەم سواربیی پا دا نە بوراق
ڕاهی بی چوون بەرق تەیی کەردش ئافاق
جە هیچ مەنزڵێ نەکەرد مەواسا
یاوا بە قاپی مەسجیدولئەقسا
دیسان جە بوراق پا ئاوەردەوە
سوجدەی زاتی پاک واحید بەردەوە.[1]