$تاوانە گەورەکەی سەیرانگەی پەرەخ ویژدانی هەمووانی هەژاند$
#قوباد تاڵەبانی#
#23-07-2022#
لە گەرمای تەممووزی بەغدا و باشوورەوە هاتبوون تا جەستەی خۆیان بدەنە بەر فێنکایی تاڤگە و شنەبای سەیرانگە و هاوینەهەوارەکانی کوردستان، کەچی بەداخەوە جەستەی خوێناویی بێ گیانیان ڕادەستی کەسوکار و خانەوادەکانیان کرایەوە.
تاوانە گەورەکەی سەیرانگەی پەرەخ ویژدانی هەموو هاووڵاتییانی ئێراقی هەر لە #دهۆک# و #هەولێر# و #سلێمانی#یەوە هەتا بەغدا و نەجەف و بەسرەی هەژاند و هەموولایەکی تازیەبارکرد. ئێستا نەک هەر خانەوادەکانیان، بەڵکوو هەموو ئێراق خاوەن پرسەی نۆ شەهیدەکەی سەیرانگای پەرەخن.
تاوانەکە بۆ ئێمە لە هەرێمی کوردستان واتایەکی دیکەشی هەبوو، هاووڵاتییانی کوردستان دووجار ویژدانیان هەژا. جارێکیان وەک هەر مرۆڤێکی خاوەن ویژدان، وەک هەر هاووڵاتییەکی دیکەی ئێراق خەمبار و دڵگران بوون بەو ڕووداوە دڵتەزێنە و شەهیدبوونی نۆ هاووڵاتی مەدەنی. جارەکەی دیکەشیان وەک کوردێکی بێکەس و بێ پشتوپەنا کە بەردەوام قوربانین و کەس هاواریان نابیستێت!
لە ماوەی چەند ساڵی ڕابردوودا سەرووی 100 هاووڵاتیی مەدەنی هەرێمی کوردستان بەهۆی بۆردوومانە بەردەوامەکانەوە شەهید بوون، بۆ حکومەتی فیدراڵ جارێک هەڵوێستێکی جیدی نەبوو؟
ئێمە خۆشحاڵین و جێی پێزانینە کە ئەمجارەیان حکومەتی فیدراڵ و پەڕڵەمان و لایەنە ئێراقییەکان بە گشتی و تەنانەت کۆمەڵگەی نێودەوڵەتیش هەڵوێستی شیاو و گونجاویان هەبوو، بەڵام جێی خۆشییەتی وەبیریان بهێنێنەوە کە ئێمە لە ڕابردوودا بە دەیانجار داوای هەڵوێستی جیدیمان لێکردن لەسەر گرتنەبەری ڕێوشوێنی پێویست بۆ پاراستنی سەرەوەری خاکی ئێراق، کەچی بە داخەوە تەنیا یەک دوو جار نەبێت کە بە ئیدانەکردنێکی سەرپێیی لەکۆڵ خۆیان کردەوە.
ئەگەر پێشتر هەڵوێستی جیدی هەبوایە، ڕەنگبوو کارەساتی بەر لە چەند ڕۆژی ڕابردوومان نەدیبایە، گەنجێکی جوان لە مانگی هەنگوینیی خۆیدا شەهید نەبووایە، لاشەی بێ گیانی منداڵێکمان بەفڕۆکە ڕەوانەی بەغدا نەکردایە!
من دەڵێم خوێنی کەس لەکەسی تر سوورتر نییە!
ئەگەر حکومەتی فیدراڵ لە ساڵی 2011 دا هەڵوێستی هەبووایە بەرانبەر تاوانی شەهیدکردنی سۆلین شەماڵ حسێنی منداڵ و شەش ئەندامی دیکەی خانەوادەکەی لە چیای کوورتەک، ئەگەر حکومەتی فیدراڵ لە ساڵی 2015دا هەڵوێستی هەبووایە بەرانبەر شەهیدکردنی 8 هاووڵاتی مەدەنی گوندی زارگەلی، ئەگەر هەڵوێستی هەبووایە بەرانبەر بە شەهیدکرانی دەیان هاووڵاتی مەدەنی دیکە لە ناوچە جیاوازەکانی هەرێمی کوردستان، ئەستەم بوو ئەم ڕۆژانە تاوانەکەی سەیرانگەی پەرەخ ڕوویدابایە.
بەپێی دەستوور پاراستنی سەروەریی ئێراق بە هەرێمی کوردستانیشەوە ئەرکی حکومەتی فیدراڵە، هەر بۆیە چ وەک حکومەتی هەرێم و چ وەک هاووڵاتییانی کوردستان چاوەڕوانیمان لە حکومەتی فیدراڵ و دامەزراوە فیدراڵییەکان ئەوەیە بێ هیچ فەرق و جیاوازییەک بەرانبەر هەر پێشێلکارییەکی سەروەریی ئێراق ئەرکی خۆیان جێبەجێبکەن.
داواکارم و کار بۆ ئەوە دەکەم ئەم ڕووداوە کارەساتاوییە تەبایی بێنێتە نێو لایەنە سیاسییەکانی ئێراق و لەیەکیان نزیکبکاتەوە و وایان لێبکات دڵۆپێک خوێنی هاووڵاتییەکمان لە هەموو شتێکی تر پێ گرنگتر بێت. حکومەتێک دەتوانێت ژیانی هاووڵاتییان و سەروەریی خاکەکەی بپارێزێت کە بتوانێت لەناوخۆدا کۆک و تەبابێت و جێی متمانەی هاووڵاتییانی بێت. [1]