واتەو گۊشگېرتەی مېیانو ئاسمانی و زەمینی
بەشۊ پەنجەمۍ
نۊبەت هەم ئاماوە سەرەو ئاسمانی، بە گوفتەکا زەمینی فرە بېتاقەت بی، دەسشکەرد بە نرکنای و ناڵنای، هاوارش دەنگۍ زەمینیش کەڕۍ کەردۍ، ماچۊ ئەی زەمین: ئاخر گەر ۋەرەتاوۊ من نەبۊ، تۊ دایېم دەیجوورەنی، کۍ هەن ڕۊشنت کەرۊوە، من یاگەی مەلائیکانا، میزانو عەدلی ئینا لاو منۆ، قەڵەم و لەوحی مەحفووز و کورسی داروون، جە قورئانەنە، چڼەها ئایەتېنە نامم ئامان، تەبەق عەن تەبەق، حۆت تەبەقەو ئاسمانی منەنا، گەر پەی ئا قساتە هیچ دەلیلێت نېیەن، من داخیېنە دەروونم ڕېشەن.
نۊبە هەم وە دەس ئاسمان یاوا
نرکنا و ناڵا هەر تا کە تاوا
واتش هەی زەمین کۊتای کوڵ عەدەم
بېهووڎە تا کەی ۋەی تەور مەڎەی دەم
تۊ حەددت چېشەن چەنی من وەی ڕەنگ
وە هەرزەگۊیی ببی وە هام دەنگ
من بەرگ سەوزپۊش سیم و زەڕ داروون
من میزان عەدڵ خەیر و شەڕ داروون
(مسجدەلاقصی) ی پەڕ گەوهەر داروون
(سِدرُاللمُنتَهی) ی مونەوۋەر داروون
فریشتان پاک بۍ قەرین داروون
جایی چوون (اعلا علّیین) داروون
قەڵەم چەنی لەوح، هەم کورسی داروون
مەلایەکەی خاس (کروبی) داروون
سا زەمین چوون تۊ جە زوڵماتەنی
زەمین تۊ بېشەرم ڕۊی نەهاتەنی
مەر نەشنەفتەنی جە کەلام هەق
(سَبعَ‌السَّموات) ، (طبق عَنْ طبَق)
زەمین تۊ دایېم جە ژېر بارەنی
جاگەی عاسیان شەرمەسارەنی
زەمین جە داخت دەروونم ڕېشەن
نەڎاری دەلیل جوابت چېشەن؟[1]