تاریخو پیرەکا هۆرامانی
بەشۊ چوارەمۍ

پیر تەیمووری هۆرامی:
چېرو ڕۊشنایی کتېبو (سەرەنجام) ینە ئی زاتە یۊن جە حەفتا و دوە پیرەی، یۊن جە یارەکا (سان سەهاکی بەرزنجی) ، سەڎەو هەشتەمی کۊچینە ژیوان.
دکتور سدیق بورەکەیی بە پەشت بەستەی بە (یاداشتەکا کرندی) نویستەنش:
پیر تەیمووری هۆرامی جە کۊتایەکا سەڎەی حۆتەمی کۊچینە ئامان دنیاوە، بە زاروڵەیی پېسە فەقی دلۍ مەدرەسە دینیەکانە دەسش بە وانای کەردەن، چاگە فېرو لەیەکۆدایۆ قورئانی بېیەن، دمایی لوان پەی بەغڎای چاگە وانایش تەمامنان و گېڵانۆ پەی زېدو وېش، دمای زەمەنێ لوان پەی دەگاو (شېخان) ی، چن ساڵۍ خزمەتو (سان سەهاکی بەرزنجی) نە مەنەنۆ و خەرقەش پۊشتەن، دماتەر لوان پەی شارو (موسڵ) ی، باقی تەمەنیش چاگە بە دەرس واتەیۆ و ڕانمایی خەڵکی گوزەرنان.
پیر تەیموور شاعېرێ تەڕدەس بېیەن، چن پارچە شېعرێش واتېنۍ، نموونێ جە شېعرەکاش:
ئەو شارەزووری، ئەو شارەزووری
بارگەی شام وستەن ئەو شارەزووری
مېردان جەم بوان گرد وە ڕوو سووری
بگەندۍ وە شۊن پیر وە صەبووری
ها هەفتەوانەن شەمع و قەندووری
سکەی قەڎییمەن واڵا مەندووری.
ئی شېعرۍ پۊرە هۊردایەن سەرو (سان سەهاکی بەرزنجی) ، ماچۊ: بارگەو شامی جە شارەزوور وەستەنەرە، یاران گردتان بە ڕوو سووری جەمۍ بیدۍ و بگندۍ شۊنەو پیری، حۆتەوانە پېسە مۊمۍ تیشکە مڎۊوە، پېسە سکۍ کۊنۍ هەر باو و برەوشان مەنەن.
پیر تەیموری هۆرامی ساڵەو (782ک/ 1380ز) کۊچی دمایینش کەردەن، جە شارو موصڵی بە خاکی ئەسپاریان.[1]