هەندێ کات غەم و ناخۆشی، بێتاقەتی و هیلاکی، ترس و دڵەڕاوکێ پێداویستی بوونییەتی و ڕۆحی مرۆڤن وەک بڵێی بۆ ئەوەی لە مرۆڤبوونی خۆمان زۆرتر و زۆرتر تێبگەین یاخود زۆرتر مرۆڤبین دەبێت غەم بخۆین و تامی تاڵییەکانی ژیان بکەین. غەم و ناخۆشی نەک تەنیا وەک پێویستییەکی دەروونی پێویستمانە بەڵکوو بۆ ئەوەشی گەشەبکەین و گەورەتربین، تا بتوانین بە ڕووناکیمان ئاسۆی بینین ئەوانەی چواردەورمان ڕووناک بکەینەوە، بۆ ئەوەی ببین بە درەختێکی بەرهەمدار و گەڵا و گوڵەکانمان لە ئاسمانی ساماڵدا لەناو تیشکی زێڕینی خۆردا خۆیان بشۆن مەلەبکەن، دەبێت سەرەتا ڕەگەکانمان ڕۆبچێت و تاریکی و قوڕ و لیتە و بەردەڵانی بەردەمی خۆی تێکبشکێنێت، لەپێناو ئەوەی بفڕیت سەرەتا دەبێت فێری ڕۆیشتن، ڕاکردن، هەڵگەڕان و سەما ببیت پاشان بفڕیت. کەس یەکسەر نافڕێتە سەر دۆخی فڕین نیچە دەڵێت. تێڕوانینی ئەرێنی بۆ نەرێنیەکانی ژیان یاخود جوانتر بڵێم تێڕوانینی ڕاستگۆیانەتر، تێڕوانینێکی خەیاڵاوی و ئەفسووناوی نییە، بەڵکوو بەرهەمی واقعبینییەکی جیاوازە لەو واقعەی کە کەسانی تر دەیبینن، بەوەی تێدەگەیت جوانی و خۆشی و خەندە تاکە بەرهەمی ژیان نییە، بەڵکوو ئەو تەنیا دیوێکی ئاوێنە ئەفسووناوییەکەی ژینە و دیوەکەیتر ئەو دیوەیە کە بۆ ئێمە زۆر قوورسە لە ئامێزیبگرین و قبووڵی بکەین، بەڵام هەرکات لە ئامێزمانگرت نەک تەنیا ئەو دیوەش دەبێتە هاوڕێمان و بەشێک لێمان، بەڵکوو دەبێتە ئەو پارچە ونبووەی کە تەواوی مەتەڵی ژیانمانمان لەلا ڕوونتر دەکات، ژیان ژیانە، بوونێکە لەودیو ئێمەوە، ناچێتە ژێر ڕکێفمان. دوورە لە تێڕوانین و ویستی مرۆیانەی ئێمە بۆی.ئەم بەشە، ئەو بەشەیە کە بوونییەتە بەرهەمدارە مرۆییەکەی ئێمە بەرهەمدێنێت. کێ ئاواتی فڕین و ئازادی دەکات گەر هاتوو دیل نەبێت؟ کێ ملی ڕێگەی نەمان دەبڕێت گەر نەزانێت نەمان پێویستییەکی گەردوونییە لەپێناو بوون دووبارە وەک نیچە دەڵێت: تاک دەبێت لەناخیدا ناهەمووارییەکی زۆر هەبێت، هەتا بتوانێت ئەستێرەیەکی سەماکەر بهێنێتە ژیان.[1]
Cet article a été écrit en (کوردیی ناوەڕاست) langue, cliquez sur l'icône
![](https://www.kurdipedia.org/images/flags/ku.png)
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 625
Donnez votre avis sur ce produit!