داستانو حەیاتۍ و قاسمی
بەشۊ: چوارەمۍ
دەی خاسا یاسێ ئیسە مەحکەمەو چیشیم کەری، گەرەکتا چېش واچی، ڕېک قسەکێت کەرە، دەی من ئیسە هەڕە پیموو یا هۆرپڕوو، کامشا واچە!
نە هەڕە پیمە و نە هۆرپڕە، بۊ با شەوېوە بلمێ پەی یانەو لالۊ نالەی مەسەلەکېش چەنی باس کەرمۍ، نالە پېیێوی عالا و گرد کەسی وەش مسیۆ. هەم چەنی ئېمە و هەم چەنی ئەداو تاتەو حەیاتێ بەینش وەشا. وێچش قاسمش وەش مسیۆ و ئاگاش جە مەسەلەکێچ هەنە. بەشکەم لالۊ نالە مسەفای ڕازی کەرۊ و هیجبی ئی کناچۍ کەرمۍ. ئەر هیجبیما کەردە و شیرینیما واردە، ئیتر دوێ ساڵێچ مەنۆوە، هیچ قەی نمەکەرۊ. کناچە و کوڕەکە یەکترشا گەرەکا. ئیتر با کەم ئی کوڕە خەفەتێ بلا دڵشەرە.
چېش ماچی یاسێ؟ ئاگات هەنە جە وېت؟ شێتە بیێنی؟گەرەکتا شەرمەزاروو دنیا و قیامەتیم کەرۍ، باسوو چیشی کەری، هیجبی چیشی و ژەنەو چیشی، دەی من ڕۊی دماو زەماوندەکێ ڕوەم هەنە تەماشەو چەما مسەفای تاتەیش کەروو، ئاخر حەیاتلێ وێچش ئینەیە قەبووڵ کەرۊ، دەی ئەر قاڵ زڕیا و خەڵکی زانا، سەوای ڕۊش من ڕوەم هەنە بزیەوەرە بەر، دەی خەڵک مەواچۆ کوڕەکە هەڵای خەتەنە نەکریان، ژەنیش پەی مارا، من ئی باروو گوناحیە نمەتاو کېشوو یاسێ!
ئەرۍ پیاکە ئەجۊ سەرو وېت نېیەنی، ئانە تۆنی شێت بېیەنی نەک من، ئانە تۆنی دنیات وەنە وېران بېیەن نەک من، گوناحوو چېشی، تۊ بەرەو کەعبەیت نەکەندەن، شەرمەزاری جە چیشی کەری هەیاس، عەیبێوی گۆرەت ئامان ملەرە کە پاسە ویرێ کەریۆ.
خۊ شکور ئاندە پیر نەبېیەنی تووشوو ویر شېیەی بیەبی!ی قەزیێ تەنیا دە دوانزە ساڵێش چەنە ۋېیەردەن، چەنی گرد چېوت ویر شیۆ، خۊ خاست ویرا، چا وەختەنە کوڕەکە کافرمانەکەش دەسو ئۊسا ئۆرەحمانیۆ دی، باوشیتەنە تن تن گرتەبێت. خۊ زانات چەنی شل بیەرە دەستۆ و بۍ هۊش کۆت!ویرتا ئا چن ساعاتە تاکو ئاماوە هۊش، چ حاڵێوما بێ، ویرتا گرەوینی ملو قورعانەکەیەرە و بەرزت کەردەبېوە ڕوەو ئاسمان و ڵاڵیێنیۆ ئۆ خوڎای تەنیا ئی جارە قاسمت دۆوە پەنە ئیتر هیچت چەنەش گەرەک نیا.
باسوو چیشی کەری هەیاس، هەڵای من تاوانبارە کەری، نازارم وەی کەردەن و دانم دەمشۊ، ئینەمە پەنە ماچی، دەی خۊ تۊ ئانەتە ویرا دوێ ساڵێ دماتەرش، واتما ئیسە ئیتر کوڕەکە تۆزێو گۆرەتەر بېیەن و ئاوەزش پەیدا کەردەن. هەم دیسان وەختێو کیفە سوورەکەو ئۊسا ئۆرەحمانیش دی، وەرهەیوانەکەنە پڕارە وار و خوڎای ڕەحمش پەنە کەرد کە سەرەش نەتەقاوە!
دەی ئانە بۍ ئەوەساڵە باسوو عەمەلیاتوو بیمارستانیما پەی کەرد تاکو بەڵکوو چاگە نەجاتش دەیمێ، وەختێو پەنەما وات: بەرمێت پەی بیمارستانی، هەر وەخت بۍ لەمەو وېش دڕۆ، دەی ئیتر چېشما پەنە کریۆ، سمەری کۆنێ مەکەرە وارە هەیاس، داخێ قەدیمیێم وەنە تازە مەکەرۊ.
هەیاس چا وەختەنە یاسێ قسەکا کەرۍ، دەسش دابېش چیروو تەۋېڵېش و ماتش کەردەبۍ. قسەکاو یاسێ سڕ کەردە بۍ و لوابێ خیاڵېرە. بە دەنگېوی ئارام واتش:
یاسێ گېیان تۊ ئەجۊت من ئیسە پەیشان نەبېیەنا پی وەزعێ، ئەجۊت من نېیەنا ویروو قاسمیەنە، ئی ساڵە دوور و درێژانە، هەمیشە دڵم مشتەمەنە بېیەن پەی ئی ڕۊیە. ئی کوڕە ئاقیب چەنی ژەنی بارۆ، چېش ڕوە مدۆ وەختێو ژەنەکېش بە مەسەلەکێ بزانۆ؟
هەیاس گېیان تەنیا حەیاتە متاوۆ ئی کوسپە شاریایە کە ساڵهای ساڵا ئینا سەرو دلوو قاسمیۆ لابەرۆ. ئەشق و وەشەویسی چەنەۋېیەردەی فرەش چەنەن و ئۆمێد وەش کەرۊ. ئی مەسەلێ بێجگەم من و تۊ و ئۊسا ئۆرەحمانی کەسیتەر نمەزانۊش. هەڵای حەیاتەیچ پی مەسەلێ ئەسڵەن نمەزانۆ.
ڕەزا بەهمەنی.[1]