حەمە ژەنی مارۊ
بەشۍ: یوەمە
ئەوەڵ شەو
ئازیزا، ئی داستانوو حەمەیە دلێ کۊمەڵگاو هۆرامانېیەنە ڕوەش دێنە و هیچ شکێوەش نېیەنە چەنە هەر کەس موانۊشۆ، یا ئەژنەویەنش یا دیەنش یا وېش بە جۊرێو ئامان سەرەشەرە.
حەمە نەقڵەکەش ئاندە وەش گېڵنۆوە، ئەر مزاندێ چاشتیتا ئینا سەرو ئەیریەو و یا ئەر وەختوو دوکتوریتا هەن، ئانەیە بزاندێ هەم چاشتەکێتا سۆچۆ وهەمیچ وەختەکەتا فەوتیۆ.
با بزانمێ حەمەی جوان و وەشپەنە کەوتە، چەنی باسوو شەوەو ئەوەلو زەماوندەکېش کەرۊ و چ هەڕێوەشا پەی هەسە کەردەنۆ تاکو ئا شەوە دۆش سەرەشەرە. ئانە وېتا و ئانە بەسەرئاماو حەمەی.
ئی داستانە، کەردەنم چن بەشی. هەر جارێو هەوڵ مڎەو بەشێوش پېشکەشتا کەروو.
حەمە ژەنیش پەی مێزاوە!
حەمە، لامەنە نیشتەرە و گېڵناشەو و واتش:
هەڵای خەتم نەدابێ، نزیکوو پانزە ساڵی بیەبێنێوە و خاڵ و مێڵو دەورانوو هەرزەکاری پۆمۆ بەر کەوتەبێ. سینێم و سەرو شانام کەوتێبێنێ ئێش و ئازار. فرەو وەختا ویرێ وەشێ ئێنێ سەرەمەرە و خیاڵېم لوێنێ سەرو کناچڵا. جار جار ئەر وەروو بەرېویەنە یا سەرو ڕایمەنە کناچېوەم دیێ، بە بۍ ئانەیە دەسو وېم بۊ، چەمېم لوێنێ شۊنیشەرە.
ئەڎام ۋاچۍ ڕۊڵە گېیان ئەو خوڎای زیادبۊ گەورە بېیەنی و ئیتر خەریکا کوچە کوچەی باڵغ بی. هەر وېمەو کەلیمێ باڵغیم پەنە وەشەبێ و فرەیچ نەزانێنێ باڵغی چېشا، تەنیا ئانەمە ئەژنەویەبێ تاکو باڵغ نەبی، ژەنیت پەی نمارا!
وەختێو ئەڎام ئی قسا دێ گوشمەرە، جە لەیوۆ وەشحاڵ بێنێ گەورە بېیەنا و ئیتر سەرەم ئینا دلێ سەرانە. جە لەیوتەریچۆ خەفەت گېرێمەرە، ئاخر کاکە ڕەحیمم سەرەڕاو ئانەیە، پەنج و شش ساڵێو جە من گەورەتەر بێ، هەڵای ژەنیش ناردێبێ. تاتەم فرە جارێ واتەبېش تاکو ڕەحیم سەر و سامانېو نەگېرۆ، ڕەتما وەڵان و دەسما مەلۆنە دلێ هیچ هەرمانېوتەری. ئیتر من زانێنێ ماناو ئا قسێ چېشەنە.
یانەو ئېمە پەنج زارۆڵێ بێنمێ، کاک ڕەحیمم گەورەو گردیما بۍ و دوێ واڵێما کە بەینوو من و کاک ڕەحیمیەنە بێنێ، هەردوێ شووشا کەردەبۍ و یانەو شوویەنە بێنێ. جە من گولانەتەرە تەنیا واڵېوەم بۍ و نامېش سۆسەنە بێ. سۆسەنە دەوروو دە ساڵێش بۍ وبۊنەو ئانەیۊ ئاخرینەو یانەکەیما بێ، لاو گردیماوە فرە نازارە و وەشەسیێ بێ، بە تایبەت من فرە وەشەم سیێ. هەر جارێو کە چەنی کاک ڕەحیمیم لوێنێ پەی تەوېڵۍ، نۆقڵێ ترش و شیرینېش پەی ئارێنێ، فرە حەزشا چەنە کەرۍ. وەیۋڵێوە زلەیچم پەی ئاردێبێ هەمیشە باوشیشەنە بێ. جار جار ئەر چېوێوی گولانەش پەی ئامایا وەرەو و یا نەوەشە کەوتێ، ئیتر دڵم گیریێرە و گەرد چېوم وەروو چەما گنێ.
ئیسەیچ قیژە و زریکەو ئا ڕوەیشە ئینا گۊشمەنە کە مەتی خەجێ ئامایبێ پەی کەپرەکێما. ئیتر چا ڕەوەو مەتی خەجێم وەروو چەما کەوتە و هەر لێوۆ چەمم پەنە کەوتایا خەریک بۍ هۆرش دڕوو و بێبێ پېسە دېۋێۋی وەروو چەمامەو.
ئا ڕوەمە هەرگیز ویر مەشۆوە، تەنیا حەفتێو بۍ کۆچما ئامابێ مڵکەرە. دۆروو چاشتینگای بۍ و تاتەم نەبۍ یانەنە و لوابێ پەی تەوېڵۍ. مەتی خەجێ و مامۆژەن ڕەعنام و ئەدام، دلێ کەپرەو وەروو بانو کێڵەکەیمانە نیشتێبێنېرە. سۆسەنەی واڵێچم چەولاشاوە بە وەیۋڵەکېشۆ خەریکەو گەمە کەردەی بێ. ئا ڕوە تاتەم وەڵێ ئانەیەنە بلۆ پەی تەوېڵۍ، بەرداش پەی مڵکی وارینی و واتش تاکو مەوۆ مشیۊ ئا گولۊ هەنارا گیواوەکەیش بڕنی و لاش بەری.
ڕەزا بەهمەنی.[1]