حەمە ژەنی مارۊ
بەشۍ: دوەمە
فرە مانیا بێنێ و وەختێو یاوانێ نزیکوو کۆگاکێ، مەتی خەجێم دیە بە سەرپۊشە چەرمەکەیشەو پاڵش دابێ کۊڵەکێ کەپرەکێوە و پەی مامۆژەنیم و ئەدایېم قسێ کەرۍ.
هەر دوورۆ منش دیا، کوچېو چەمېش ژیژێ کەردېوە و پەرساش ئۆ ئەدایېم: ئینە مەشیۆ حەمەبۊ؟
ئەڎام جوابش داوە و واتش:
ئەرۍ وەڵڵا مەتی خەجێ ئینە حەمەن ماشەڵڵا بېیەن پا کوڕیە کە وینیش.
- دەی ڕۊڵە مینا من مۆڵەقێوا نەڎیەن، ناشوکری خوڎای نەبۊ من هەر ئینانێ یانەکەنە و قاچێم نمەیام چەنی تاکو بزیەوەرە بەر و خەڵکی بوینوو. ئەر ئارۊیچ ڕەحیمی کوڕت سوارەو هەسەرێش نەکەردایانێ، دەی کەی من تاوێنێ بېیاو ئێگە.
وەختێو کوچېو نزیکتەر کەوتاوە، مەتی خەجێ دیسان دیا سەرتاپایمەرە و واتش:
ماشەڵڵا حەمە بېیەن بە چ کوڕېو! عەمر درێژبۊ یاخوڎا، ئانا خەریکا قولاپ کەرۊ! مینالێ، هۊشت بۊ تاکو دێر نەبېیەن، مشوورێوش بوەرە با دەرگېڵ نەبۊ!
بخوڎا مەتی خەجێ گېیان هەر دڵم ئینا لاشەو، دەی ئانە وێچش مژنەوۆ مزانۆ چند خەمش موەروو.
پڕ بە دڵ حەزم نەکەرد کۆگاکێما خەڵکش چەنە بێ، حەز کەرېنێ کیشیەوەرە و مانیای بەر کەروو. هەڵای چند گەزێوم مەنەبۍ بېیاو لاشا، ئی قسا ئەژنەوێنێ و پەیم تازێ بێنێ. مەتی خەجێ هەر دوورەو بە ئەرەنیشتەی دەسێش بەرزێ کەردەی و واتش:
ئابۊ حەمە گېیان با دەس کەروو ملت، قۆربانەو ئا قەڎ و باڵایتە بوو.
لوانێ وەرەو و ملم ئاستەرە تاکو سەرو شاناش و دەسش کەرد ملم. سەرپۊشەکەش و دلێ باوشێش بوەو سمڵ و مێخەکی دێنێ. چا وەختەنە بوەکێ لوا سەرەمەرە، مامای بە ڕەحمەتیەم کەوتەو ویرم کە هەمیشە شەوېنە دلێ باوشێشەنە وەرمم گنێ پۊرە.
ئا ڕوە سەرەم سڕ مەنە بێ، مەتی خەجێ پەی چیشی پا وەزعێوە ئامێبێ پەی مڵکوو وېما. زانێنێ مەتی خەجێ کوچېو جەراحی مزانۆ و دەس و قاچو زارۆڵا وەختێو ۋردەڵێ شێ یا بەرشێ، گېرێشۆ و جار جاریچ ئەر پاو بزێوێ مەڕیێ، گېرێشەنە دلێ تەتەڵێ نەیجە و هێڵەی.
ئاخر جارێو کە من مەتی خەجێم دیێبێ، چوار ساڵێ چېوەڵتەر بۍ یانەو مامۆیمەنە. هەر وېمەو شکەم پەی چېوێوی بەردەێبێ و نەزانێنێ چېشا. یەک جار لاو یۊ جە ڕەفێقەکامۆ ئەژنەویەبێم، مەتی خەجێ بېژگەم جەڕاحیەکەیچش، خەتەنەو کناچڵایچ کەرۊ!
بۊنەو ئانەیۊ ویر و خیاڵم لوا سەرو سۆسەنەی واڵێم و قاچێم بەرایی نەڎێنێ کۆگاکێ بازوو جیا. تاکو سەرو هەسارەکێما لوانێ و گېڵانێ و چڕیم ئۆ سۆسەنێ، چەنی دەنگەکەیم، ئەڎام جوابش داوە و واتش:
ڕۆڵە حەمە، ئاویم گەرمە کەردێنێ و سەرەو سۆسەنێ گەرەکما شۆروو، پەی چیشیت چڕیە، هەرمانەت چېشەنە؟ جارێو با دمایی.
ڕەزا بەهمەنی.[1]