حەمە ژەنی مارۊ
بەشۍ: چوارەمە

ئا هامنە بە بۊنەو وەهارێوی وەشیەو کە بېش، تۆزێو زوو کۆچما ئامابێ مڵکەرە. هامن پەی من فرە وەش نەبۍ، چوونکوم جە فرەو ڕەفێقەکام بڕیێنێ و نەوینێنېشا. حەز کەرېنێ زووتەر پاییز بێوە و بلمێوە دەگا. چاگە، گرد وېرەگانێو سەرو بانو مزگیەو چەنی ڕەفێقا گلێرێ بێنمێوە و بە قسێ وەشێ تاکو دماو بانگوو مەغریبی مەنێنمێوە. ڕاو هانەو ژەنایچ لا مزگیەکەیەنە ویەرێ و کناچڵێ هەم عەمرێ وېما بە کونە و سەتڵە ئاوەکاشاوە ئاماو و لوای کەرېنێ. جار جار بە سڵامێو و هەوالپەرسیێوی سادە، دڵما پەڕ بۍ جە شەوق و شاڎیی.
دلۍ مڵکیەنە، هەمیشە من وېم دزیێنەی جە هەرمانکەردەی و ئاودارای. هەمیشە تاتەم و ئەڎام سەرو من چەکل و پیکانېشا بێنێ. تاتەم واچۍ: ئی هەتیمە سەرەوېرانە ئەو هیچکامیما مەشۆ، هەر ڕۊ بۊوە، کەس مەزانۆ کۆگە ملۆ و چېش کەرۊ، تاڵێو قژۍ سۆسەنلێ مەفاڕوەو دە کوڕێ چامنۍ!
ئەڎایچم پی قسێ تاتەیمە ئێر گېرێ و پیایانە جوابش دېوە و واچۍ: دەی کەریم چېشش کەردەن، جوانا و هەقو وېشا، چی وازش چەنە نماری، گەرەکتا بارە گزریێت پەی کېشۆ؟ پی قسا ئەدایمە، هەتا ئەی فرەتەر فوو کریێنە چیروو باڵام و فرەتەر لوێنێ پیلا و پەولارە.
یانەو ئېمە بە پېچەوانەو یانەکاتەری تاتەم فرە فەقیر و کەم قسە بێ، وەلێم ئەڎام قسێ نەڎێ وەروو کەسیەو و هازمەش فرە بۍ و زاڵە بۍ ملو تاتەیمەرە. وەختێو چەنی تاتەیم سەرو مەسەلێوێ گنێنێ جەڕ و باس و هاوار و داڎ، وازش چەنە نارێ تاکو بەزنېش. ئیتر تاتەیچم تاقەتش نەمەنێ و قسێوەش بۍ هەمیشە ئەواخوڎاش کەرېوە و واچۍ: بخوڎا مینالێ یانەو ئېمەنە زوان بڕانا من ئیتر دەرەقەتو تۊ نمەو هەرچی کەری کەرە.
ئا ساڵە کە ئاخرین هامنوو هەرزەکایم بۍ هەرگیز ویرم مەشۆوە. ئاخر من هەڵای هەرزەکاریم دەس پەنە نەکەردەبۍ، بە پەلە ژەنیشا پەی ئارداو بە حەسابوو وېشا کەرداشا پیا. بۍ خەبەر چانەیە کە من هەڵایی گەمە کەردەی چەنی زارۆڵام پەنە وەش بێ.
هەر ئا هامنە، ڕوێوی گەرم بۍ و قاقی دابېشەرە. کاک ڕەحیمم چەنی شەبەقی بارە تەماتەکەش پېسەو ڕوەکاتەری بەردەبێ پەی تەوېڵۍ. منیچ سەحبێ زوو تاتەیم بە سیخۆرمێ هۆرزنا بێنێ تاکو هەسارەکێ بەرە دەو و بنیەوش تەڵانەو تەماتەکەی، تاتەم واچۍ: تەماتە کە چنیاوە، مشیۊ بە فێنکی سەحبی ئاویش داری ئڼا وشک بۊ.
ئاوەو تەماتەکەیم دارا و گېڵانەی پەی لاو کۆگاکێ، وەختێو نزیکوو پەڕچینو کەپرەکێ کەوتاوە، تاتەم و ئەڎام دیێم بە گەرمی لوێبێنێنە دلێ یەکتری و خەریکێ قسە کەردەی بێنێ. تاکو ئیسە پاسە نەڎێبێنێم. هەر وېمەو شکێوەم کەردە کە باسوو چېوێوی تایبەتی کەرا. پاڵو پەڕچینەکەیەنە نیشتارە و گۊشم چۆوە گرتێ.
کەریم، مزانی ماوێوا حەمە کەوتەن قوتە قوتەو ئی لا و ئۆ لا کەردەی. بخوڎا تەرسوو پېسە ڕەحیمی برایش پەڼێوە بارۆ سەرەو وېشەرە و ئېمەیچ تووشێ خەفەتێوی کەرۊ. ماچوو با سەرەش قەبوڵنمێ یاگێوەرە و تاکو دێر نەبېیەن ژەنېوەش پەی بارمێ.
تاتەیم جواب داوە: مینا باسوو چیشی کەری، حەمە خۊ هەڵای گونجەنەکەو وېش مەتاۋۊ بینۆ. ئیسەیچ ئەر تۊ وېت دلێ تەشتیەنە سەرەش نەشۆری، ئاوەزوو ئانەیشە نیا، وېش لاشەو وېش شۆرۆ. ئیتر ژەنەو چیشی و چېو و چیشی. ڕواسە نەلێ وڵەرە، هەژگێوەیچ بێنێ قلینچقەشەرە. چی واز نماری کوڕەکەی. ڕەحیمیچ هیچ پەڼێوەش نەڎاینە. ئەر دڵداریبۊ، گرد کەسی کەردەنش. ئانە جافرە شەل قینەو قەڎیمی ئینا دڵشەنە، کناچەکېش مەڎۊ بە ئېمە. ئیتر ئی قسا ئاڼدە واخوا مەکەرەو لا منەنە مینا!
ئەڎام ماچۊ: ئەی هەی کەریم تۆیچ ئیتر، خۊ مەیاروو قسێوەت لاوە کەروو. خۊ کفرم نەکەرد. گەرەکم بۍ ئانەتە پەنە واچوو، من دڵم تەرسان بخوڎا هەرچی ڕەحیمی پاسە وینوو جەرگم سۆچای سۆچۆ و مەیاروو قسێوەیچ کەروو. دوور گېیانیش ڕەنگەو مەردەیش وەنە نیشتێنە. تۊ وېت خاس مزانێ ئا قەڵاخی سەرەو جافریە ئینە پەی یەرێ ساڵا ملۆ چېشش سەرو ئا کوڕەیەرە ئاردەن. نە ئینە هەن شوو کەرۊ یۆتەری و بلۆ وازش چەنە بارۆ، و نە ئینەیچە هەن زۊر پەی تاتەیش بارۆ و هەرمانەکۍ بڕۊوە. دەی تەرسوو حەمەلەیچ تووشوو وەزعێوە چامنۍبۊ. بخوڎا چی زەمانەنە گرد چېو ئینا ڕاوە و کەس بە کەسی متمانێ مەکەرۊ. کەریم، با تاکو دێر نەبېیەن، سەرەش کەرمۍ وڵێوەرە و شەریکێوەش پەی پەیدا کەرمۍ. ماچوو با ئا کناچۍ مسەفایە سۆسەکانەنە جە دەسو وېما نەڎەیمێ، بخوڎا شەمعێ واڵێم ماچۊ ئەجۊ خەرمانەو گوڵانە.
ئەرۍ مینا چېش ماچی، هۊشوو وېت هەنی؟ پېسە وېت وات دەی ئانە وەزعەو ڕەحیمیەنە. جارێو خۊ ئېمە دەسو ئاڎیەو گیرمان کەردەن، شەریکێ ئاڎی زارۆڵێچشا یاوێ پەنە. دماو ئانەیچە، حەمەلە هەڵای بوەو شۊتی دەمشەو مەی مینا. دەی گوایا ئینە ئامێنی چارەسەرت ئیسەنەو؟ گۆبەندە سەرو گۆبەندێ! ئانە ئەقڵ و ئاوەرزا تۊ هەنت؟ سەرباقی گردو ئی کوسپایچە، ئا یانە کە تۊ باسشا کەری، ئینای چەودیمەنە و ئېمە تاکو ئیسە نەڐیێنێ. حەمەیچ کناچەکېش چەم پەنە نەکەوتێنە. دەی ئیتر شێتم مەکەرە واز جە کوڕەکەی بارە، هەر ئیسەو گەرەکتا سەرەش وەنە شێونی. خۊ وېت ئانەیچە مزانی ئاما و لوای پەی ئۆڐیمی چی وەختەنە پېسە ئۊسای نەمەنەن و فرە سەختشا کەردەنەو.
کەریم تۊ چی ئاڼە چېو زل کەری، چی کەردت تەیارە! دەی ئەر کناچەکێ عالەبۊ و نەجیب زاڎۍ بۊ، حەمەیچ جوانا و فرە زوو مەیرە چەنیش و ئیتر گۆبەنڎەو چیشی و چېو چیشی کەریم. شەمعێ واڵێم ماچۊ: من دانم گوششارە و پاسە دیارا تاموو دەمیشا وەشا و ڕازیێنێ پی هەرمانێ.
مینا واچە من هەرمانەکېم تەمامنان و ئیتر ئی پەرسە وەرگانێ چېشێنێ ئەو منشا کەری! بیە با پەنەت واچوو هەرچی کەری دمایی وەرپەرسش وېتەنی، ئیتر من دەرەقەتو تۊ نمەو مینا، جاری وەڵینیچ ئی باسێتە کەردێ، زانام ئینە کارو شەمعێ واڵێتا. شەمعێ واڵێت ئەر ژیرە بېیای، شوو نەکەرۍ سۆسەکانەیا، جاری چامنە هەن ساڵێو جارێویچ کەس و کارەکەیش چی دەگاینە نمەوینۊ.
قسەکێ ئەڎا و تاتەیم ئاڼە درێژەشا کېشا، ئیتر من پاڵو پەڕچینەکەیەنە تاقەتم نەمەن. وەختێو وېم بەر وست و دیاشا، قسەکېشا بڕیێ بارێ تەرەرە.
ڕەزا بەهمەنی.[1]