حەمە ژەنی مارۊ
بەشۍ: پەنجەمە
ماوێوش پەو شی، پاسە بزانو ئەڎام، تاتەم و ڕەحیمی برامش پی کاریە ڕازیێ کەردێبێنی، بە بۍ ئانەیە چېوێو بە من واچۆ. شکەم ئەو ئانەیە بەرڎېبێ، ئەدام نەیارێ ڕېک قسەکێ لاو منەو کەرۊ، وەلێم پەی ئانەیە تاموو دەمو من کەرۊ و بزانۆ جوابو من چېشا، جار جارێو تەشەرێوە شانێ و قسێوە فڕە دێ پەیم و ئەر هەرمانۍو یا هەرەکەتێوەی وەشم کەردایا و بە دڵش بېیایا، ۋاچۍ: ئۆۆ کڕو ئەڎالېش ئانا ژەنیم پەی دیاری کەردەن، بخوڎا بە دەسی وېم مارووش یانە پەیش، جار جاریچ ئەر هەرمانێوەی زارۆڵانێم کەردایاو بېزارەم کەردەی، ۋاچۍ: دەی تەریقبۊ ئیتر حەمەلە، کوچېو ژیر بە، تۊ دوێ ڕۋېتەر نامبارکی ژەنی ماری یانە!
ئەڎام هەم بە قینی و هەم بە وەشە، دێ گۊشمەرە ژەنیم پەی مارۆ.
ڕاسەکېش من وېم جە لایوەو پی قسا حەز کەرېنێ، وەلێم چەولایچەو هەڵای ڕوەم چەنی ئەدایېم نەکریایبێوە و نەتاوێنێ چا بارەو جوابش دەوۆ.
ڕوێو کاک ڕەحیمم تازە تەوېڵۍ ئامابێوە، سەعاتێوە دەسیەش پەی ئاردەبێنێ، ئەجۍ گردو دنیایشا دانا، سەعاتەکېش کەردە دەسم و واتش: حەمە هۊشتبۊ، ئی سەعاتێ مشیۊ شەو و ڕوێو جارێو قورمیش کریۆ، ئەر وەخت و ناوەخت قۆرمیشەش کەری، زوو خرابیۆ. منیچ واتم سەرو چەما، هەر چا وەختەنە کەردەش دەسم، قورمیشەم کەردە و قۆڵو کەواکەیم هۆرداوە تاکو خاس دوورەو دیارەبۊ و چەنی هەر جارێوی تەماشەش کەرېنێ، نیێنېش گۊشایچمەو بزانوو هەرمانە کەرۊ یا نا.
زانام کاک ڕەحیمم قسێوەش پەنەنە، ئا سەعاتێچە پەیش ئاردەبێنێ بۍ مەرام نەبۍ. هەردویما سەرو توختانوو هەسارەکێوە نیشتێمێرە و ڕوەش کەردانە و واتش: حەمە قسێوەت لاوە کەروو با جارێو بەینوو وېمانە مەنۆوە و کەس نەزانۆ.
واتم: قسێ چېشی کاکە ڕەحیم؟
ماچۊ: ئارۊ من جە تەوېڵېوە لوانێ پەی سۆسەکانێ و سەرێوو یانەو مەتی شەمعێم دا. کناچە هامسێوەشا هەنە فەرە عەنتیکەنە، حەمە جە دەسو وېت مەڎەش با چەنی تاتەیم قسێ کەروو و هیجبیش کەرمۍ پەیت، مەتی شەمعێم ۋاچۍ: یانېوی ڕېک و پێکېنۍ و ئاڎە متاوۆ قسێشا چەنی کەرۊن.
هەرچن وەڵتەر چا بارەو قسێ کەوتێبێنێ گۊشم، وەلێم پاسە دیار بۍ ئاڎۍ پی کاریە بڕیەینێ وەنە و تەنیا منەنا خەبەرم نیا. دەگا پەڕەنە و مەتیە کەڕەنە، کوچېو ویرێم کەردێ و گەرەکم بۍ قسێ کەروو، ناسش دەم کەروۆ و درێژەش داوە پەنە و واتش:
بڎیە حەمە، وەڵێ ئانەیەنە دەم کەریەو، مزانوو چېش ماچی. من ژەن ئاوەر نېیەنا، تاکو فەرخیلێ شوو نەکەرۊ، ئی ڕەحیمە ژەنی نمارۆ، بەخوڎا بۊ بە ئەڎاو حەوت زارۆڵایچ من هەر مدروو دیارشەو. تۊ وېت مەبینە بە منەو.
منیچ واتم: کاکە ڕەحیم باسوو چېشی کەری! ئاخر خۊ من هەڵای کناچەکێم نەڎیێنە، کەس و قۆمەکایچش مەژناسوو و مەزانۇو نامېش چېشەنە و دوختش چەنینا. تۊ وېت چن ساڵێن دڵداری کەری و فەرخیەیچ هامساتەنە و گرد ڕوێو وینیش، مزانی چېشەنە، مزانی ڕەفتش چەنینا، هەر بە زارۆڵەی تاکو ئیسە ئینایدێ پێوەرە و جە گردچېوو یەکتری ئاگادارێندێ و مېیاودێنە، ئیسە ماچی بە من کناچېوێ بارە یانە، تاکو ئیسە نەدیێنەم؟
ماچۊ: ئاخر دڵداریم کەرد پەوکەی وەزعەم وەش هەنە! حەمە من نەواتەن کناچەکێ مەوینە، بەڵام من چا بارەو تەجرەبەم هەن و مزانوو، من کەوتەنانە چاڵێوە ڕاو وەر و دمایم وەنە بڕیەینە. حەز مەکەروو تۆیچ گنېیەنە ئا وەزعێ کە منش کەوتەنانە. تۊ خەموو ئانەیتە نەبۊ، من بەرووت پەی سۆسەکانێ تاکو وەنەوشێ بوینی.[1]