حەمە ژەنی مارۊ
بەشۍ: نۊهەمە

ئیجازەکەما تەنیا پەی ئا ڕوەیە بۍ و گردیما گېڵایمێ و ئامایمێ پیڎیمەرە. چا ڕوۆ وەنۊشەم مارە بڕیە، فرە وېم گەورەتەر جە عەمرو وېم زانێنێ. فرە گەمێ زارۊڵانێ بێنێ کە وەڵتەر چەنی ڕەفیقەکام کەردێبێنێم، ئیسە گردم تەرکێ کەردێبێنێ.
دۆروو دوێ حەفتێ لوا، تاتەم فرە پەلەش بۍ زەماوندەکێ هەرچی زووتەر کریۆ. وەزعەو حدوودی خاسە نەبۍ. ڕوەکێ فرە درێژێ بیێبێنێ و وەخت بە سەختی وەنەم ویەرێ. قەرارم دا چەنی وېم، وەڵێ ئانەیەنە ڕۊ زەماوندەکێم بەی وەرۆ، هەر مشیۊ وەنۊشێ جارێوتەر وینوو و نزیکۆ قسێش چەنی کەروو.
سەحبانېو زوو چەنی ئەدێیم هۆرسا، حەز نەکەرېنێ بە کەسی واچوو ملای ملو پۆڎیمەرە، وەلێم هەر مەشیێ ئەڎێیم زانێ.
وەختێو واتەم پەنە ملای ملو پۆدیمەرە، پەشۆکیا و بە دەنگېوی گیریاوە واتش: ڕۊڵە ڕجات وەنە کەروو وېت تەنیا مەلە، وەزعەکێ خرابە هەنە، مدرە تاکو وەختێو کاک ڕەحیمت بلۆ ئا وەختە تۆیچ چەنیش لوە.
هەرچن گەرەکم نەبۍ قسەکێ ئەڎێم ماڕوو، وەلێم قەرارێو بۍ و دابێم.
ڕاو حدوودیم گرتەنە وەر و یاگێوەنە کە کەمتەر شکەش وەنە لوێ، لوانێ پۆدیمەرە و یاوانێ سۆسەکانە. یەکڕاس لوانێ پەی یانەو هەسوورەیم. یانەکەم ویرەنە بێ، چوون ڕۊ مارەبڕیەیەکەی مامۆیم نیشانە دابێنێ و زانێنێ چکۆوەن.
دۆروو ویس گەزێویم مەنەبۍ بېیاو وەروو بەرەکەیشا، دێدە یاسێ هەسروەم دیەم دلێ وەرهەیوانەکەیشانە خەریکەو هەڵیز ژەنەی بێ. سەرسەحەب بۍ و نانووچای سەحبی تازە وریابێ، وەرەتاوێوی وەشی پاییزی شۆڵەش دابێرە سەرو دەگایرە و وەختێو دلێ گەڵا زەرد و سوورەکانە ڕەڎ بێ، دڵی ئەڕفانێ.
دەگا ئاوەڎانیش پۆوە دیارە بۍ و زارۆڵێ وەروو بەرانە و دلێ کوجیەکانە گەمە کەرېنێ و قلەو خوەیشا ئەژنەویێ. هەرچن چا وەختەنە فرە پەشۆکیا بێنێ و تەنگەتاوی گرتەبێنېرە، بەڵام وەختێو دەنگو خوەو زارۆڵەکا ئەژنەوێنێ، هەس بە وەشی کەرېنێ، چوون وېم ئا دەورانمە تازە ویرابێرە.
کوچە کوچەی نزیکوو تفەکێ وەروو بەرەی کۆتاوە. گەڵاو تفەکێ جە گردو دارەکاتەری زەردتەرە بۍ و نیمەش ڕېزابێ وەروو بەرەی و بەشێویچش وای ئاردەبێرە دلێ کوجیەکێ.
کەڵەکێوەی تەوەنینەی گولانۍ کوجیەکېش جە یانەکا جیا کەردێبێوە. چا وەختەنە یاوانێ لا کەڵەکەکێ، دوێ کناچڵێم دیێ بنەو تفەکێنە مدرێبێنېرە و قسێ کەرېنێ.
هەردوێ پەشتیشا ئۆ منۆ بۍ و سنح و ساڵیچشا پېسە یۆی دیار بێ. هەر جە پەشتیۆ وەنۊشەم ئەژناساوە. باڵاش تۆزێو چەوێ بەرزتەر بۍ و سەرپۊشێوی ناسکی ڕەنگ بووڵین سەرەشۆ بێ. گجیێوی سورەتیش پۊرە بۍ و فەقیانەکېش پەشتەو ملیشۆ لکەش دێیبێنێ.
چا وەختەنە، کوچېو ژڵێویا و لاش کەردۆ ڕوەو من، بە ژڵېوەکەش ساقوو تفەکێ کۆتەنە بەینما، هەر ئانە بی پانەیە ئاڎە منش نەڎیا، بەڵام من پەی ساتێوی فرە کوڵی ڕوەو ئاڎېم دیە.
دەنگو دێدە یاسێ هەسروېم ئاما واتش:
وەنۊش ڕۊڵە، ئا سەتڵەو ئاوېمە پەی بارە سەر، هەڵای قسەکېش چەنی وەنۊشێ تەمامێ نەکەردێبێنێ، چەمېش لوێینە دلێ چەما من، کوچېو مدرا و سەرەش سڕ مەن. بە دەنگېوی بەرز و ڕوێوەی وەشۆ واتش:
حەمە گېیان ئینە چکۆوە ڕۊڵە کەی ئامانی؟ ئابۊ سەر قۆربانەت بوو.
چەنی قسەکېش پلەکانەکارە بە ڕەمای ئامارە وار و دەسش کەرد ملم. هەر چا وەختەنە دەسما کەرد سڵام و ئەحواڵ پەرسی، وەنۊشە دیام پۊرە و ماتش کەرد. ویرم نېیا سڵامش کەردا یا نا، بەڵام دیار بۍ فرە شەرمم چەنە کەرۍ، پەیم سەمەرە بۍ ئاخر عەمروو من و وەنۊشێ ئاڼە بەینش نەبۍ، ئانەمە چن جارێ لا شەرمینێ مەتیەزێمۆ ئەژنەویەبێ کە وەنۊشە فرە زارۆڵێنە و ئاگات چەنەشبۊ.
کەس بە من نەواچۍ زارۆڵەنی، گاهەز بۊنەو ئانەیۊ بۍ کە سەر و مەقولم ئۆ پیای شێ، لا ڕەفێقەکایچمۆ فرە چېوێ فێر بیەبێنێ و قسەکێم جە عەمریم زلتەرێ بێنێ.
هەر چوارما جە پلەکانەکارە لوایمێ سەر. هەسروەم وەڵێمانە بێ، وەنۊشەو و ڕەفێقەکېش دماو منۆ بێنێ، هۆڵمدا جە دلێ پلەکانەکارە قسێوەش چەنی کەروو، لام کەردۆ دیانېش پۊرە، بە هیچ جۊرێو سەرەش بەرز نەکەرېوە تاکو میاچەماش وینوو. دڵم پەی وېم مەن، ئینە لا وېشۆ مارە بڕیێبێ و بە حەساب ژەنیم بێ. پاسە بزانوو هەڵای نەزانێ مارە بڕیەی چېشا.
گۊشم نەڎا پەنە و لوایمێ سەر. هەسروەم هەڵیزەکېش ژەنێبێ و کەرەکېش دلێ جامۆڵێوەنە نیێبێرە. زاناش نان و چای سەحبیم نەواردەن. چایێوش کەردو کەرەکێ و نان و ماسېوش نیارە وەروو دەمیم. فرە ئاورام بێ، چاوەختەنە نان و چایەکەی وەرێنێ، هەسروەم سەرو یۆی قسێ کەرۍ و پەرسێ کەس و کاری و ئی دیم و ئۆ دیمیم چەنە کەرۍ، منیچ مەجبوور بێنێ جوابش بڎەوە.
چېوێو کە فرە پەیم تازە بێ، وەنۊشە وەختێو من قسێ کەرېنێ دیێم پۊرە، وەلێم وەختێو من دیێنېش پۊرە ئاڎە سەرە وزێرە، فرە چانەیە تۊڕە بێنێ.
جە گەرمەو ئی قسانە بێنمێ، تەقەو دەربازەکەو واری ئاما، کاک مسەفای هەسوورەم بۍ چەنی کوڕە گۆرەکەیشا بە چنگڵېو بەیۍ زەردېوە ئامێ سەر. بە ئامایشا، حەزم نەکەرد و پڕ بە دڵ پەنەم ناوەش بێ، زانێنێ ئا ڕوە ئیتر هیچ فرسەتێو تەرم گیر نمێ تاکو چەنی وەنۊشێ قسێ کەروو.
فرە بە گەرمی ئامێ دەممۆ و ئی لاو ئۆ لاشا ماچ کەردا. هەر ئاڎۍ ئامێ سەر وەنۊشە و ڕەفێقەکېش ئامێرە واروو چاگە نەمەنێ.
قسێ دەسشا پەنە کەرد. ئا پەرس و جوابە کە هەسروېم کەردەبېنېش وەنە، دیسان مەشیێ پەی هەسوورەیچم گېڵنێنێ.
قسێ کاک مسەفای هەسوورەیم پەی من فرە بۍ یاگێ بێنێ. قسەکېش هیچ پێوەنێوشا بە ژیوای من و وەنۊشێوە نەبېنێ. باسوو سیاسەتی کەرۍ و من هیچم حاڵی نەبۍ. هەر وېشۆ دژمانی دێ شاو ئێرانی و باسوو شۆرەوی و ئەمریکای کەرۍ. دماو نیم سەعاتێوی بېزار بېیا و بەهانېوەم گرتە و واتم ملو پەی یانەو مەتیێم و دمایی مەوۆ.
ڕەزا بەهمەنی.[1]