حەمە ژەنی مارۊ
بەشۍ: دواڼزەهەمە

چېوێو کە فرە سەرنجم لوا سەرش ئانە بۍ کە زانێنێ حاڵش خاس نېیا و نۆعێوەنە، هەرچا وەختەنە سەرو هەسەرەکێوە وەسەرە، خەریک بۍ داریۆوە، چا چن هەنگامەیچەنە تاکو یاوایمێ وەروو بەرەی، نەتاوێ خاس وېش گېرۆ سەرو پەیاوە.
ئیسەیچ کە وینێنېش، لار نیشتێبێرە، ڕاس و ڕېک نەتاوێ بنیشۆرە و زوو زوو گنێ لارە و تڼ چەمۍ قووجنێ و دیار بۍ ئېشێوش بۍ و ڕوەش نەبۍ هیچ واچۆ. هەر ئینە بی بە بهانېوە تاکو سەرو قساش چەنی کەروۆ و پەرسام:
وەنۊش گېیان چېشتا چی مەتاوی ڕېک بنیشیەرە ئەر چېوێو هەن بە من بواچە؟
بە بۍ ئانەیە تەماشەم کەرۊ، سەرەش وسەبێرە و واتش:
سەرو هەسەرەکێوە قاچێم فرە سڕێ بیێ و ئاگەمە فرە مېشۊ!دەسش بەرد پەی واروو مازیش و بە شەرمێوۆ سەرەش بەرز کەردۆ و دیام پۊرە.
منیچ ئیسە ئیتر بەهانېوەم دەس کۆتێبێ تاکو کوچېو گجیەکەش هۆردەوۆ و تەماشەو واروو سمتێش و دۆر و بەرەکەیش کەروو.
وەختێو بەینوو ڕاناش و واروو مازیش دیم، دنیام وەروو چەما کۆت. سوور بیەبێ ئەجۍ کەبابت کەردەن. یەکسەر زانام سواری هەسەرەکێ پاسە پەنە کەردێنە، دەسم کەرد قسەواتەی و دژماندای پا کەسیە کە سوارەش کەردێنە:
ئەی نەژیودێ پەی وېتا و ئەقڵیتا، پوکاڵاوەتابۊ پەی سەلێقە و سامانیتا، کورە خۊ ئاڼە ئاوەزشا نەبېیەن تاکو دۊشەکڵېو بنیا سەرو کۆپانەو هەسەرەکێوە تاکو تۊ پاستە پەنە نێ؟ ئاخر کۆپانەو هەسەرێ وېش ڕووشەنە، مۆجەکێچ جە کۆپانەکێ خرابتەر، ئا گردو ڕې، جە سۆسەکانە تاکو ئێگە، دەی چەنی مەنێنی؟
چا وەختەنە دۆرم هۊر گرتە بۍ و بە تووڕەییۆ ئی قسا کەرېنێ پەیش، بە بێدەنگی چیروو لچانە دەسش کەرد خوای و جار جارێویچ قسێوە کوڵە کەرۍ نەزانێنێ چېش ماچۊ.
هۆرساوە و لوانێ دلێ یاگە و بانەکەیەنە دوێ سەرنگێم بەر ئاردێ. دانێوەشا نیام چېرش و ئۆدانەکێچشا پەشتەو مازیش. فرە حەزش کەرد و تۆزێو بە ڕەحەتی سەرو سەرنگاکێوە نیشتەرە و پاڵش داوە و ئارامە بیۆ. جە ڕواڵەتشەرە دیار بۍ و زانێ وەشەم مسیۆ.
ئینە فرسەتێو بێ، چا قساشە فرەتەر پەی کەروو تاکو تۆزێو پەشۆکیۆ و ئێش و ئازارەکەش ویر بشۆوە. چی دلێ قسانە بێنمێ، تەقەو بەرەکەی ئاما و دەنگو ئەڎێم هۆرس. بەرەکە تریشکێوەش چەنە بێ. لوانێ وەرۆ و چەمم نېیا تریشکەکېوە و مڎیەو ئەڎام و پاوەیۋەکێ پەشتەو بەرەکەیشا گرتەن و پەلەشانە و تەماڎارێنێ زووتەر من هەرمانەکۍ تەمانوو و بزیەوەرە بەر.
واتم ئەڎا چېش ماچی؟
ماچۊ: ئەرۍ چېش بی حەمە ڕۊڵە؟
جارێو ئەڎا!
وەختێو تەقەو بەرەکەی ئێ و ئەڎام یۊ سەرو یۆی چڕێم وەنە، گرد چېوم وەنە تێک شۍ، دڵەۋرکێ گېرێمەرە و قینیم گنێ چەنەشا. ئەڎام و ئاڎۍ هیچکام جە وەزعەو وەنۊشێ ئاگاڎارێ نەبېنێ.
پا جۊرە دۆروو سەعاتێوی ۋېیەرد، جە دوودەری هۆڎەکەیەنە، تەماشێو بەریم کەرد. ڕەفێقەکێم دیێم، خوێنێ و چەنی یەکتری قسێ کەرېنێ. خاس زانێنێ باسوو من کەرا و چەمەڕایی کەرېنێ تاکو من هەرچی زووتەر بە سەربەرزی! هەرمانەکۍ تەمامنوو و بلو بەر.
دلۍ تریشکەو بەرەکەیەنە بېژگەم ئەڎێم و پاوەیۋەکێ، کاکە ڕەحیمیم وەروو بەرەیەنە وینێنێ، ئێ و لوێ و زوو زوو تەماشەو سەعاتەکېش کەرۍ.
چن دەیێقێو ماتڵ بېیا و دیسان لوانێ پەی لاو وەنەوشێ و لاشەنە نیشتانېراوە و دەسما کەردۆ قسە کەردەی. هەرچی فرەتەر نەقڵێش پەی گېڵنێنێ، زیاتەر تەماشەم کەرۍ و کوچە کوچەی خەریک بۍ سامش چەنەم مەڕیای مەڕیێ.
باسێو وېمم پەی گېڵناوە، کە جارێوشا دەسم بەردەبێ دلێ قڕۆڵیەرە تاکو بەچە سمۆرێ بەر باروو و ئەڎاو سمۊرەکا گەسە بێنێ و دەسیم ۋناڵینێ بیێبێنێ.
دلێ ئی قسانە بێنمێ، جە پڕێوەنە ئاڎییچە بۍ دەنگیەکەو وېش ماڕا و کۆتە قسە کەردەی. پاسە وېش نیشانە دێ، نەرەجیێ وەیوەنە و ئیسە مشیۊ دەس گیریۆ!
ڕاسەکېش منیچ ئاڼە لوابێنێنە دلێ قسەکا، وېمم ویر شیەبێوە، چوون عەمرەکەیچما نزیکو یۆی بێ، هەتا زیاتەر قسێ کەرېنمێ فرەتەر جە یۆی نزیکێ گنێنمێوە.
هەر چن دەیێقێ جارێو تەقەو بەرەکەی ئێ و دەنگو ئەڎێم ئەژنەوێنێ. زانێنێ ڕوێوی درێژشا وەرەنە بېیەن و پەلەشانە هەرچی زووتەر من هەرمانەکێ کەروو و بزیەوەرە و ئاڎۍ ئێسراحەت کەرا و بوسا.
دێرش کەردەبۍ، بۊڵەبۊڵو ئەڎێم ئەژنەوێنێ و کەکېوە نەبۍ بە مێمانم. گۊشم شل نەبۍ و گردو هۊش و ویریم لا وەنۊشێوە بێ.
وەنۊشە جار جار وەختێو قاچش ژڵێونێ، میاچەما دېوە پێوەرە. دیار بۍ هەڵای هەر ئێشش مەنەبۍ. هەر مەشیێ هەرمانېوەم پەی کەم کەردەو ئێشەکەیش کەردێ. کۆتۆ ویرم جارێوشا دەسم سۆتە بۍ و پەترۆکەش بەسە بێ، ئەڎام کەرېش دێ وەنە و واچۍ ئی کەرۍ خاسەنە نمازۊ پۆسەکەش وشکبۊوە.
زانێنێ کۆزەڵێوە گولانۍ ڕوەنی وېمانەما جە کونجوو هۆڎەکەیەنە هەن. چوون ئەڎام هەروەختێو هێڵە و ڕوەنیم پەی کەرۍ، ئێ پەی دلێ کونجوو هۆدەکەی و چەمچېو ڕوەن بەرئارێ.
یەکسەر لوانێ پەی پەشتەو یاگە و بانەکەی و دلێ کونجەکەیەنە، کۆزەڵەکێم ئێسۆ، بە دوێ پەنجێ کوچېو ڕوەنم چەنە هۆرگېرت.
وەنۊشە وەختێو ڕوەنەکەش دەسۆ دیا، زاناش گەرەکما چېش کەروو، چوون وەڵتەر باسوو ئانەیمە پەی کەردێبێ. ئی جارە بە بۍ هیچ شەرمێو گجیەکەش هۆرش داوە تاکو ڕوەنەکەی ساو پا یاگېرە کە ئێشش هەن و سوور بېیەنۆ.
قەدرێوش پۆ شی، هەردویما هیلاک و مانیێ کۆتیمێ و حەز کەرېنمێ بوسمێ، هۆرساوە و لوانێ نزیکوو دەلاقەکەی کۆتاوە، شەوەزەنگەو پاییزی دنیاش تاریک و نووتەک کەردەبۍ. زیڕۊحکەر پاگەنە دیار نەبۍ. دلێ تریشکەو بەرەکەیەنە، چراو ئینگلیسیەکێ کزە کریێبێ و شۆقێوی کەمش دابێنە دلێ وەرهەیوانەکەی. ئەڎام و پاوەیۋەکێم دیێ کە هەردوێ پەشتەو بەرەکەیەنە، دوور چاڎییشا، ئەجۍ دوێ دانێ مەیێنێ و مردارێ بیېنۍ. ئی فەقیرێ ئاڼە نگابانیشا دابێ ئیتر تاقەتشا نەمەنە بۍ و یاگێ وېشانە درێژ کیشیێبێنېرە و وەرمشا کۆتەبێ پۊرە.
ئامانێ پەی سەرو یاگەکێ و پاڵو وەنەوشێنە کیشېیانېرە، نەزانام چەنی ئاڼە زوو وەرمم کۆت پۊرە. چەمېم کەردێ مڎیەو شۆڵەو ڕۊجیاری دلێ دەلاقە گولانەکەیەنە ئامابێ ئی دیم. لام کەردۆ مڎیەو وەنۊشە لامەنە نەمەنێنە.
هۆرساوە و لوانێ بەرەو هۆدەکەیم کەردۆ، مڎیەو وەنۊشە بەینوو ئەڎێم و پاویۋەکێنە نیشتێنەرە و ئەجۍ ولۊ دلێ پەڕچینېیەنە گەشە بېیېنۆ. هەر دوورۆ منش دیا بزێوش کەرد. ئەڎام و پاوەیۋەکێ ڕازیێ دیارێ بێنێ! من مەزانۇو! بەڵام ئەجۊم وەنۊشە، چېوێوش جە بارەو هیزی شەوېوە پەنە واتێبێنێ یا چېوێوش نیشانە دێبێنێ.
ئیتر چا ڕوۆ وەنۊشەو خیاڵەکام چەنی ئا وەنۊشێ لا ئەڎێمەنە نیشتێبێرە، هەردوێ بیێ بە چراوەو ڕایم و ئەشقوو دڵیم، کە تاکو ئیسەیچ هەر ئینێم چەنی.
ڕەزا بەهمەنی.[1]