هەری مەینەتی
بەشۍ: یەرەمە
ئا ڕوە پەی کۆپان لاری ڕوێوی سیاو بێ. بەڵام وېش ئاگاش جە دنیای نەبۍ. هەرگیز بە ئەقڵشەنە نەلێ کە دماو ئا گرد ڕەنجو مەینەتیە، دماو ئا گرد وەفاداری و خزمەتیە، ڕوێو بۍ وەرۆ کە جە واڵەکېش گاوەزەردێ و جە خانەوادەێش و تەنانەت جە دەگاکێێچ، دوورش وزاوە.
مایجانە، وەختێو کۆپانەکېش داڵانەکەنە نیارە، لوا ئاڵفەکەش ئارد و کەردش دوێ کۆتێ و بەشەو هەردویش کەردەرە وەرو دەمیشا. پا جۊرە ئا ڕوە کۆپان لار پەڕو لەمێش دماو ماوێوی درێژی ئاڵفش وارد. ئیسە ئیتر وەختو ئانەیە بۍ کە مایجانە کۆپانەکێ بنیۆ سەرو مازیشۆ و وزۆش ڕا.
چا وەختەنە کە نەما کۆپانەکێ، ویرێوش پەی ئاما! کە مشیێ هەر جە ئەوەڵۆ زانېش!ئاذیچ ئانە بێ؛ چەنی کریۆ حەیوانێو، پی بارە قۆرسۆ، پی کۆپانە زلێوە بەرڵا کریۆ؟ جە ڕاسیەنە مایجانە جە خەمو خەجاڵەتەنە، وێچش نەزانێ کە خەریکەو چیشیەنە و چە ئاقیبەتێویچ چەمەڕایی کۆپان لاری کەرۊ.
پا جۊرە کۆپانەکېش داڵانەکەنە نیارە و هۆسارەکەش کەرد ملش و بەرەو دەربازەکەیش کەردۆ و فرە بە ئارامی جە دەربازەکەنە لوێ بەر. هۆسارەکەش پېچنا دەسشەرە و کۆتە وەڵێ کۆپان لاری. کۆپان لار؛ پېسە عاذەتو گرد ڕوێویش، ڕوەش نېیا ڕوەو دەرەوهانەی کە گرد ڕوێو ئاویش چەنە وەرێ، بەڵام مایجانە، بە کېشتەو هۆسارەکەێش ڕاکېش وەنە فاڕا.
هەڵای سەحبێ زوو بێ، دلێ دەگێ فرە چۆڵ بێ، هەوێوی فرە چیا هۆرش کەردە بێ، ئاسمان هۆرێوی تاریکی گرتەبێرە. هۆرەکێ؛ ئانذە نزمێ بێێ بێنېرە، کە پاسە دیار بۍ جە سەرو کەشەکاوە کریۆ بە دەس گیریشا.
کۆپان لار ئەجۍ دڵش خەبەرش دابێ، کە کۆگەش بەرا، دڵش نەبۍ پۆ بلۆ ڕانە، جار جاریچ مایجانێ مەجبوورە کرێ کە هۆسارەکەیش تن کېشۆ و گنۆ قسێ چەنیش تاکو بەڵکو هەرچی زوتەر جە دەگێ ترازنۊش و ڕەذش کەرۊ. چوونکە بە ڕاسی حەز نەکەرۍ کە پا سەحبە زوەنە، کەس چەنی هەرەکەی وینۊش، ئاذیچ بە بۍ کۆپان و پا سەرداو سڵێوەنە.
چا وەختەنە کە ئیتر یاوێ بۍ ئۆپەڕو دەگاکێ و تەنیا دوێ یانێ مەنێ بێنێ کە بازۆشا جیا و گنۆ پۆدیمو ملەگاکەیەرە، دەنگېو کۆت گۊشش و لاش کەردۆ مذیۆ مەتی لاڵێنە. مەتی لاڵێ، ژەنېوە بە عۆمرە بێ، کە ماوێوی درێژ مامانی گردو دەگاکېش کەردەبۍ، بەڵام ئیسە پیرە بیێبێ و وېش تەنیا یانە گۆلانێوەنە گۆزەران کەرۍ. دیار بۍ مەتی لاڵێ جە دوورۆ مایجانە و هەرەکەش دیێ بێنێ.
چا وەختەنە کە مایجانە و هەرەکە یاوێ وەرو بەرەو مەتی لاڵێ، مەتی لاڵێ؛ لێو دەلاقەکەێش کەردۆ و چڕیش ئۆ مایجانێ و واتش سەواخێر مایجان، ئەرۍ ڕۊڵە ئانە پی سەحبە زوەنە کۆگە ملی؟ ئاهەریە بە بۍ کۆپان کۆگە بەری؟
مایجانە پەشۆکیا و نەزانێ چېش جوابو مەتی لاڵێ دۆوە. سەرەش بەرز کەردۆ و واتش دیارذ خێر مەتی لاڵێ، وەڵا مەتی لاڵێ گېیان، تۊ یاگێ ئەذێمەنی، ڕاسەکېش ئی هەرو ئېمە ئیتر کەڵکێوش پۆ نەمەنەن، بخوا وېت مزانی منیچ تەنیانا، ئی هەرە؛ وەی مەکریۆ پەیم، گەرەکما بەروش پەی (وېشەکەو دەرەو بناوچی) ، چاگە هەم گەرمتەر چېگەیەنە و هەم پا دلێ وېشەو نەیجانە، لەوەڕ هەن کە بوەرۆ! تاکو ئی زمسانە بلۆ، دمایی بزانو چېشبۊ.
مەتی لاڵێ، جە جوابەکەۆ مایجانێنە، بە تەمامی وەزعەش تێکە شیە، هەر چن هەوا فرە سەرد بۍ بەڵام بە هەردو دەسێش ئۆ لاکەو دەلاقەکەێش کەردۆ و سەرەش بە تەمای جە دەلاقەکەنە ئارد بەر و واتش ئەرۍ ڕۊڵە مایجان ئانە مزانی چېش ماچی؟مزانی خەریکەو چېشیەنی؟ کۊرە پەی خاترەو خوای ئا کاریە نەکەری، ئا دلێ دەرەیە پەڕا وەرگێ!بخوا هەر ئاست جیا، وەرگا هۊر دڕیەن، کۊرە ڕۊڵە بخوا ئاهو ئا هەریە، وېت و زارۆڵەکات گېرۆ!
مایجانە بە ئەژنیەی قسەکا مەتی لاڵێ زوانش گۊ نەگېرێ کە جوابش دۆوە، هۆسارو هەرەکەی چا سەرداو سەحبېیەنە، دلێ دەساشەنە یەخش کەردەبۍ. نەزانێ چېش کەرۊ، وەختێو ویرو دۆعایەکا مەتی لاڵێ کەرۍوە، زارۆڵەکېش ئێنێ وەرو چەماش. ڕېوەتەرەش پەی نەمەنێ بێ، بېژگەم ئانەیە کە هەرەکەی گېڵنۆوە پەی یانەی. ئانذە پەشۆکیێ بۍ کە بە بۍ خوا حافێزی وەرو بەرەو یانەو مەتی لاڵێش ئاست جیا و کۆپان لارش ئاردۆ پەی یانەی. ڕانە وەختو ئەوەگېڵایش، چن کەسێش دیێ، کە پەرساشا چەنە؛ ئانە ئا هەرە چکۆ بېیەن، ؟ کۆگەش بەری؟، ئاذێچە جە جوابەکەشآنە، ئانەیە واچۍ؛ کە دەربازەو یانەکەیشا کریابېیەنۆ و هەرەکە ڕەمان، ئیسە ئانا بەرایش بەرۊوە پەی یانەی! دیار بۍ مایجانە وێچش زانێ کە کەس پا قسێشە باور مەکەرۊ!
پا جۊرە دیسان کۆپان لار ئاماوە پەی یانەکەیش و کریاناوە دلێ گۆڕەکەو وېش.
ڕەزا بەهمەنی.[1]