ڕۊمانەو (چېرو دارتفێنە)
ئەژناسنای و هۆرەوگېڵنای پەی هۆرامی: ڕەزا بەهمەنی
نامۍ کتېبی: چیرو دارتفێنە (بنەو تفەکېنە)
نویسەر: ژیوار ڕەشید، بە زوانی سۆئێدی
بەشۍ: یەرەمە
بەشێوتەروو داستانەکەی بەرۆمانە دلێ شاڎیی و خەمېوتەری فرە گۆرەی، چی بەشەنە ئیتر ئازاد دانشجوا و دانشگانە ڕەفێقێ کوردێ و فارسێ و عەرەبێ و سۆئێدیێ فرێش پېڎا کەردێنێ. ئیسە زەمانێوا کە مشیۊ جە بارەو وەڵاتەکەیش زانیاریێ کۊ کەرۊوە تاکو بتاوۆ جوابوو دانە بە دانەو گردی بڎۆوە.
ئازاد وەڵتەر ویروو ئانەیەنە بیەبێ و ئارەزوو کەرۍ تاکو ڕوێو بەی وەرۆ ویرەوەریەکاو ئەڎێش کەرۊ بە کتېبێ، پاسە زانێ ئیسە ئیتر وەختش یاوان و مشیۊ چەنی ئەڎێش ئی قسێ کەرۊ.
جە هەر فرسەتێوەنە کە پەیش هۊرکۆتێ و زانێش ئەڎاش کوچېو سەرێ حاڵ و ئارامەنە، چا فرسەتیە بەهرە گېرێ و پەرسێ جە بارەو وېیەردەیشۆ جە ئەڎێش کەرۍ.
یانی تۊ تاکو ئیسە پاستە زانان کە هەڵەبجەنە جە ئەڎێ بېیەنی؟
نا ڕۊڵە تۊ هەڵبجەنە جە ئەڎێ نەبېیەنی، تۊ بنکۆنە جە ئەڎێ بېیەنی.
چا وەختەنە ئازاد ئی قسێ دەمو ئەڎێشۆ مژنەوۆ، سەرتاپاو لاشەیش گنۊنە لەرزای، بنکۆ، بنکۆ کۆگەن؟
نامۍ بنکۆی ئاڼە ملۆنە دلێ ناخ و دەروونو ئازادی، کە خیاڵەکاش مڕفانۆ.
نویسەر ئەچېگەنە بە ویر و ئەندیشێوی هۆنەرمەندانە و زەریفیێوی بۍ وێنە، دەگاو (بنکۆ)یما پەنە مژناسنۆ.
بەڵۍ چی دەگانە تۊ جە ئەڎای بېیەی.
یانېوەنە کە چڵێو تفی وەرشەنە بێ.
پایېزو دەگێ پەڕبۍ جە مێوە ڕەناگاوڕەنگەکا کە سەرو بانەکاوە وشکێ کریابێێنێ و دوورۆ دیارۍ بێنۍ.
وەهارەنە دەگاکێ ئاڼە سەرسۊزە بۍ ئەجۍ خوڎای بېژگەم ڕەنگی سۊزی ئیتر ڕەنگێوتەرش وەشە نەکەردەن.
زمسانەنە یانەکێ دلێ تاریکیەنە پېسە ئێرە قوولێوێ دوورۆ شۆق ئەنمانێنێ و ئەجۍ هەرچی هەسارێ ئاسمانی هەنێ گرد وەسێنېرە وار.
هامنەنە دار و درەخت شنیێرە و ڕەنگەی ئاڵتوونیەو دارە وەنەکا دلێ تاش و تەوەنەکاو پەشتەو دەگێوە چەمۍ ئەڕفانێ.
ئازاد چی دەگێنە جە ئەڎێ بۊ. داستانەکە ئیسە خەریکا بە ئەوجوو وېش نزیکبۊوە. چېگەنە ئیتر نویسەر سەنگ تەمام منیۊ.
جە سۊزو ئەشق و وەشەویسیەنە پاسە مزانی کە خەریکەنی ڕۊمانو (مادام بوار)ی نویسەو (گۆستاوفلۆبەر)ی موانیۆ.
جە خېیاڵ و فانتاسیەنە ئەجۊ سەڎ ساڵ تەنیایی گابریل گارسیای موانیۆ.
دلێ وەسفوو سرۆشتیەنە و هۆنەروو نۆستالۆژیەنە ئەجۊ بربادرفتەو مارگەرت میچلی موانیۆ.
ئەڎاش وەختێو بەسەرئاماکەی گېڵنۆوە، وێچش هەڵسی هەڵقێ بینۆ دلێ چەماش. دەس پەنە کەرۊوە و ماچۊ:
ئیسە ئیتر تۊ کوچېو گۆرەتەر بیەبێنی و خەریک بۍ پای گېرینی. ئا ژەنێ کە مەرزەنە منش نەجات دانێ و ئارداش پەی دەگاو بنکۆی، نامېش (شەمسە) بۍ و وېش یەرێ کناچېش بێنێ. بېژگەم من، چن ژەنێتەرێ پېسە من کە هیچ کەسېوتەرشا نەبۍ، جە یانەکەو وېشەنە پەناش دایبێنێ.
دمایی شەمسە کناچێوەتەرەش بە نامۍ (ڤیان)ێ ئاردە لاما. ئی کناچۍ فرە زوو چەنی من تێکەڵە بیە. پېسە دوێ واڵاما پەنە ئامابێ.
من بۊنەو تۆوە کەمتەر هەرمانێم پەنە کەرېنێ. گردو کناچەکا فرەو وەختیشا کڵاشێ و کڵاوێ چنێنێ تاکو بتاوا نان و واردەمەنی و کەلوپەلو ژیوایشا بسانا.
پا جۊرە ڕوێ لوێنێ و هەرچی زەمان فرەتەر لوێ، کناچەکێ فرەتەر بە یەکرترینی نزیکێ گنێنمێوە.
ئا یانە کە چەنەش ژیوێنمێ، یانەکەو (شەمسەی) ماچوو بنکۆنە، فرە کۆنە بێ. کناچەکێ شەوېنە وەختوو کڵاش چنیەی و دەمەتەقێنە، گنێنېنە دلێ خیاڵاو ئاوات و ئارەزوێ وازێنێ.
کریۆ ڕوێو بەی وەرۆ یانېوی تازەما بۊ؟!
کریۆ ئېمە بە بۍ پیا یانېو وەش کەرمۍ؟
ئی خیاڵۍ و ئارەزوێ ئېمە دلێ دەگێنە وەڵێ بیێ و مەڵڵا عەبدۆڵڵا، مەڵڵاو دەگێ و جەماعەتەکەش، کۆتێ گاڵتە کەردەی و مەسخەرە کەردەی گردیما.
ڕەزا بەهمەنی.[1]