ناساندنی: ئیدریس عەلی
ڕۆمانی ( #سێبەرەکانی جەستە ''کەنارەکانی حەز''# ) لەلایەن نووسەری کۆچکردووی ئێراقی (سەعد محەمەد ڕەحیم) نووسراوە و نووسەر و وەرگێڕی ناودار (#سەباح ئیسماعیل# ) بە شێوەیەکی جوان و سەرنجڕاکێش، وەک زۆربەی هەرە زۆری کارە وەرگێڕانەکانی پێشووتری، وەریگێڕاوەتە سەر زمانی کوردی و لەلایەن دەزگای چاپ و پەخشی سەردەمەوە، چاپ و بڵاوکراوەتەوە. ئەم ڕۆمانە بەرجەستەی واقیعییەتی قۆناغێکی مێژوویی دیاریکراوی ئێراق بە گشتی و بەغدای پایتەخت بە تایبەتتر دەکات، قۆناغێک کە تیایدا ڕژێمی سەرکوتکەری بەعس ڕووخاوە و قۆناغێکی دیکە لە مێژووی سیاسی و حکومڕانی لە وڵاتدا دەستپێدەکات، مێژوویەکی نوێ کە ئازار و برین و کێشەی نوێی لەگەڵ خۆیدا هێناوە، ئەم ڕۆمانە کتومت بەرجەستەی ژیانی مرۆڤەکان و کۆی گشتی وڵاتەکە و پێکهاتە و بوونیادە سیاسی و حکومڕانی و پەیوەندییە کۆمەڵایەتییەکانی مرۆڤی ئەم قۆناغ و دۆخە نوێیە دەکات، کە تیایدا بەهۆی درووستبوونی باند و گرووپە تیرۆرسیتی و جیهادی و مشەخۆرەکانەوە، ژیانی ئاسایی ڕۆژانەی خەڵکیان کردووە بە دۆزەخ و کەس لە هیچ شتێک دڵنیا نییە، بازرگان لە بازرگانییەکەی دڵنیا نییە، پزیشک لە نۆرینگەکەی خۆیدا دڵنیا نییە، مامۆستای زانکۆ لە هۆڵەکانی محازەرەدا و خوێنەر لە پەرتووکخانەکاندا و لەشفرۆش لە ماڵەکانیاندا و تەواوی چین و توێژە کۆمەڵایەتییە جۆراوجۆرەکان، هیچیان لە هیچ شتێک دڵنیا نین و هەر ساتێک ئەگەری ڕفاندن و کوشتن و تەقینەوە، نزیکتر ئەگەرن لە ژیان و چارەنووسی تاکەکاندا. نووسەری ئەم ڕۆمانە، کە پێشتر یەکێکی تر لە ڕۆمانە جوان و سەرنجڕاکێشەکانیمان بە ناوی (کوژرانی کابرای پەرتووکفرۆش)ەوە خوێندۆتەوە، تا ئەندازەیەک ئاشناین بە دونیابینی و زمانی هەڵبەستئامێز و تەکنیکی باڵا و شێوازی گێڕانەوە و خوڵقاندنی کەش و فەزای هونەریی ناو ڕۆمانەکانی و چارەنووسی کارەکتەرە هیلاک و غەمگینەکانی، ڕۆمانەکەی پێشووتریشی بە هەمان شێوە تێماکەی لەسەر ڕووداوەکانی ئێراقی دوای ساڵی 2003 و بە دیاریکراوی پاش نەمانی بەعسە، لێرەشدا، واتە لە ڕۆمانی (سێبەرەکانی جەست، کەنارەکانی حەز) بە تەکنیکێکی تا ئەندازەیەکی زۆر لە چاو ڕۆمانە ئێراقییەکانی تردا جیاوازتر، تەنانەت لە ڕووی گێڕانەوە و ڕووداو و بوونایدی کەسێتییەکانەوە، جیاوازییەکی زۆری هەیە و خوێنەری وریا هەر لە بەشی یەکەمدا هەست دەکات کە لە بەردەم تێکستێک و گێڕانەوەیەکی بەرزدایە. ڕۆمانەکە بێئەنداز ئێراقییە، شوێن و ڕووداوەکان و کەسایەتییەکان ئێراقین، کێشەکان کێشەی ئێراقن و تەنانەت خەون و حەز و عەشقەکانیش ئێراقییانەن، بە ڕووکەش وا دەردەکەوێت ڕۆمانەکە بە لای ئەوێنێکی مایە پووچ و دەستبەتاڵدا کە کچێکی فریودەر لە ڕێی کۆمەڵێک پەیوەندی ناجۆر و ناسرووشتییەوە نمایندەی دەکات دەشکێتەوە، ساتەوەختی دەستپێکی ڕۆمانەکە لەناو پەرتووکخانەیەکدایە و دیمەنێکی ئەوینداری و حەز و خولیای گێڕەرەوە، کە شا پاڵەوانی تێکستەکەیە پیشان دەدات، کەچی لەگەڵ ڕەوتی پەرەسەندن و بەرەوپێشچوونی ڕووداوەکاندا، دنیایەک نهێنی و کۆدی دیکە لە بەردەم خوێنەردا قوت دەبنەوە و ناچارمان دەکەن پڕۆسەی خوێندەوەکەمان بڕێک ورد تر و بە دیقەتتر ئەنجام بدەین و پێ بە پێی گێڕەرەوە هەنگا و بەسەر ڕێگای ڕووداوەکان و چارەنووسی کارەکتەرە جۆراوجۆرەکاندا بنێین، خوێنەری ئەم ڕۆمانە هێندەی خودی نووسەر و گێڕەرەوە پشکی لە ڕووداوەکاندا هەیە، ئەمە یەکێکە لە سەرنجڕاکێشی ڕۆمانەکە و زیرەکی نووسەر پیشان دەدات، کە خوێنەر بکاتە هاوبەشی تێکستەکە، ئەویش بەوەی پێچەوانەی خولیا و حەزی خوێنەر، کە هەمیشە چاوەڕێن نووسەر وەک چۆن سەرەتا و ناوەڕاست بۆ چیرۆکەکە دادەنێت، بەو ئاوایە کۆتاییش دابنێت و لە کۆتاییدا کۆی کۆدەکان بۆ خوێنەر بکاتەوە وتیشک بخاتە سەر لایەنی تاریکی چیرۆکەکان و چارەنووسی کارەکتەرەکانمان بۆ دیاری بکات، بە پێچەوانەوە نووسەر لێرەدا کێشەکانی خستوونەتە ڕوو و خوێنەری خسووەتە ناو ڕووداوەکانەوە و کارەکتەرەکان و جێگە و ڕێگە و باری سایکۆلۆژی و ئاستی چینایەتی و هۆشیاری پێگەی کۆمەڵایەتییانی دیاری کردووە، بەڵام خوێنەریشی ئازاد کردووە بەوەی خەیاڵ و هۆش و هزری خۆی بخاتە گەڕ و کۆتایی چیرۆکەکە بە ویست و مەزەنەی خۆی دیاری بکات. ڕەنگە ئەم شێوازە پەیوەندیی بەوەوە هەبێت کە نووسەر پێمان بڵێت: ئێراق چیرۆکێکی ناکۆتا درێژە و هەموویشی لە یەک دەچێت، ڕۆژگار و مرۆڤەکان و کێشەکان و ڕووداوەکان وەک یەک وان، ئەگەر و قەدەر و چارەنووس و ڕێکەوتەکان چوون یەکن و تەنیا ناوەکانیان جودان، ئێمە هەموومان خەریکین پڕکێشی دەکەین و چیرۆکی یەکتر درێژ دەکەینەوە و گوێ لە دەنگی تەقینەوەکان دەگرین، خەریکین چیرۆکە هاوبەشەکەی خۆمان دەنووسینەوە و هەواڵە ناخۆشەکانی ڕفاندن و نائارامی و تێکوپێکشکاندی مرۆڤەکان دەبینین، چیرۆکەکانی مرۆڤی ناو وڵاتی جەنگ و قەیرانەکان، چ جیاوازییەکیان لەگەڵ یەکدیدا نییە و هەموومان لەناو یەک مەنجەڵداین و مەنجەڵەکەش لەسەر ئاگرێک دەکوڵێ بە ناوی ئێراقی نوێ، ئێراقی دوای داگیرکاری، ئێراقی سەردەمی دەیان هێزی میلیشیا و توندڕەو، ئێراقی بەریەککەوتنە ئاگرین و خوێناوییەکانی نێوان مەزهەبەکان، نێوان نەتەوەکان، نێوان بۆچوونە جیاوازەکان، ئێراقێک کە تەنانەت ناوەندە ڕۆشنبیریی و کولتوورییەکەیشی تێکچووە و شاعیرەکانی بەرگەی ئەو دۆخە ترسناکە ناگرن و جێی دەهێڵن، یاخود خۆیان دەکوژن، یان دەکوژرێن، ئێراقێک کە ئیدی هێدیهێدی خەریکە سیما شارستانی و مەدەنییەکەی لەنێو دووکەڵی نەزانی و شەڕخوازیدا دەسڕدرێتەوە و دەگات بە شوێنێک کە ئیدی فڕەڕەنگی ببێتە کێشەیەکی خوێناوی و هەموو هێزە چەکدار و بێ چەکەکان، خەریکی ڕەنگکردنی کۆمەڵگە و بەرانبەرەکەی خۆیان بن بەو ڕەنگەی کە خۆیان دەیانەوێت، دواجار جگە لە ڕەنگی ڕەش و تاریککردنی وڵات، هیچ شتێکی دیکە نییە. بە گشتی ئەم ڕۆمانە بە سرووشتی خۆی ئاگادارمان دەکاتەوە لە خۆمان، لە ڕابردوو و ئێستا و ئاییندەمان، ئاگادارمان دەکاتەوە کە لەم وڵاتەدا چ گەمەیەکی شێتانە بە ناوی سیاسەت و خوداوە دەکرێت، قوربانییەکان ڕۆژ لە دوای ڕۆژ زیاتر دەبن و لە شوێنێکدا ئیدی ژمارەکان دەوەستن و کۆی وڵاتەکە لە بەرگێکی قوربانی و ماتەمدا دەردەکەوێت، بەڵام ئەستەمە ئەو تەکنیکە بەرز و شێوازی گێڕانەوە و زمانە سادە و شاعیرانەیە سیخناخمان نەکەن لە چێژی ئەدەبی، ئەمەش ئەگەر لە لایەکەوە بۆ خودی باڵادەستی نووسەرە ئێراقییەکە بگەڕێتەوە، لە لایەکی دیکەوە بۆ زیرەکی و شارەزایی وەرگێڕ (سەباح ئیسماعیل) دەگەڕێتەوە، کە هەمیشە لە دۆزینەوەی دەنگی جیاواز و شاکاری ئەدەبیدا، بە وەرگێڕانەکانی سەرساممان دەکات، خوێنەر لە بەردەم ئەم ڕۆمانەدا تووشی گومان دەبێت بەوەی ئایا لە بنەڕەتدا تێکستەکە بە کوردی نووسراوە، یان بە عەرەبی، ئەمەش بێ شک و گومان سەرکەوتنی وەرگێڕەکە پیشان دەدات.
[1]
Cet article a été écrit en (کوردیی ناوەڕاست) langue, cliquez sur l'icône
pour ouvrir l'élément dans la langue originale!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Cet article a été lu fois 140
Donnez votre avis sur ce produit!