نیشانەکۍ کودبییەی میانو ئەوەئاردەرەی و لاسایۍکەردەیۆنە
ئانەی هەکە دلۍ کوردینە و جە ڕاو کوردیۆ بەرهەمئامان، ڕاو نیشانەکا کوردبیەیۆ کوردییەتییەکەش دیاریکریۊن، دلۍ پروسەو ئاردەرەیرە بەرئامان، نەکو بە پروسەو لاساییکەردەی بەرهەمەکانو ڕوحە نەتەوەییەکانو تەری. گرد تازەگەریێ و ئەرەئاردەرێوە کەلتوری و زوانی و ئاکاری، گېڵایێوە قووڵو ئەوەئاردەرەیش گەرەکەن پەی ڕۊحو وېش، گرد ئاردەرێچ مەحکومەن بە فۆرمێ دیاریکریا کە سروشتی کوردییانەو ئا ئەرەئاوردەرەی مڎۊن بە بەرهەمەکەیش، ویرلەکۍ ئەرەئاردەرەکەی ویرلۍ عەقڵیۍ و جەهانیېنۍ، شېوەگېرتەکەیشان سەرچەمە جە سروشتو ئا تاکەیۆ مەگېرۊن کە چەنی تاکە نەتەوەییەکانو تەری هامبەشەن. ئینەیچ پاسنەکەرۊ ئا ئاردەرەیە چەنی وېش ئا نیشانایچە هۊربگېرۊن کە مۊرکو ئا ڕۊحە نەتەوەییەیشان هۊرگېرتەن. وەختێ کەسانێ دلۍ نەتەوێوەنە جیاتی ئانەی بگېڵاوە پەی زاتو وېشان، مەگېڵاوە پەی ئا ئاردەرەیە کە جە لاو ڕۊحە نەتەوەییەکانو تەریوە ئامێنۍ و ئینەیە پېسێ باوێ و نەریتێ وەرمەگېران و لاسایېش مەکەراوە، هەرمانەکېشان ئەرەئاردەرەی نییەنە و ئا مۊرکە نەتەوەیېشە هۊرنەگېرتېنە کە دلۍ ئاردەرە، یام بەرهەمە ڕۊحییەکانو ئا نەتەوەینە هەنە. ڕۊحی نەتەوەیی زیڼە، گردو ئانەی کە بەرهەمو ڕۊحی نەتەوەیی نەتەوەکا تەرین، یام چەنیش مەگنۊ گفت و گۊ، یام مەگېڵنۊشۆ پەی کەرەسەی سەرەتایی جە ڕاو هۊروەشنای شېوەکەیشۆ و دماتەر بەکارئاردەیۆش دلۍ ئاردەرەکەو وېشەنە. هەر ئینەیچە پاسشەکەردەن پەی نموونەی کۊمەڵئەشناسی ئەڵمانی جیاوازبۊن چەنی کۊمەڵئەشناسی ئەمریکی و فەرنسی، ئەدەبیاتی فەرنسی جیاواز بۊن چەنی ئەدەبیاتی ئەڵمانی و ئەمریکی. هەر ئینەنە پاسەکەرۊن ویرکەردەیۆ فەلسەفی ئەمریکیەکان پراگماتیکی بۊن و ویرکەردەیۆ فەلسەفی ئەڵمانەکان عەقڵانی بۊن و ویرکەردەیۆ فەلسەفی فەرنسییەکان کۊمەڵایەتی بۊن. ئینەن پاسشەکەردەن دلۍ وەرنیشتینە ترادیسیونە جیاوازەکۍ، تەنانەت دلۍ زانستەکاچەنە بان. ئانە سەرەڕاو ئا کاریگەریا کە سەرو یۊترینی هەنشا.
نویستەی: د. عیرفان مستەفا
هۊرئەوەگېڵنای: ئەسعەد ڕەشید.[1]