نامۍ: مینە
نازنام: جاف
نامۊ تاتەی: کەریم بەگ
ساڵۊ پېڎابییەی: 1911ز.ح
ساڵۊ مەرڎەی: 1965ز.
یاگۊ پېڎابییەی: #قەڵاو شێروانەی _ کەلارە#
یاگۊ مەرڎەی: #بەغڎا#
$ژیۋاینامە$
مینە جاف؛ کوڕو کەریم بەگ فەتاح بەگ حەمە پاشاو سەرخېڵو هۊزو جافین، ساڵەو (1911ز.) قەڵاو شێروانەی ئامان دلۍ دنیێ. مینە جاف پیێوە ئیماندار و هۊشییار و ئازا بېیەن، کەسێ دەسپاک و دەروون ساف و یەک ڕوو و بۍ ڕیاو قسە وەش بېیەن. بەڵام تەکو ئی بەها جواناشەنە مرۊڤێ دڵ ناسکیچ بېیەن. پاسە دیارەن هەر جە زاروڵەییۆ کەریم بەگی تاتەش دمای ئانەی کە ژەنی تازۍ مارۊ، ئەڎاو مینە جافی چەنی وېش و حەبیبەخانمەی کناچېش، دلۍ دەگاو (گۆبان) نیشتەجایۍ مەبانۍ، ئیتر چا دەمۆ
بارو وەرپەرسی مەگنۊ سەرو شاناش، ئانەیچ
بارو دەروونو مینە جافی قورستەر مەکەرۊن و جۊرە تەمیارێ سەرو ڕوخساریشۆ هەر دەم وېش مەرمانۊ. مینە جاف؛ دەسش نەیاوان بە فېرگا و وانگای فەرمی و دۆڵەتی، بەڵام دەرسو حوجرەیش دلۍ مزگی کەلارېنە وانان، خزمەتو مامۊسا مەلا مەحیەدین و مامۊسا ئەحمەڎی کەلارینە دەرسە ئایینی و زانستیەکېش وانێنی. ئانەی شایانو باسیەن، نامبریا دلۍ زەمینو خۊڼەوارینە وېش وېش یاونان پەنە، چوونکوم خوڎا بەهرێوە زیرەکیش پەنە بەخشابۍ. بېگومان کەشو ڕۊشنویری دلۍ بنەیانەوجافی دۆرێ ئەرېنیش سەرو ویر و ئاوەزو هەم ڕۊشنویری شاعېریۆ بېیەن، زېیاتەریچ کەریم بەگی تاتەش، تاتەش شېعر دۊس بېیەن و دەسو نویستەی شېعراش بېیەن و خاوەنو کەشکۊڵی و مەدرەسەی بېیەن.
هەم حەمە بەگ و ڕەزا بەگی مامۊش کە دۋۍ کەسۍ ئەدەب دۊسۍ بیېنۍ، هەم خوڼەوارۍ و قەڵەم بە دەسۍ بیېنۍ، حورمەتشان پەی شاعېرانو ئەدیبانی نییانەرە، هانیشا دێنۍ کە زېیاتەر فېرۍ زانستی بانۍ و کەرەسۍ شېعراشا هۊمار بکەران. ئەچی دەرەتانەنە
شاعېر درېغیش نەکەرڎەن و زوانی عەرەبی و تورکی و فارسی فېربییەن و بە تاییبەت پېسە عادەتو شاعېرانو کۊنی دلۍ دنیاو ئەدەبېیاتی فارسینە قووڵ بېیەنۆ و دلۍ کتېبېیانەکەیشەنە دیوانو فرەو شاعېرە بەرزەکانو فارسی دیارېنۍ.
مینە جاف؛ چېرو سایەو شاعېرکانو مەدرەسەو هۆرامینە یاوان پەنە، هېزو تەواناو ماریفەتش ئەچا مەدرەسەنە وەرگېرتەن، ئا ڕابازەشە گېرتەن کە ئاڎۍ سەرشۆ بیېنۍ، چەنی ئانەیچ فرە حەزش بە شېعرە نەتەوەییەکانو فایەق بېکەسی کەرڎەن، پەی مەردەی بېکەسی شاعېری، ئی شېعرېشە واتېنە:
بېکەسی کەسی قەومەکەی بېکەس
شەرتە ئێشم بێ، تا ئاخر نەفەس
شەرت بێ ئێوارە و سوبح و نیوەڕۆ
تا ئەمرم بڵێم: کاک فایقم ڕۊ.
مینە جاف؛ دلۍ شاعېرە کۊنەکانە، پیرەمێردش جە گرڎی زېیاتەر وەشسیان، چوونکوم پیرەمێرد خزمەتێ فرەش بە بنەیانەو جافەکا کەرڎەن و قەدرێ فرەش گېرتېنۍ. پەی کۊچی دمایینو پیرەمێردی شاعېری پی پارچە شېعرۍ خەم و خەفەتو دلۍ زېڵەو وېش بەرۋستەن:
ئەی زوبان وەک بولبولی گویا وەرە مەیدانەوە
چەند گوڵی ڕەنگین بەرە، دیوانی کوردستانەوە
بیکە نەظمی مەدح و تەعریف و تەشەککورنامەیێ
بۆ ئەدیبی زۆر نەجیبی، داهییەی عەلامەوە
نوکتەدانی، پڕ بەیانی، دوودمانی خانەدان
پیری مەشهوور، حاجی تۊفیق، تاجی دەستەی شاعیران.
دماجار، شاعېری هەسناسک، مینە جاف ساڵەو (1965ز.)ی جە شارو بەغڎای کۊچی دمایینش کەرڎەن و دلۍ زیارەت تەڵانو (سەی خەلیل) نریان.
چن نموونێ جە شېعرەکانو مینەجافی شاعېری:
دڵڕەنجی یار:
ئەی خەم تەشریف کەر یاگەت بەتاڵەن
شادی کۆچش کەرد، ئامایش مەحاڵەن
مەکەرۊ تەقسیر نەوبەت ئاما پېت
ۋېرانکەر ئەم جار، یەکسەر ماوای وېت
وە هووناو کەرۊ دڵەی سیا چار
باوەر لێڵایی دیدەی ئەسرین بار
بەرکەندۆ ڕیشەی نشاتم جە بېخ
جگەر قیمەکەر، پەی کەباب وە تێخ
وە دۆی هەناسەی چیای زەبوونم
جەلادەر وە نار ، کوورەی دەروونم
مالووم بۊ جەلات من کۆس تۊمەن
نەوبەی ئازێتی و، زایەڵەی ڕۊمەن
خوا نەکردە شۊخی شیوا شەم
مەواچان دیسان قارش گرتەن لێم
وەی ڕۊ پەی خەوەر یاوەنان وەپێم
ڕیسوا و حەیران وېم ، ئای جە دەرد وېم
وەی ڕۊ پەی دڵەی زام گرتەی کاریم
پەی شەرارەی ئێش، دەرد نادیاریم
(مینە) وەس کەرۊ زایەڵە و زاری
تەڵەب کەر عیلاج، نە دەرگاری باری.
ئی شېعرۍ جە تاریخو (#05_10_1937#ز.)
گلەیی دویر:
قاسد نامەکەت ئاورد دا وەپێم
باز ئاورد وەسۆ، زام کۊنە و نوېم
مەزموونی نامەی عەمبەرینەکەت
مەعنای عیبارەت گەوهەرینەکەت
ئەر بی دیدەکەم فەرمابێت وە ناز
خەیلێ فراوان، گلە و ئیعتزاز
قیبلەکەم گلەت وە ناحەق کەرڎەن
خەتا گشت جە تۊس، تاکو وەڕۆی مەردەن
چەند ساڵان چەند مانگ چەند شەوان و ڕۊ
عومرم چو وە باد، دڵ وە مەیلی تۊ
جارێ ناوەردی ڕەحمێ تۊ وە دڵ
نەتەرسای جە سای، ئەلحەد سەرای گڵ
خەتا گشت جە تۊ خەیانەت جە تۊ
ڕەوییەی خوێنمژی و جینایەت جە تۊ
چەند جار چوون خوێنی ڕام دا وە بەختت
چەن دەغالەت دام، وە پایەی تەختت
چەن جور چەن جەفا نە تۊ دیم وە چەم
چەن واتەی بەدکار، چەن تانەی هاودەم
وېم کەرد وە پوول قەڵب ناڕەوای شاران
زەردەخەنەی بەزم، گورۆی بەدکاران
نەتەرسای جە ڕۊی مەحاکەمەی حەق
نەتەرسای جە زوڵم، کردەوەی ناحەق
ڕایێ نەیاوا سەلامێ جە تۊ
یا وە مەرحەمەت، پەیامێ جە تۊ
ناعیلاج جە ئێش دڵەی غەمگینم
نە بې قەراری، ئەڕوای شیرینم
جە سەردیی کەلام جە دڵ سەختی تۊ
جە بې مروەتی و جە بەدبەختی تۊ
وە وېنەی مەجنوون ڕووم نییا وە چۊڵ
وېم کەرد وە عەوداڵ، کەڵپۆس دام وە کۊڵ
گەڕیام پەی یەکې وە نازارم بۊ
وېنەی حەکیمان، دەواکارم بۊ
ئاوەردم وە دەس ئی نەونەمامە
ئی تەڕلان تەوار، قومری خەرامە
ئێستەش ئازیز گېیان مایەی حەیاتم
هېزی زینگانی، ڕووی سەر بساتم
مەدۊم سۆگەندت وە جوانی وېت
وە باڵای عەر عەر، دڵستانیی وېت
گوە وېنەی جاران وە واتەی بەدکار
کەریم وە سەر بەحس، ناو کۊڵانی شار
مەدەر فرېۋم مەم کەر وە تانە
مەکەرۊم وە ڕاز، ناو قاوەخانە
یاخود گەر شیمەی غەدرت تەرک کەرڎەن
ڕەویەی زۊرداریت، جە بیر وېت بەردەن
چوون من گېیان فیدام تۊیش دەروون کەیلی
وەک من دڵ کەباب، تۊیش دڵ پڕمەیلی
گۊش نادەی وە هەرف واتەی بەدکاران
نامکەی وە سەر مەشق، گشت هەرزەکاران
شەرت بۊ ئازیز گېیان شەرتی وە ڕاستی
شەرتی عاشقان، وە دڵ ئیخلاسی
وە وېنەی (مینە) تاکو وە ڕۊی کەفەن
تەوقی غوڵامیت، بخەم وە گەردەن.
ئی شېعرۍ جە تاریخو (#21_07_1938#ز.) نویسیێنە.
دەردی دوری:
قیبلەکەم حوورم ئیمانم دینم
مایە و دەسمایەی، دوکانچەی ژینم
ئاروام ئازیزم نووری بیناییم
تاجم دێهیمیم، کەوکەبەی شادیم
هېزو توانایی دڵەی زام گرتەم
دەوای ئەوگاری، جەستەکەی خەستەم
جەلای بینایی و شیفای دەوای دەرد
تەسکین کەرەکەی، هەناسانی سەرد
بەو دیدەی سیای مەستی خومارت
بەو شوعلە ڕەخشان، نووری ڕوخسارت
بەو ئەبرۆی هیلال کەچی خەمیدە
بەو خاڵ سینەی، هیچ کەس نەدیدە
بەو چین پەرچەم لوول وەردەی سێوەنگ
وە ورشەو پرشەی، لێوی غونچە ڕەنگ
قەسەم ە ئەڵماس تۊی گوارەیی زەرد
ئاوێزان وە بان، بلووری بېگەرد
جەو ساوە دیدە بڕیاگم جە تۊ
زایەڵەم گەرمەن، شەوان تاکو وە ڕۊ
سەرتاپای ئازام مەگریووم چوون شەم
ئامانەن ئامان، نووری دیدەکەم
بکەرۊ داوای زام دارییی دڵ
(مینە) وە ئێشۆ یانەش بوو وە گڵ.
مایەی ژین و زیندەگانیم:
ئازیز گېیان مایەی گشت زیندەگانیم
مایەی شەوق و زەوق، عومری جوانیم
ڕەحمێ کەر وە حاڵ ئێش زامانم
وە ناڵەی وە سۊز، نیوەشەوانم
پەی تۊ وییەردم جە حوکمی شاهی
وېم کەرد وە غوڵام، وە زڕ سینایی
پەی تۊ گوزەشتەم، جە موڵک و کیشوەر
بییەم وە عەبدی، دایېم دەس نەزەر
پەی تۊ وییەردم جە شەهریاری
وێڵ و ئاوارەی، هەر دە و کۊساری
تۆ وېت مەزانی عومری شاییم بی
ڕوتبەی حاکمی و، کارفەرماییم بی
چوون سالارێ بیم جە سەرحەد داران
سەرحەد دارێ بیم، جە ناو سەرداران
وېنەی تاجداران دارای ئەفسەر بیم
حوکمدار وە بان، وڵگەو کیشوەر بیم
پەی دیدەی سیات گشت دام وە تاڵان
کەردم وە سەربەش، یانەم جە ماڵان
سا تۊیش دیدە گېیان ڕەحمت بۊ جەلا
خەوفت بۊ جە ڕۊی ک، مەحکەمەی جەزا
یاوەرۆ ڕەحمێ وە حاڵەکەی من
وە کزەی دەروون زووخاڵەکەی من
وە ئەشکی هووناو دیدەی نمینم
وە زاری و سۊزی، زایەڵەی شینم
بەویەر جە (مینە) وەی ‌ئەحواڵەوە
دڵ وە ئێش سەخت، دەم وە ناڵەوە.
قەسەم:
ئازیز قەسەمم وە سای دەسماڵت
وە چینی پەشېو ، ک، زوڵفی سەرخاڵت
وە دیدەی سیای مەخموورت قەسەم
وە خاڵی جەمین، پڕ نوورت قەسەم
وە تەوقی هیلال ئەبرۆی خەمیدە
چەمان وە پەرگار، مانی کەشیدە
وە بەرق و شوعلەی شەمعی سەر گۆنات
وە چلیپای پېچ، ئەگریجەی تاکو تات
وە ڕەنگی نارنج چەنەی سیمینت
سوێن وە ماویی خاڵ لەوحەی جەمینت
وەشنۆی شەماڵ سای شەدەی بېگەرد
وە بەرقی ئەڵماس، پای گوارەی زەرد
وە ساقی گەردەن سافی بلوورت
وە عیشوەی گۊشەی، دیدەی مەخموورت
وە سەروی باڵای جە عالەم تاکت
دیسان وە سەفحەی، ڕوخساری پاکت
وە گشت قەسەم بۊ قیبلەکەم سەد جار
ئیعتبارت بۊ، جەیرانی تاتار
باوەڕت بۊ پێم ئاهووی خەتایی
نەم گرتەن جە تۊ، ڕای بې وەفایی
ساتێ بې میلیت نەویەن ژیانم
مەیلی تۊم باعث، ڕۊحی ڕەوانم
من وە ئیخلاس و تۊ وەو هەراسۆ
وەو دڵەی چوون سەنگ ک، خوا نەناسۆ
(مینە) وەی هووناو دیدەی پڕ گرین
مەدۊ دەغالەت، وە پای گوڵ جەمین.
ڕەفێق واچە پێم:
ڕەفێق واچە پێم ڕەفێق واچە پێم
بایۆ پەی ڕەزای، خوا واچە پێم
لوای وە پېشواز عێلی جافەوە
نەدیت نازارێ، بەی ئۊسافەوە
نەدیت ئاهۆکەی توونی هەر دەی دڵ
چەم سیاوەکەی، سەر دەلیلەی دڵ
نەدیت ئەو دلبەر ئارام گېیانم
مایەی زینگانی، ڕۊحی ڕەوانم
نەدیت سەر خاسقەی گشت کوردەواران
نازاری سەرخێڵ، دیدەخوماران
ئەو گوڵ باغی باغ سەهەن پەروەردە
تەشریف شەفایی ، ئێڵاخان بەردە
ئەو باڵا عەر عەر پەرۋەرڎەی گوڵزار
ئەو توبا قامەت، ئەو سەروی سەلار
واچە مەر نەدیت ئەو نەو نەمامە
ئەو تەڕلان تەواور ، کک، قومری خەرامە
نەدیت شیفای دەرد دڵەی غەمگینم
نەدیت مایەی کەیف، ڕووی سەرزەمینم
مواچان لوای تۊ وە نوای عێڵ
نەیاوای وە کۆچ، شۆخەکەی سەرخێڵ
نەدیت لەیل ئاما جە ئێڵاخەوە
چوون شابازی وەحش، وە ڕووی شاخەوە
نەدیت بەو ئەبرۆی هیلالی یەکەم
بەو ڕوخسار وېنەی، بەدری دوو هەفتەم
تۆ یاوای وە کۆچ وە ڕاگوزارۆ
نەدیت قیبلەکەم، وە تلمیت بارۆ
بەو بەژن و باڵای شۆخ و شەنگەوە
بەو شێوای شیرین، لەیلا ڕەنگەوە
بەو غەمزەی دڵ دۆز چوون خەدەنگەوە
بەو دیدەی خون ڕېز، پا وە جەنگەوە
چوون ئاهوێ خوتەن نەسا سڵ کەرڎە
ڕوومەت وېنەی مانگ، بې پەناو پەردە
نەدیت نەپەرسات جە حاڵەکەی من
جە کزەی دەروون، زووخاڵەکەی من
نەپەرسات هەواڵ خەستەی مەیلەکەش
وە سزای دووریی، دەروون کەیلەکەش
جە سەیلی زووخاو دڵەی نمینم
جە زاری و فەزەع، زایەڵەو شینم
نە چەخماخەی ئێش زامانی کاریم
جە ناڵەی وە سۊز ک، شەوان بېداریم
ئاما جە ئێڵاخ وېش وېنەیی لەیل
نەوات ها جە کۆ، قەیسەکەی دوجەیل
عەوداڵی خەمبار زەدەی دەردەکەش
وە سزای دووریی، دەروون بردەکەش
نەوات ها جە کۊ (مینە)ی سیابەخت
بیماری دڵڕېش، گرتەی زام سەخت.
ئی شېعرۍ جە تاریخو (#08_11_1939#ز.)ی نویسیێنە.
جوانی دوڵبەر:
شۆخێ جە ئەزەڵ وېش سەلار نەبۊ
بێ سورمە بې مەی، چەم خومار نەبۊ
نازاری کېشوەر شەدەلار نەبۊ
وە وېنەی تاووس، نە گوڵزار نەبۊ
ئاهووی خوتەن ڕەنگ گوڵ ڕوخسار نەبۊ
قامەت چوون سەروی، جۊیبار نەبۊ
سەر دەلیلەی گەل غەزاڵان نەبۊ
نازاری سەرخێڵ، نەوهاڵان نەبۊ
ڕوومەت چوون پەڕەی گوڵاڵان نەبۊ
سەر پۆلی گەردن، پڕ خاڵان نەبۊ
چوون بانوی ئەرمەن وېش دولبەر نەبۊ
شازادەی بې عەیب، لێو شەکەر نەبۊ
جەمین جامی جەم بې کەدەر نەبۊ
گەردن بلووری، جەلادەر نەبۊ
مەمانش لیمۆی تازەڕەس نەبۊ
شۆخێ بۊ واچان، وێنەش کەس نەبۊ
شەرت بۊ ئی دڵمە قەت شەیداش نەبۊ
دېوانەی عەوداڵ، بې پەرواش نەبۊ
گیرۆدەی تۊڕداو سیاتاش نەبۊ
وە وېنەی (مینە) و ب تەلاش نەبۊ.
جە ڕاگوزارێ:
نە ڕاگوزارێ نە ڕاگوزارێ
ئارۊ دیم وە چەم، نە ڕاگوزارێ
ئاهووی خوتەن بېز تەڕلان تەوارێ
جەیرانی سەرمەس، دیدە خومارێ
تووبا قامەتێ هەیئەت ڕەعنایێ
تاوس خەسڵەتێ، سەوڵەت زێبایێ
پەرچەم پەیشان وە وېنەی نەسرین
جەمین درەخشان، چوون نەجم پەروین
چەمان وە پڕگار مانی کەشیدە
چوون هیلال نو، ئەبرۆ خەمیدە
چەمانش دایېم بې مەی پڕ خومار
سیا چوون دیدەی، جەیرانی تاتار
چوون سوبحی صادق نە زوڵماتی شەو
ڕوومەت مەدرەوشا، جە تۊی زوڵفی ئەو
لەبان شیرینتر جە شیرین شەکەر
مەواچان غونچەی، وادەی سوب سەهەر
چەنەش چوون نارنج بەغدایی ڕەنگین
خەیلێ دڵگیر تەر، جە چەنەی شیرین
(مینە) پەرچەمش سیاو پڕچینەن
چەمان خەرامان، شۊخی شیرینەن.
ئی شېعرۍ جە تاریخو (#16_02_1939#ز.)ی نویسیێنە.
شەماڵ ئامانەن:
شەماڵ ئامانەن، شەماڵ ئامانەن
شەماڵ فیدات بام، دیسان ئامانەن
دیسان دڵ وە ئێش دووری سەرداگەن
جە هەر دەی دەروون، ئاهر وەرداگەن
دیسان دڵ وە ئێش هیجران بریانەن
چوون قەقنەس وە نار، حەسرەت گرییانەن
هامساکەی قەدیم غەمەکەی جاران
سەرداگەن لێمان، جە دووری یاران
ئەر پەرسی چېشەن شەماڵ فیدات بام
وە فیدای سروەی، سوب سەهەرگات بام
ئێدەن ئاماگەن وە مەنزڵگەی وېش
بین وە هامڕاز، ئەوگاری دڵ ڕېش
کەم کەم تۊی دەروون کەرڎەن وە خووناو
چەمانم ڕېزنۆن، ئەسرین چوون هووناو
تک تک مەتکیۆ زووخاو نە جەرگم
کاتەن وە قابیز، بسپارۆ مەرگم
وە بڵېسەی نار دووریی باڵای یار
گڕگڕ مەگڕیۆ، دڵ چوون پیرەدار
ئەرجووم هەر ئێدەن شەماڵ فیدات بام
وە فیدای سروەی، سوب سەهەرگات بام
کەردم من خوێنی دەسەو دامانم
وەتووم دەغالەت ، بەدەر ئامانم
بویەر ئەی سوب نە سەر کۊساران
وېت عەبیرین کەر، جە تۊی گوڵزاران
وە بۊی مشکی خاس گوڵباغی باغی
عەبیر ئامێز کەر، نە تۊی دەماغی
وە سروەکەی وېت مەخڵووت وە گوڵاو
بدۆ نە دەماغ، قیبلەی من جە خاو
بشانۆ کەم کەم ئەگریجەی چین چین
بدا نە گۆناش، جە خاو شیرین
بەل وە سروەی تۊ شنۆی زوڵفی ئەو
بېدار کەن دیدەی، ئازیز گېیان جە خەو
کاتېو وەی تەقریو ئەو شۆخ و شەنگە
ئاما نە خەودا، ئەو گوڵباغ ڕەنگە
ئەی ئاری حەسرەت ئێش و فیراقش
وا تاقەن تاقەت، پەی ئەبرۆی تاقش
ئەی عەرز ئەحواڵ ئەی ئێش دووری
ئەی سزای زامان، سەخت مەهجووری
ئەی قرچەی زامان دڵ شەرارەی دڵ
ئەی ڕەنج و خەفەت، دووری جەمین گوڵ
ئەی بڵېسەی ناز شەرارەی دەروون
ئەی سەیل ئەسرین، دیدەی پڕ جە هوون
ئەی دووی هەناسەی وە خەم پەروەردەم
ئەی قرچەی زامان، دڵ وە هوون کەرڎەم
ئەی ئێش و خەفەت هانا وە داخۆ
وەی ڕەنگ بەرمەیۆ، جە تۊی دەماخۆ
عەرزکەر حاڵەکەی (مینە)ی دڵ خەمین
تو ئەو شازادەی، سیا ماڵ نشین.
ئی شېعرۍ تاریخو (#08_07_1938#ز.)ی نویسیێنە.
هانا هامسەران:
هانا هامسەران جە ئێش دووری
جە زامان سەخت، کەرڎەی مەهجووری
تک تک مەتکیۆ هووناو نە جەرگم
دایېم نە سزای شەرارەی مەرگم
شادی کۆچش کەرد نە ئقلیمی دڵ
خەم دڵشاد بېیەن، وە ماوا و مەنزڵ
خەم و تەم هەم جە لام بېیەن جەم
ئەسرش هووناوەن، سەرچاوەکەی چەم
چەمانم ئەسرین هووناو مەڕېزۆ
دووی هەناسەی سەرد، نە دڵ مەخېزۆ
جە سزای زامان دڵەی پڕ جە ژار
جە گەرمیی دەروون، جە شەرارەی نار
وە کەباب بېیەن جەستەم سەر تاکو پا
وېنەی زوخاوەن، مۆخم جە ئازا
خەم نە جەرگەی جەرگ گېیان نە جەرگەی خەم
تەن کاسەی وە خەم، خەمانم هاودەم
پەی شۊڵەی ڕۊخسار ئەو ئارامی گېیان
جەتەم مەگریۆ، چوون شەمعی شەوان
هام سەران ئامان بکەروون چارم
بکەروون عیلاج، دڵەی ئەوگارم
ڕەحمێ کەن وە حاڵ (مینە)ی سیابەخت
تاکەی بناڵۆ، وە زامانی سەخت.
ئی شېعرۍ ساڵەو (1939ز.) نویسیێنە،
دیوانو مینە جافی ساڵەو (1990ز.) جە بەغڎا چاپکریان.
ئەسعەد ڕەشید.[1]