ئیکە ژ هۆزانڤانێن کوردێن بەرنیاس، هۆزانێن خوە ب جڤاکێ کوردەواری و روینشتن و ژیارا وان نڤیسینە، هەردەم تێکەلی خۆشی و نەخۆشی یێن وان بوویە.
حوسنی - هەروەکو هاتی یە گۆتن - مرۆڤەکێ ژ خۆشەرم و رێنجبەر و ژ بنەمالەکا بناڤودەنگ بوو، جهێ خوە دناڤ خەلکێ دەڤەرێ دا هەبوو.
حوسنی مامۆستایێ زانینێ، تێکەلی مەلا و ریسپی و شێخێن رێکا نەقشەبەندی بوو، هۆزانڤانی خوە دهێلینا رەوشەنبیری یێ دا دیتی یە و برا و باب و مامێن وی ب مەلاتی یێ و دەرسدانێ هاتینە نیاسین.
حوسنی کوڕێ مەلا ئەحمەدێ بابکی یە، و بابک ناسناڤێ بنەمالا وان بوویە و دیارە ژ سڤککرنا پەیڤا بابکۆ بوویە، ل سالا (1868)ێ ز ل گوندێ بامەڕنێ ژدایک بوویە و هەر ژیارا خوە ل ڤی گوندی بۆراندی یە. خواندنا فەقیاتی یێ ل تەکیا شێخ (بها و الدین) ی ب دووماهی ئینایە و ئیک ژ مریدێن شێخی و دەرسدارێن تەکیا بامەڕنێ بوویە، و حوسنی و بەر کارێ خوە یێ تەکیایێ را دکانداری کری یە و ژیارا خوە و مالا خوە و خێزانا خوە پێ ب رێڤە بری یە.
حوسنی کوڕەک ب ناڤێ(جەواد) و چار کچ هەبوون ژنا وی (لەیلا) خەلکا گوندێ هرۆرێ بوو و برایێن وی :(ملا نەجمەدین، ملا عەبدولڕەحمان، ملا مستەفا) ئەدیب و مەلایێن بێ هەڤڕک بوون.
حوسنی هندەک ژ خواندنا خوە ل دەف سەیدا (محەمەد شکری اڵالوسی) ل بەغدا خواندی یە و سەیدایێ وی ژ بەر زیرەکاتی و هزرمەندی یا وی حەز دکر کچا خوە بدەتێ و وەک زاڤایێ خوە بهێلیتە ل دەف خوە، بەلێ دەمێ شێخ طاهای ب ڤێ چەندێ زانی، ئینا ب لەز جابا وی ڤرێکر و گۆتێ : کەسێ دەرگەهێ خوە نەهێلایە و چوویە دەرگەهێ خانی یەکێ دی پێڤە دەت.
حوسنی هەر ل وێرێ دژیانا خوە دا فێر ب بوو ڤان ئەزمانا : تورکی، فارسی، عەرەبی و زیدەباری کوردی یێ و هەر وەکو مە گوتی وەک بنەمالەکا ناڤدار، ب زانین و زانیاری یێ و باپیرێ وی مەلا ئۆسمان قازی یێ ئامێدی یێ بوو و نۆکە گۆڕێ حوسنی ب رەخ گۆڕێ بابێ و برا و مامێن وی ل گۆڕستانا بامەرنێ ل نێزیک قوببا شێخ (بها و الدین)ی یە و د وەسیەتا خوە دا وی گۆتبوو :(زیارەتێ من تازە چێکەن دا هەکو خەلک قەست دکەنێ، بیرا وان ل من بهێت و خێرا بۆ من بکەن) و ل سالا (1936)ز یێ چوویە بەر دلۆڤانی یا خودێ و ژ خودێ مەزن دخوازین وی ب بەهەشتا خوە یا دێرین شاد بکەت.
ئەڤە کورتی یەک بوو ژ ژیانا وی یا کەسایەتی و بەرهەمێ دویڤچوونا مە بۆ رە و رێشالێن هۆزانڤانی و وەک ژێدەرێن بەرچاڤ یێن ب دەست مە کەفتین هەر ل سەر هۆزانڤانی ب خوە وەک شاعر و بەرهەمێن وی و ژیانا وی و ژیانا وی یا کەسایەتی و رەوشەنبیری و پەیداکرنا سەر و سیمایێ هۆزانڤانی ب خوە ژ بۆ پەیداکرنا نێزیک وێنێ هۆزانڤانی.