چەند رۆژێکە بەشێک لە دامودەزگا راگەیاندنەکانی ناوخۆی هەرێمی کوردستان بە تەلەفزیۆن و سایت و رۆژنامە و هەندێک لە راگەیاندنەکانی دەرەوەی هەرێمیش، باس لە نێوانگیری (وساگە) پارتیمان لەگەڵ گۆڕان دەکەن.
ئاگاداری هەموو جەماوەری خۆشەویستی کوردستان دەکەینەوە کە پارتیمان نە داوای نێوانگیری لە هیچ کەسایەتی و هیچ لایەنێکی سیاسی کردووە و نە بە پەسندیشی دەزانێ، لەبەرئەوەی هەڵوێستی پارتیمان رون و ئاشکرایە کە رووداوەکانی ئەم دواییە لەئاکامی رەفتاری ناشایستە و دژ بە بەرژەوەندییە باڵاکانی نەتەوەیی و نیشتمانیمان و دور لە عورفی سیاسی، گۆڕان هاتنە کایەوە.
لە کاتێکدا کە پیشمەرگە قارەمانەکان بە پشتیوانی جەماوەری خۆراگری کوردستان لە شەرێکی سەخت و دژواردان بە درێژای زیاتر لە هەزار کیلومەتر بەرامبەر تیرۆریستانی داعش، هەروەها کۆمەڵێک قەیرانی سەپێندراو بەرۆکی خەڵکی خۆڕاگری کوردستانی گرتووە، ئەوان خەریکی چەواشەکاری و پیلانگێڕین و منداڵ و مێرمنداڵانی چەند دەڤەرێک رێکدەخەن وهانیان دەدەن کە سوکایەتی بە بارەگاکانمان بکەن و بیانسۆتنین و هەرەشە لە سەر سەروماڵی ئەندام و کادیرانمان بێت و شەهید بکرێن و چەند کەسێک ببنە قوربانی ئەو پیلانەیان، ئینجا بیانەوێ لە سەرتاسەری کوردستان ئاژاوە و پشێوی دروست بکەن و ناوبانگی هەرێم کوردستان ناشرین بکەن و نیگەرانی بۆ پێشمەرگە دلێرەکان و جەماوەری دڵسۆزی کوردستان دروست بکەن.
کۆی ئەم رەفتارو کردارانەی گۆڕان شایەنی ئەوەن سنوورێکیان بۆ دابندرێ تاچیتر سواری شەپۆلی هەندێ نارەزایەتی و مانگرتنی رەوای چین و توێژەکان نەبن و بەلارێیان دانەبەن و، لە لایەن سەرجەم چین وتوێژەکانی کۆمەڵگای کوردستان رەفز بکرێنەوە و رووبەڕووی سزادانی یاسایی ببنەوە. بۆیە سەر لەبەری ئەو دەنگوباس و بڵاوکراوانەی باس لە نێوانگیری ناوخۆی یان دەرەکی دەکەن رەت دەکەینەوە.
راگەیاندنی مەکتەبی سیاسی
پارتیی دیموکراتی کوردستان
26-10-2015