شەهید هیوا لە ساڵی 1967 لە بنەماڵەیەکی جووتیاری گوندی (ئاشی بارام) سەر بە شارۆچکەی چوارتا لە دایکبووە. ساڵی 1972 خێزانەکەیان دەچنە شاری سلێمانی و لە گەڕەکی زەرگەتەی کۆن نیشتەجێ دەبن، دەچێتە بەر خوێندن قۆناغی پێنجەمی ئامادەی بەسەرکەوتوو تەواو دەکات. بەڵام هەر زوو هەست بە ئێش و ئازاری نەتەوەکەی دەکات و ساڵی 1982 دەبێتە پێشمەرگە و پەیوەندی بە کەرتی ڕێکخستنی پێنجوێنەوە دەکات لە پۆلی گەرمک.. شەهید لە ژیانی پێشمەرگایەتیدا سێجار دەستگیر دەکرێت، یەکەمجار ساڵی 1982 لەلایەن ئیستخباراتەوە بۆ ماوەی 1 مانگ و دوای ئەشکەنجەدانێکی زۆر هیچ نادرکێنێت و ئازاد دەکرێت. دووەمجار لە ساڵی 1985 لەلایەن ئەمنی تەوارییەوە بۆ ماوەی 2 مانگ، سێیەمجار ساڵی 1986 بۆماوەی ساڵ و نیوێک زیندانی دەکرێت لە زیندانی ئەبوغرێب، هەر لەم زیندانە لە مانگی 12/1987 لە سێدارە دەدرێت، ناوبراو دووەم شەهیدی بنەماڵەکەیەتی.