دواڕۆژ، هاوکار مستەفا
ئاسایشی کەرکوککەرکوک ڕایدەگەیەنێت، لە ماوەی 6 مانگی یەکەمی ئەمساڵدا 185 کەسیان بە ماددەی چواری تیرۆر دەستگیرکردووە.
رائید غەسان ڕەشید، وتەبێژی ئاسایشی کەرکوک ئەمڕۆ دووشەممە 31ی تەمموزی 2017 بە دواڕۆژی ڕاگەیاند، هێزەکانمان لە ماوەی 2017/1/1 تا 2016/6/30 توانیویانە 1009 چالاکی جۆراوجۆر لە کەرکوک و دەوروبەری ئەنجام بدەن و لەو چوارچێوەیەشدا، 185 کەس بە ماددەی چواری تیرۆر و 473 کەسی تریش بە تاوانی جۆراوجۆر دەستگیرکراون.
وتیشی تاوانەکان بریتین لە کوشتن، ڕفاندن، ساختەکاری، بازرگانی بە مادەی هۆشبەر، دزیکردن، بازرگانی بە مەوادی بەسەرچوو و بەرتیل وەرگرتن بۆ دەرکردنی منداڵ و خێزان لە کەمپی ئاوارەکان بەبێ‌ ڕەزامەندی لایەنی پەیوەندیدار.
وتەبێژی ئاسایشی کەرکوک ئەوەشی خستەڕوو، ئەو کەسانە دوای دەستگیرکردنیان ڕەوانەی لایەنی پەیوەندیدار دەکرێن بۆ گرتنەبەری ڕێوشوێنی یاسایی دژیان.
31-07-2017