دەستەی سەربەخۆی مافی مرۆڤی #هەرێمی کوردستان# ڕایدەگەیەنێت، کە لە مانگی ڕابردوودا 22 کەس کوژراون هەشت کەس-یش خۆیان کوشتووە و خۆیان خنکاندووە.
ئەمشەو دەستەی سەربەخۆی مافی مرۆڤ لە هەرێمی کوردستان ئاماری کوشتن، کوژران و پێشێلکارییەکانی مانگی ئاب-ی بڵاوکردەوە.
بەپێی ئامارەکە، لەو مانگەدا لە #باشوری کوردستان# 22 کەس کوژراون و هەشت کەس-یش خۆیان کوشتووە و خۆیان خنکاندووە.
هەر بەپێی ئامارەکە، کۆی گشتی حاڵەتەکانی تەقەکردن و بریندارکردن 14 حاڵەت بووە و چوار پێشێلکاری تریش تۆمارکراوە.
دەستەکە، ڕایگەیاندووە:سەرهەڵدانەوەی کێشەکانی ڕابردوو ئەوەمان پێدەڵێت، کە کاتی خۆی ئەو کێشانەی ڕوویانداوە لەسەر کێشەی موڵکداریی و کۆمەڵایەتی لەڕێگای یاساوە یەکلایی نەکراونەتەوە.
ئاماژەشی بۆ ئەوەکردووە، کە لە زۆربەی حاڵەتەکانی کوشتن و شەڕکردن چەک بەکارهاتووە و هێشتا بوونی چەک لای هاوڵاتیان و بەکارهێنانی بۆ یەکلاکردنەوەی کێشەکان مەترسییە بۆسەر ئاسایشی کۆمەڵایەتی.
لە ئاماری مانگی تەموز-ی دەستەکەدا 36 حاڵەتی کوشتن و خۆکوشتن-یان لە باشوری کوردستان تۆمارکرابوو، بەو پێیەش ئەم مانگە ئامارەکە کەمیکردووە. [1]