دواڕۆژ، عەلی حەمە سەعید
بەبۆنەی کۆتاییهاتن بە وەرزی قەدەغەکردنی ڕاوەماسی، بەڕێوەبەرایەتی پۆلیسی دارستان و ژینگەی سەیدسادق ئامارەکانی سێ مانگی ڕابردووی کار و چالاکییەکانیان خستەڕوو، کە له و ماوەیەدا 20 کەسی سەرپێچیکاریان دەستگیرکردووە و 70 کیلۆ ماسیشیان لە ڕاوچییەکان سەندوەتەوە.
ڕائید سەردار ئەحمەد، بەڕێوەبەری پۆلیسی دارستان و ژینگەی سەیدسادق، بە دواڕۆژی ڕاگەیاند، دوای ئەوەی لە 14/3/2018 بە فەرمانێکی وەزارەتی کشتوکاڵ و سەرچاوەکانی ئاو وەرزی قەدەغەکردنی ڕاوەماسی دەستیپێکرد، تیمەکانمان بەردەوام چاودێری دەریاچەی سیروان و دارستانەکانیان کردووە، بەڵام لەم ماوەیەدا 20 هاووڵاتی سەرپێچیکارمان دەستگیرکردووە کە بڕی زیاتر لە 70 کیلۆ ماسییان پێبووە، هاوکات دەستیشمان گرتووە بەسەر بەلەمێک و ماتۆڕێکی ڕاوکردندا.
ئاماژەی بەوەشکرد، هەروەها لە ساڵانی ڕابردوودا لە 17/6 کۆتایی بە وەرزی قەدەغەکردنی ڕاوەماسی دەهات، بەڵام ئەمساڵ وادەکەی پێشخراوە بۆ 14/6، لەگەڵ ئەوەشدا ئەمساڵ بەراورد بە ساڵی ڕابردوو لەم کاتەدا ئاستی ئاوی ڕووباری سیروان بەڕێژەیەکی زۆر دابەزیوە و ئەمەش کاریگەری خراپی کردوەتە سەر بەرهەمی ماسی لە دەریاچەکەدا و زەرەرمەندی یەکەمیش ئه و کەسانەن کە بژێوی ژیانیان لە سەر ڕاوە ماسییە.
بەڕێوەبەری پۆلیسی دارستان و ژینگەی سەیدسادق ئەوەی وت لەگەڵ ئەوەی سنورێکی بەرفراوانمان لەبەردەستدایە و ئەرکێکی قورسیشمان لە ئەستۆدایە، بەڵام وەک پێویست هاوکاریمان ناکرێت لەلایەن وەزارەتە پەیوەندیدارەکانەوە تەنها لەلایەن چەند کەسێکەوە نەبێت.[1]
#11-06-2018#