سروودی نەی
وەرگێڕانی: ئەحمەد تاقانە
تایپ: زریان سەرچناری

بژنەڤە ل شمشاڵ کە باست بۆ دەکا
داد لە دەس دووری دەکات و گۆدەکا

لەو دەمەی ڕا، من لە نایستان بڕام
مێرد و ژن هەر وا دەگریێنێ هەرام

پێم دەوێ سینەی بە دووری چاک کراو
چاک بڵێم لێکدانەوەی تاسەی هەناو

هەر کەسێ کو دور بمێنێ ل بنەوان
وێڵ دەبێ دیسان لە بۆ ڕۆژی ژوان

من لە هەچ کۆڕێ دەکەم ناڵین و داد
دەبمە دۆست و هاوەڵی ناشاد و شاد

هەرکەسەو وا تێدەگا یاری منە
گشت نیهانێکی دەروونمیش لێی ونە

من نهێنیم دوور لە ناڵینم نییە
لێ چەم و گوێ بێبەشن لەم ڕوونییە

لەش لە گیان و گیان لە لەش پەنهان نییە
کەس بەڵام بۆ دینی گیان شایان نییە

ئاگرە ئەم بانگی شمشاڵە... نە (با)
هەر کێ نەیبێ ئاگری وا... هەر نەبا

ئاگری (ڤین)ە لە نەی وا دێتە دەر
جۆششی ڤینە لە مەی وا دێتە دەر

نەی هەڤاڵێتی کەسێ یار لێی بڕا
پەردەکانی پەردەکانمان...پێی دڕا

وەک نەیێ کێ ژەهر و تلیاکاوی دی؟!
وەک نەیی کێ یار و دڵ تاساوی دی؟!

نەی خەمی ڕێگەی تەژی خوون باس دەکا
سەرگوزشتەی ڤینی مەجنوون باس دەکا

هەروەکو نەی، گوایە هەسمانە دوو دەو
یەک لەوان بزرەن، لە ناو لێوانی ئەو

ئەو (دەم)ەی دیکەش بە ڕووتان زارەزار
دەردەدا، کاتی سەما، هات و هەوار

لێ دەزانێ هەر کەسێکی بینەرە
کەم گرینەی ئەم سەرەش هی ئەو سەرە

نوزەیی ئەم نایە هی زاری ئەوە
های و هوویی گیان لە ئازاری ئەوە

ڕاز گری ئەم ڕازە هەر بێهۆشە بەس
زار لە گوێ زیاتر نییە کڕیاری... کەس

ناڵەناڵی نەی ئەگەر نەیبوایە بەر
خاکی پڕ شەکرێ نەکردبا نەی مەگەر

ئای کە چەندین ڕۆژ بەسەرچوو هەر بە ژان
سۆژەکانیش بوونە هاوڕێی ڕۆژەکان

ڕۆژ کە چوون، بێژە: بڕۆن باکم چی یە؟
تۆ مەچۆ ئەی- پاکی وەک تۆ هەر نییە-

گشت کەسێ ب ئاو تێر دەبێ ماسی نەبێ
ڕۆژی بێ ڕۆژی بەسەر چوو، لادەچێ

قەت بەچاکی پەی بە حاڵ نابا نەفام
سا دەبا بەس بێ وتار و (والسَّلامْ) .

مەی لە جۆشیدا گەدای جۆشی مەیە
چەرخ، لە خولدا گیرەوەی هۆشی مەیە

مەی بە ئێمە مەستە نەک ئێمە بە ئەو
تەن بە ئێمە درووستە نەک ئێمە بە ئەو

گشت (تەن)ێ توانای سەمای چاکی نییە
گشت (مەل)ێ هەنجیر بە خۆراکی نییە

لاوە، بەند بشکێنە و ئازادبە... دەی
دەبیە دیلی زیو و زێڕێ... تابەکەی؟!

گەر تۆ زەریا ڕۆکەیە ناو گۆزەیەک
گۆزە چەند دەگرێ؟! بەشی یەک ڕۆژە.. یەک

گوزەیی چاوانی ڕژدان نابێ پڕ
تا سەدەف قانع نەبێ پڕنابێ دوڕ

هەر کەسێ بەرگی لە ڤیندا، دادڕا
ئەو، ئەوا ڕژدی و هەموو خەوشیی سڕا

خۆش بە خۆش!! ئەی ڤینی خۆش سەودای مە
وەی پزیشکی دەرد و گشت خولیای مە

چارە تۆی بۆ پیاوەتی و ناموسی مە
ئەی تۆی ئەفلاتوون و گالینووسی مە

ڤین لەشی خاکی بەرەو گەردوون فڕاند
کەوتە یاری کێو و چالاکیی نوواند

ڤین کە هاتە گیانی توور ئەی دڵبراو
مەستە توور و، نووچی مووسا تریشقەتاو

ڕازەکی ون وا لە ناخی زیر و بەم
گەر دەریخەم، سەرزەوی پێکدا دەدەم

ئا ئەمەی بەم دوو دەرەی، نەی گۆی دەکا
گەر ئەمن بیڵێم، جیهانێ تێکدەدا

گەر بە لێوی هاودەمی خۆمدا کەوم
هەر وەکوو نەی دێینەگۆ خۆم و دەوم

هەر کەسێ کو ل هاوزمانی بوو جودا
بێ نەوایە، گەر هەشیبێ سەد نەوا

چونکە گوڵ ڕۆیی و بەسەرچوو لالەزار
ناژنەوی چیی دی بەسەرهاتی هەزار

چونکە گوڵ چوو باخ هەموو پرشە و بڵاو
بۆنی گوڵ لای کێ وە دەستخەین بۆ گوڵاو؟!

خۆشەویست گشتە و ئەڤیندار پەردەیە
خۆشەویست زیندە و ئەڤیندار مردەیە

ئەو، کە بێت و ڤین نیگاداری نەبێ
وەک مەلی بێ پەڕ دەبێ و... چاری نەبێ

پەڕ و باڵمان بۆ ڤیانی ئەو کەمەن
تاکوو لای یار چنگ بەموو کێشی دەکەن

من چ جۆرێ پێش و پاش هەست پێ بکەم
پێش و پاش دووربن لە تیشکی یارەکەم؟!

تیشکی وی ل ڕاست و چەپ و ژێر و سەرم
کۆت و تاجن بۆ مل و بۆ سەر سەرم

ڤین دڤێ ئەم باسە بکرێ و دەرکەوێ
وێنە نە نوێنێ کە نەینک، کوو دەبێ؟!

تۆ دەزانی نەینکت بۆ ڕون نییە؟!
چونکە ژەنگ، لێ نوشتووی ڕوخسارییە

جام کە ژەنگی هەرزەییی لێ بوو جودا
پڕدەبێ ل تیشکی گەشی خۆری خودا

تۆ بڕۆ ژەنگاری ڕووی لێ لابەرە
دوای ئەوە، بۆ دەرکی ڕستەی وا وەرە

تۆ دەبێ ڕاستی بە گوێی دڵ بژنەوی
تا لە ئاو و گڵ بەجارێ دەرکەوی..

تێ دەگەیت و گەر لە ڕێیدا بی بە گیان
پاش ئەوی سۆژ، پێ دەنێیتە سەر ڕێیان

گوێ بدەن، دۆستینە لەم داستانەمان
ڕەخنەیە ل ئەم حاڵەمان، ڕاست و ڕەوان [1]